تاقىرىپ توڭىرەگىندە بايانداما جاساعان قازاقستان رەسپۋبليكاسىنىڭ اقپارات جانە قوعامدىق دامۋ ءمينيسترى داۋرەن اباەۆ جاستاردى مەملەكەتتىك قولداۋ شارالارى تۋرالى جان-جاقتى باياندادى.
اتاپ وتكەنىندەي, قازىرگى ۋاقىتتا ءداستۇرلى باعىتتار بويىنشا ىسكە اسىرىلاتىن جالپى شارالار جانە جاستار جىلىنا ورايلاستىرىلعان جاڭا باستامالاردى قامتيتىن ارنايى شارالار قولعا الىنۋدا. جالپى شارالارمەن 2 ميلليوننان استام وقيتىن جانە جۇمىس ىستەيتىن جاستار قامتىلعان. وعان جوعارى ءبىلىم الۋ ءۇشىن گرانتتار, ستيپەنديالار, تەگىن جاتاقحانالار كىرەدى.
ارنايى شارالارمەن 722 مىڭ ادام نەمەسە ەلدەگى ءاربىر بەسىنشى جاس قامتىلعان. وتكەن جىلمەن سالىستىرعاندا جاستار ساياساتىن قارجىلاندىرۋ كولەمى 40 ەسەگە وسكەن. بۇل كورسەتكىش العاش رەت ىشكى جالپى ءونىمنىڭ 0,5 پايىزىن قۇراپ وتىر. ال, ۆولونتەر جىلى اياسىندا بىرقاتار ناقتى جوبالاردى ىسكە اسىرۋ جوسپارلانعان.
قوسىمشا بايانداما جاساعان ءماجىلىس دەپۋتاتى گۇلشارا ابدىقالىقوۆا مەملەكەتتىك جاستار ساياساتىن ىسكە اسىرۋ ءۇشىن جىل سايىن رەسپۋبليكالىق بيۋدجەتتەن بولىنەتىن قارجىنىڭ كولەمى ارتىپ وتىرعانىن, مىسالى, تۇڭعىش پرەزيدەنت باستاماشىلىق جاساعان جاستار جىلىنىڭ جول كارتاسىنا 292 ملرد. تەڭگە كوزدەلگەنىن, 2020-2021 جىلدارى جاستار ساياساتىنا بولىنەتىن قارجى 321,8 ملرد تەڭگەگە وسەتىنىن ايتتى.
دەپۋتاتتىڭ ايتۋىنشا, «حالىق ۇنىنە قۇلاق اساتىن مەملەكەت» قاعيداتتارىن ىسكە اسىرۋ جاعدايىندا سايلاۋشىلار بۇل قاراجاتتاردى بيۋدجەتتىڭ ءاربىر تارماعى بويىنشا ءتيىمدى پايدالانعانى تۋرالى ەسەپ تالاپ ەتۋگە قۇقىلى.
ۇكىمەت ساعاتىنا توراعالىق ەتكەن پارلامەنت ءماجىلىسى سپيكەرىنىڭ ورىنباسارى گۇلميرا يسيمباەۆانىڭ ايتۋىنشا مەملەكەت تاۋەلسىزدىكتىڭ العاشقى كۇندەرىنەن باستاپ نەعۇرلىم وڭتايلى جاستار ساياساتىن ازىرلەۋ ءۇشىن كوپ جۇمىس اتقاردى.
زاڭناما جەتىلدىرىلدى, مەملەكەتتىك مەنەدجمەنتتەگى تاسىلدەر وزگەردى, مەملەكەتتىك باعدارلامالار, جوبالار قابىلداندى. بۇگىنگى كۇنى ەلىمىزدە جاستار قاتىسا الاتىن, جاستاردى قولداۋ بويىنشا ونداعان باعدارلامالار ىسكە اسىرىلۋدا. قازىرگى قازاقستان جاستارى اراسىندا سان-قىرلى تالانتتى, كرەاتيۆتى, تەرەڭ ويلايتىن, جاستايىنان ءوز ءىسىن اشقان, ەلىمىزگە, جەرىنە شىنايى بەرىلگەن جاس ادامدار كوپ.
بىرنەشە ساعاتقا سوزىلعان تالقىلاۋدان كەيىن گۇلميرا يستايبەكقىزى ۇكىمەت ساعاتىن قورىتىندىلاي كەلىپ, تومەندەگى ناقتى ۇسىنىستاردى اتاپ ءوتتى. ولار: جول كارتاسىنىڭ ىسكە اسىرىلۋىن ۇكىمەت دەڭگەيىندە مۇقيات, جۇيەلى تۇردە باقىلاۋ, جاستارعا ارنالعان قولدانىستاعى باعدارلامالار تۋرالى جاستاردىڭ حاباردار بولۋىن قامتاماسىز ەتۋ.
جاستاردىڭ باسىم كوپشىلىگى (75,7%) اتالعان باعدارلامالارعا قاتىسپاعان. جاستار رەسۋرستىق ورتالىقتارى ءار وبلىستا, قالادا, رەسپۋبليكالىق ورتالىقتا جۇمىس ىستەيدى. بۇل رەتتە, سۇراۋ جۇرگىزىلگەن جاستاردىڭ 57,1 %-ى جاستار رەسۋرستىق ورتالىقتارى تۋرالى ەشتەڭە بىلمەيدى, تەك 4,7%-ى وسى ورتالىقتارعا جۇگىنگەن جانە 7 %-ى جاستارمەن جۇمىس جونىندەگى ۇيىمداردىڭ كورسەتىلەتىن قىزمەتتەرىن پايدالانعان.
اتاپ وتىلگەندەي, 500-دەن استام جاستار ۇيىمى جۇمىس ىستەپ تۇرسا دا, جاستاردىڭ ۇكىمەتتىك ەمەس ۇيىمداردىڭ قىزمەتىنە قاتىسۋ دەڭگەيى تومەن.
سونداي-اق, NEET-ءتىڭ تومەن كورسەتكىشتەرىنە قول جەتكىزگەن وبلىستارداعى وڭىرلىك تاجىريبەنى مۇقيات زەردەلەپ, وسى تاجىريبەنى جوعارى كورسەتكىشتەرى بار وبلىستا قولدانۋ مۇمكىندىكتەرىن باعالاۋ قاجەت. NEET جاستارى – ەرەكشە نازار اۋدارۋدى تالاپ ەتەتىن ماڭىزدى سانات.
سوندىقتان, NEET ساناتىنداعى جاستارعا قاتىستى بىرىڭعاي اقپاراتتىق بازا مەن دەرەكتەردى رەتكە كەلتىرۋ قاجەت. اۋىلداعى جاستاردى قولداۋدىڭ ناقتى شارالارى ءبارى جاستار ءۇشىن ەمەس, جاستارمەن بىرگە اسىرىلۋى قاجەت. وتىرىس سوڭىندا ارنايى ۇسىنىمدار قابىلداندى, ول اپتانىڭ سوڭىنا دەيىن پىسىقتالاتىن بولادى.
