سپورت • 08 قاراشا، 2019

دميتري شومكو: جانكۇيەرلەردەن كەشىرىم سۇرايمىن

90 رەتكورسەتىلدى

«استانا» ەۋروپا ليگاسىنىڭ توپتىق كەزەڭى اياسىندا «از الكمار» كومانداسىنا قارسى ويناپ، 0:5 ەسەبىمەن جول بەردى. كەزدەسۋ سوڭىندا ەلوردا كومانداسىنىڭ ۆيتسە-كاپيتانى دميتري شومكو جۋرناليستەردىڭ سۇراقتارىنا جاۋاپ بەردى. 

– ءبىرىنشى كەزەكتە ءوزىمىز ءۇشىن دە ۇياتتىمىز. ستاديونعا كەلىپ ءبىزدى قولداعان جانكۇيەرلەردەن كەشىرىم سۇرايمىن. ءيا، ءبىز جەڭىسكە جەتۋگە بارىنشا تىرىستىق، بىراق ول ازدىق ەتتى. ەكى-ءۇش گولدى ءوز قاتەلىگىمىزدەن كەيىن وتكىزىپ الدىق. چەمپيوندىققا قول جەتكىزىپ، توپتىق كەزەڭگە شىعۋ ارقىلى ءوز الدىمىزعا جۇكتەلگەن مىندەتتى ورىنداعانىمىزدى جاقسى تۇسىنەمىز. ەشقانداي سىلتاۋ ىزدەۋدەن اۋلاقپىن.

– ەكىنشى گولدان كەيىن كوماندا ويناۋدى مۇلدە دوعارعانداي كورىندى...

– ءبىز بارىنشا قىسىم كورسەتۋگە تىرىستىق. بىراق ول ناقتى قولىمىزدان كەلدى دەي المايمىن. قارسىلاس وعان مۇمكىندىك بەرمەدى. وتە لايىقتى كوماندا.

– «ەرتىسپەن» ويىن قالاي بولماق؟

– الاڭعا شىعىپ ويناۋ قاجەت. باسقاشا بولۋى مۇمكىن ەمەس. ويناعىسى كەلمەگەندەر شىقپاي-اق قويسىن. مەنىڭ ويىمشا ءدال قازىر فۋتبولشىلار ءبىرىنشى كەزەكتە بەس جىل بويى تەكتەن-تەك چەمپيون اتانباعانىن ءوز-وزدەرىنە دالەلدەگىسى كەلەدى. ءبىز كاسىبي فۋتبولشى بولعاندىقتان، سوڭىنا دەيىن كۇرەسەتىن بولامىز.

– سوڭعى جىلدارى اقىرعى تۋرعا دەيىن توپتان شاعاتىن مۇمكىندىك بولعان ەدى. ءدال قازىر ەشقانداي مۇمكىندىك قالماعانىن ەسكەرسەك، «مانچەستەر» مەن «پارتيزانعا» قارسى دايىندىق قالاي بولماق؟

– ءبىرىنشى ماقسات – الاڭعا شىعىپ فۋتبول ويناۋ. ءبىز دەڭگەيى جوعارى كلۋبتىڭ وكىلى ەكەندىگىمىزدى وتە جاقسى تۇسىنەمىز.

– الەۋمەتتىك جەلىلەردەگى جانكۇيەرلەر سوڭعى ەكى ءىرى جەڭىلىستەن كەيىن سىزدەردىڭ چەمپيون اتاعاندارىڭىزعا اسا رازى ەمەس...

– كوڭىلى تولمايتىن جاندار ءار كەزدە بولادى. «استانانىڭ» چەمپيون اتانعانىن كوبىسى قالامايدى دا. كورە المايتىندار بىزدەن الشاق ءجۇرسىن. مەن ەشكىمگە دە جاماندىق تىلەمەيمىن. ەگەر كىمدە-كىمنىڭ ساۋالى بولسا، كەلىپ قويسىن، جولداسىن. ال فۋتبولدى تىكۇشاقتان عانا كورگەن، ومىرلەرىندە ەشقاشان فۋتبول ويناماعان ساراپشىلارعا ايتارىم: وسى ىستەرىن جالعاستىرا بەرسىن. ءبىز ەگەر لايىق بولماساق، چەمپيون اتانباس ەدىك. ءبىز جايدان-جاي چەمپيون اتانباعانىمىزدى بارلىعىنا دالەلدەپ قويعانبىز. ەگەر چەمپيوندىققا لايىق باسقا كوماندا بار بولسا، «استانانىڭ» سوڭعى بەس جىلدا جەتكەن ناتيجەلەرىنە جەتىپ كورسىن. سوسىن سويلەسە جاتارمىز.

سوڭعى جاڭالىقتار

ۇقساس جاڭالىقتار