قازاقستان • 16 جەلتوقسان، 2019

قورعانىس مينيسترلىگىندە قازا بولعان اسكەري قىزمەتشىلەرگە مەموريال اشىلدى

13 رەت كورسەتىلدى

16 جەلتوقسان قارساڭىندا قورعانىس مينيسترلىگىندە قازاقستان
تاۋەلسىزدىگى جىلدارى اسكەري مىندەتىن اتقارۋ كەزىندە قازا بولعان اسكەري قىزمەتشىلەرگە ارنالعان مەموريال اشىلدى.

سالتاناتتى راسىمگە قورعانىس مينيسترلىگىنىڭ باسشىلىعى، قر پارلامەنت دەپۋتاتتارى، اسكەري قىزمەتشىلەر مەن ارداگەرلەر، «جاس ۇلان» اسكەري مەكتەبىنىڭ تاربيەلەنۋشىلەرى، سونداي-اق قازا بولعانداردىڭ تۋعان-تۋىستارى قاتىستى.

 «وتانىن قورعاۋ – ءاربىر ازاماتتىڭ پارىزى. مەنىڭ ۇلىم – ۇشقىش، اسكەري مىندەتتەرىن ورىنداۋ كەزىندە قازا بولدى. ءبىز وسىنداي مەموريالدىڭ اشىلعانىنا قۋانىشتىمىز جانە ريزامىز»، – دەدى اعا لەيتەنانت جانبوتا قاسىموۆتىڭ اكەسى.

ءىس-شاراعا قاتىسۋشىلار ەسكەرتكىشكە گۇل شوقتارىن قويىپ، ەرلىكپەن قازا تاپقانداردى ءبىر مينۋت ۇنسىزدىكپەن ەسكە الدى.

«ماڭگى ەسىمىزدە» مەموريالى قورعانىس مينيسترلىگىنىڭ عيماراتىندا اسكەري مىندەتتىڭ ۇلگىلى ورىندالۋىنىڭ جانە وتانعا شەكسىز قىزمەت ەتۋدىڭ ۇلگىسى رەتىندە اسكەري قىزمەتشىلەردىڭ الدىندا ورناتىلعان. قازا بولعانداردىڭ ارقايسىسى قازىرگى اسكەري قىزمەتشىلەر مەن بولاشاق ۇرپاقتىڭ جادىندا ماڭگى قالادى. ويتكەنى، بۇل جاۋىنگەرلەر، مايدانگەرلەر مەن باتىرلاردىڭ داڭقتى ءداستۇرىن جالعاستىرۋشىلار.

ول قازا بولعاندار تۋرالى دەرەكتەر بازاسى جيناقتالعان قابىرعا مەن اقپاراتتىق بلوك بولىپ تابىلادى. ەكراندا ءاربىر قايتىس بولعان ادام تۋرالى اقپارات كورسەتىلەدى. اتاپ ايتقاندا فوتوسۋرەت، تۋعان جەرى مەن تۋعان كۇنى، قىزمەت ەتكەن ورنى، قاشان جانە قانداي جاعدايدا قازا بولعانى كورسەتىلگەن.  مەموريالعا دايىندىق جۇرگىزىپ جانە جۇمىس ىستەۋ بارىسىندا جينالعان بارلىق مالىمەتتەر مەن ماتەريالدار قر قك اسكەري-تاريحي مۇراجايىنا بەرىلەتىن بولادى.

دەرەكقور تەك قازاقستاندا عانا ەمەس، سونىمەن قاتار شەتەلدە وقۋ-جاۋىنگەرلىك مىندەتتەردى ورىنداۋ كەزىندە جانە يراكتاعى بىتىمگەرشىلىك ميسسياعا قاتىسقاندا قازا تاپقان 70 قازاقستاندىق اسكەري قىزمەتشى تۋرالى مالىمەتتەردەن تۇرادى.

سوڭعى جاڭالىقتار

ۇقساس جاڭالىقتار