كوفەحانانىڭ «بوتا» اتالۋىنىڭ وزىندە ءمان بار. «بوتانىڭ» ءونىمى – تۇيە سۇتىنەن دايىندالىپ, تارى قوسىلعان ەرەكشە ءدامدى كوفە. كاسىپكەر اسەم مۇحاتبەكوۆانىڭ ايتۋىنشا, جاڭا ءونىمدى ازىرلەۋ بارىسىندا بىرنەشە نۇسقا دايىندالىپ, سىنامادان وتكەن. العاشىندا تۇيە ءسۇتىن قايناتىپ, كەيىن سالقىنداتىپ دايىنداۋ تاسىلدەرى قارالدى. ناتيجەسىندە, ءسۇتتى سالقىنداتۋ ارقىلى جاسالعان ءادىس ەڭ ءتيىمدى دەپ شەشىلىپتى.
«كوفەحانا بىلتىر 25 شىلدە كۇنى اشىلدى. «بوتا» اسسوتسياتسياسى جىلى, جاعىمدى ءارى ۇلتتىق مادەنيەتىمىزگە جاقىن بولعاندىقتان, كوفەحانانىڭ تۇجىرىمداماسىنا تولىق سايكەس كەلدى. وسى اتاۋدان كەيىن تۇيە سۇتىنەن ءونىم جاساۋ يدەياسى تۋىندادى. تۇيە ءسۇتىن ءارتۇرلى تاسىلمەن دايىنداپ كورىپ, سىنادىق. ناتيجەسىندە, ەرەكشە ءارى ۇيلەسىمدى ءدام تاپتىق. كەيىن تۇيە سۇتىنەن كوفە دايىنداپ, وعان تارى جانە ءشاربات قوسۋ ارقىلى جاڭا ءدام قالىپتاستىردىق», دەدى اسەم مۇحاتبەكوۆا.
قازىر مۇندا ەرەكشە كوفەنىڭ ءدامىن تاتۋعا كەلۋشىلەر سانى ارتىپ كەلەدى. ولاردىڭ شامامەن تۇگەلگە جۋىعى جاڭا ونىمگە وڭ باعاسىن بەرىپ, ريزاشىلىعىن بىلدىرەدى ەكەن. سەبەبى تابيعي تاعامدى اڭسايتىندار, تۇيە ءسۇتىنىڭ پايدالى قاسيەتتەرى, لاكتوزانىڭ جەڭىل ءسىڭۋى جانە قۇرامى تۋرالى بىلەتىندەر كوفەنىڭ تۇراقتى تۇتىنۋشىسىنا اينالىپ ۇلگەرگەن.
ماڭعىستاۋ وبلىسى
