«بيىل ءبىزدىڭ ينستيتۋتتارىمىزدىڭ ساپاسى مەن ەكونوميكالىق ءوسۋ الەۋەتىنە زور ۇلەس قوسقان ازيا دامۋ بانكىمەن تىعىز ىنتاماقتاستىعىمىزعا 25 جىل تولدى», - دەدى ا. مامين.
پرەمەر-مينيستر قازاقستان ۇكىمەتىنىڭ الدىندا قازاقستان ەكونوميكاسىنىڭ باسەكەگە قابىلەتتىلىگىن ارتتىرۋ مىندەتى تۇرعانىن اتاپ ايتتى.
«ەكونوميكا سالالارىنىڭ ينستيتۋتسيونالدىق الەۋەتىن نىعايتۋ, رەفورمالاردى ۋاقىتىلى ازىرلەۋ جانە ءتيىمدى جۇرگىزۋ وتە ماڭىزدى. بۇل تۇرعىدا ادب ءبىز ءۇشىن اسا قۇزىرەتتى ينستيتۋتسيونالدىق سەرىكتەستەردىڭ بىرىنە اينالادى, ونىڭ اۋىل شارۋاشىلىعى, ينفراقۇرىلىم, تۋريزم جانە وڭىرلىك دامۋداعى تاجىريبەسىن بۇكىل الەم مويىنداعان جانە ول كوپتەگەن ەلدەردىڭ مەملەكەتتىك باعدارلامالارىنان كورىنىس تاپقان», - دەدى ا. مامين.
بۇل كەزدەسۋ قازاقستان مەن ادب-نىڭ ستراتەگيالىق پايىمداۋ جانە قازاقستاننىڭ باسەكەگە قابىلەتتىلىگىن بولجاۋ بويىنشا العاشقى بىرلەسكەن وي تالقىسى بولدى. وعان ۇكىمەت مۇشەلەرى, ۇلتتىق حولدينگتەر مەن دامۋ ينستيتۋتتارىنىڭ باسشىلارى قاتىستى.
قاتىسۋشىلار فورسايتتىڭ ادىستەمەسى مەن حالىقارالىق تاجىريبەسىن قاراستىردى, سونداي-اق 5 سەكتور بويىنشا جول كارتالارى مەن ءىس-قيمىل جوسپارىن تالقىلاپ, ازىرلەدى: اگروونەركاسىپتىك كەشەندى دامىتۋعا ارنالعان ينفراقۇرىلىم, تۋريزم ەكونوميكانىڭ باستى بولىگى رەتىندە, قالدىقتاردى وڭدەۋ ءۇشىن “اقىلدى قالا” قوسىمشاسى, قر يندۋستريالىق-يننوۆاتسيالىق دامۋى ءۇشىن فورسايت, وڭىرلىك دامۋ ارقىلى باسەكەگە قابىلەتتىلىكتى ارتتىرۋ.
1994 جىلدان بەرى ادب قازاقستاندا قارجىنى, ينفراقۇرىلىمدى, ەنەرگەتيكانى, كوممۋنالدىق قىزمەتتەر سەكتورىن جانە باسقا سالالاردى دامىتۋ بويىنشا مەملەكەتتىك جوبالاردى جۇزەگە اسىرۋعا $5,1 ملرد-تان اسا زايم ءبولدى. قازىرگى ساتتە $3,8 ملرد-قا 30-عا جۋىق جوبا تولىق جۇزەگە اسىرىلعان.
ادب $49 ملن-عا كولىك جانە اۋىل شارۋاشىلىعى كەشەندەرىندە, ءبىلىم بەرۋدە, دەنساۋلىق ساقتاۋدا, شاعىن جانە ورتا بيزنەستى دامىتۋدا جانە باسقا دا سالالاردا 100-گە جۋىق تەحنيكالىق كومەك جوباسىن قارجىلاندىردى. $628 ملن-نان استام قارجى كولىك سالاسىنداعى, كوممۋنالدىق قىزمەتتەردەگى, مال شارۋاشىلىعىنداعى جانە ت.ب. جەكە سەكتور جوبالارىن ىسكە اسىرۋعا ءبولىندى.
