نۇر-سۇلتانداعى تاۋەلسىزدىك سارايىندا وتكەن ۇلكەن جيىن «ادەبي كەزدەسۋمەن» اشىلدى. كەكىلباەۆتار وتباسىنىڭ ۇيىتقىسى, جازۋشىنىڭ جارى كلارا جۇمابايقىزى, قىزدارى ءزاۋزات پەن ساۋلەت, كەلىنى, نەمەرەلەرى ابىل مەن ءادىل قاتىسىپ, زيالى قاۋىم الدىندا كەمەل جازۋشى جايلى ەستەلىكتەرىمەن ءبولىستى. ق.قۋانىشباەۆ اتىنداعى دراما تەاتردىڭ ارتىستەرى كەزدەسۋدىڭ شىرايىن كەلتىرىپ مەرەيتوي يەسى ءابىشتىڭ, جازۋشىنىڭ اناسى ايساۋلەنىڭ, جارى كلارا مەن بالالارىنىڭ وبرازدارىن جاساپ قاق توردە وتىردى.
قوناقتار تاۋەلسىزدىك سارايىنىڭ فويەسىندە جازۋشىنىڭ عۇمىرى مەن شىعارماشىلىعىنا ارنالعان ء«ابىش الەمى» اتتى فوتوكورمەنى تاماشالادى. وعان قالامگەردىڭ كىتاپتارىنىڭ تسيفرلىق كوشىرمەلەرىنىڭ QR كودتارى مەن جەكە مۇراعاتتاعى ەڭ جارقىن ساتتەرى بەينەلەنگەن 50-دەن استام سۋرەتتەرى قويىلدى. سونداي-اق, «قازاقستان مەن شەت ەلدەردەن العان ناگرادالار» دەگەن تاقىرىپتا قالامگەردىڭ كوزى تىرىسىندە جەتكەن جەتىستىكتەرى – 100-دەن استام ماراپاتتار, ديپلومدار مەن العىس حاتتار قويىلدى. ونىڭ ىشىندە قۇرمەت وردەنى, وتان وردەنى, قازاقستاننىڭ ەڭبەك ەرى, دوستاستىق وردەنى, تۇڭعىش پرەزيدەنت وردەنى, قازاقستاننىڭ مەملەكەتتىك سىيلىعى, ەلباسىنىڭ بەيبىتشىلىك جانە رۋحاني كەلىسىم سىيلىعى, قازاقستاننىڭ حالىق جازۋشىسى, «پلاتينۋم تارلان» سىيلىعىنىڭ كۋالىكتەرى جانە ت.ب. ماراپاتتار بار.
زاڭعار جازۋشىعا ارنالعان وقۋ كونگرەسى قۇرمانعازىنىڭ ايگىلى «اداي» كۇيىمەن اشىلدى. اقىن سۆەتقالي نۇرجاننىڭ جازۋشىعا ارناعان «ماداق جىرىن» ەلوردالىق قاللەكي تەاترىنىڭ ارتىستەرى ورىندادى.
كونگرەستە العاشقى بەينەقۇتتىقتاۋلاردى شەتەلدىك قالامگەرلەر, عالىمدار مەن اۋدارماشىلار جولدادى. ولار – ۆەنگريالىق تۇركىتانۋشى عالىم وڭايشا ماندوكي, ادەبيەتتانۋشى بودا لايوش, ەتنوگراف عالىم ءداۋىت شومفاي قارا, رەسەيلىك ادەبيەتتانۋشى نيكولاي اناستاسەۆ, گەرمانيالىق ادەبيەتتانۋشى, اۋدارماشى كريستينا ليحتەنفەلد, تۇركيالىق عالىم حۋليا كاسانوگلۋ چەنگەل, رەسەيلىك پروزايك, اۋدارماشى اناتولي كيم جانە باسقالار. ءابىش كەكىلباي ۇلىمەن شىعارماشىلىق بايلانىستا بولعان بۇل شەتەلدىك زيالى قاۋىم وكىلدەرىنىڭ ارقايسىسى قالامگەر جايلى ءوز پىكىرلەرىن, ونىڭ «اڭىزدىڭ اقىرى» رومانىن اۋدارۋ بارىسىنداعى كەيبىر مەزەتتەردى اڭگىمەگە ارقاۋ ەتتى. جالپى, «اڭىزدىڭ اقىرى» جازۋشىنىڭ وزگە تىلدەرگە ەڭ كوپ اۋدارىلعان شىعارماسى. بيىلعى ء«بىر ەل – ءبىر كىتاپ» اكتسياسىندا دا جۇرتشىلىق تاراپىنان ءدال وسى روماننىڭ تاڭداپ الىنۋى تەگىن بولماسا كەرەك.
