جوبانى جاساندى ينتەللەكت جانە تسيفرلىق دامۋ مينيسترلىگى جۇزەگە اسىردى. بۇل باستاما تالشىقتى-وپتيكالىق بايلانىس جەلىلەرىن تارتۋ نەمەسە ۇيالى بايلانىس بازالىق ستانتسيالارىن ورناتۋ ەكونوميكالىق جانە تەحنيكالىق تۇرعىدان مۇمكىن ەمەس شالعاي ءارى حالقى از اۋىلداردى ينتەرنەتپەن قامتۋعا باعىتتالعان. وسى ماقساتتا اۋىلدىق ەلدى مەكەندەردە سپۋتنيك بايلانىس جۇيەلەرى قولدانىلعان.
2023 جىلدان باستاپ «KazSat» سپۋتنيكتەرى ارقىلى 176 اۋىل ينتەرنەتكە قوسىلدى. ال قالعان 328 اۋىل بەيگەوستاتسيونارلىق سپۋتنيك جۇيەلەرى نەگىزىندە «OneWeb» تەحنولوگياسى ارقىلى, «Jusan Mobile» وپەراتورىنىڭ قاتىسۋىمەن ينتەرنەتكە قول جەتكىزدى. ناتيجەسىندە, ۇلتتىق جوبا اياسىندا جوسپارلانعان 504 اۋىلدىڭ بارلىعى سپۋتنيكتىك ينتەرنەتپەن تولىق قامتاماسىز ەتىلدى.
جوبانىڭ ىسكە اسىرىلۋى اۋىل تۇرعىندارىنا ونلاين ءبىلىم الۋعا, ەلەكتروندىق مەملەكەتتىك قىزمەتتەردى پايدالانۋعا, تەلەمەديتسينا مۇمكىندىكتەرىنە قول جەتكىزۋگە, سونداي-اق جاقىندارىمەن ۇزدىكسىز بايلانىس ورناتۋعا جول اشىلدى.