كونگرەس بارىسىندا مادەنيەت جانە سپورت ءمينيسترى اقتوتى رايىمقۇلوۆا مەملەكەتتىك حاتشى قىرىمبەك كوشەرباەۆتىڭ قۇتتىقتاۋ حاتىن وقىدى. مينيستر جازۋشىنىڭ ء«بىر ەل-ءبىر كىتاپ» اكتسياسى اياسىندا تاڭدالعان «اڭىزدىڭ اقىرى» رومانىن ءبىر جىلدىڭ كولەمىندە رەسپۋبليكا بويىنشا 4 مىڭ كىتاپحانانىڭ شەڭبەرىندە 700 مىڭنان اسا ادام وقىعانىن جەتكىزدى.
ۇلكەن جيىندا مەملەكەت جانە قوعام قايراتكەرى, سىنشى, ادەبيەتتانۋشى سۇلتان ورازالين, ەۋرازيا ۋنيۆەرسيتەتىنىڭ دوتسەنتى, اقىن وڭايگۇل تۇرجان, جازۋشىلار وداعىنىڭ توراعاسى, اقىن ۇلىقبەك ەسداۋلەت, مەملەكەتتىك سىيلىقتىڭ يەگەرى, جازۋشى تولەن ابدىك جازۋشى تۋرالى وي-پىكىرلەرىن, ەستەلىكتەرىن ايتتى. رەسمي جيىندى جازۋشىلار وداعى نۇر-سۇلتان قالالىق فيليالىنىڭ توراعاسى, اقىن داۋلەتكەرەي كاپ ۇلى جۇرگىزدى.
كونگرەس اياسىندا ءابىش كەكىلباي ۇلى شىعارمالارى 20 تومدىعىنىڭ تۇساۋى كەسىلدى. ء«ابىش الەمى» بايقاۋىنىڭ قورىتىندىسى جاريالاندى. بۇل بايقاۋدىڭ ءبىر ەرەكشەلىگى – ءابىش كەكىلباەۆ – زاڭعار جازۋشى, ءابىش كەكىلباەۆ – زاماناۋي ويشىل, ءابىش كەكىلباەۆ – ايشىقتى اقىن, تاعى سول سياقتى سىرلى سۋرەتكەر, تاعىلىمدى تاريحشى دەگەندەي جيىرما قىرىن سانامالاپ, ارقايسىسىن ءبىر اتالىمعا اينالدىرۋىندا بولدى. وسى جيىرما اتالىمنىڭ ارقايسىسىنا, ءتىپتى ەكەۋ-ۇشەۋىنە ءتۇرلى ۇيىمدار, پارتيالار مەن جەكەلەگەن ازاماتتار دەمەۋشىلىك جاسادى. سونىڭ ىشىندە «اق جول» پارتياسى, ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, نازارباەۆ ۋنيۆەرسيتەت, اقىن ەسەنعالي راۋشانوۆ, ەلوردالىق دارىگەر قايرات ايدارحان ۇلى, تاعى باسقا دا ازاماتتار بار. الگى جيىرمادان بولەك پروزا جانە پوەزيا اتالىمى بويىنشا ەكى گران-پري سىيلىعى تاعى بار. ايتا كەتەيىك, بۇل ەكى گران-ءپريدىڭ ەكەۋى دە تانىمال قالامگەرلەرگە بۇيىردى. ونىڭ ءبىرى – جازۋشى, عالىم تۇرسىن جۇرتباي بولسا, ەكىنشىسى – اقىن سەرىك اقسۇڭقار ۇلى.
كونگرەستىڭ ەكىنشى كۇنىندە زيالى قاۋىم وكىلدەرى مەن ارنايى شاقىرىلعان قوناقتار ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە اشىلعان ءابىش كەكىلباي ۇلى اتىنداعى كابينەتپەن تانىستى, كىتاپحاناشىلارمەن كەزدەستى, ۇلتتىق پانتەونعا بارىپ, مارقۇمنىڭ ارۋاعىنا قۇران باعىشتادى. جالپى, ەكى كۇنگە سوزىلعان كونگرەستە تاعىلىمدى, مازمۇندى, قىزىقتى ءىس-شارالار كوپ بولدى.
