فوتو: t.me/qr_tjm
بۇگىن وبلىستىق توتەنشە جاعدايلار دەپارتامەنتىنىڭ «101» جەدەل باسقارۋ پۋلتىنە قۇرىلىس ءجۇرىپ جاتقان كوپىردە ءورت شىققانى تۋرالى حابارلاما تۇسكەن. ءورت قۇرىلىس نىسانىنىڭ جوعارى بولىگىندە تۇتانىپ, جىلۋ وقشاۋلاعىش ماتەريالدار مەن اعاش كونسترۋكتسيالارىن شارپىعان.
ء«ورت وشاعى جەر دەڭگەيىنەن شامامەن 30 مەتر بيىكتىكتە ورنالاسىپ, جاعدايدى ايتارلىقتاي قيىنداتقان. سوعان قاراماستان, وقيعا ورنىنا جەدەل جەتكەن تجم-ءنىڭ ءورت ءسوندىرۋ بولىمشەلەرى قىسقا ۋاقىت ىشىندە جالىندى اۋىزدىقتاپ, ونىڭ كوپىردىڭ بارلىق قۇرىلىمىنا تارالۋىنا جول بەرمەدى», دەلىنگەن حابارلامادا.
جەدەل ءارى ۇيلەسىمدى ارەكەتتىڭ ناتيجەسىندە ءورت تولىق ءسوندىرىلدى. الدىن الا مالىمەت بويىنشا, وقيعا سالدارىنان زارداپ شەككەندەر جوق.
قازىرگى ۋاقىتتا ءورتتىڭ شىعۋ سەبەپتەرى انىقتالىپ جاتىر.
ايتا كەتەيىك, بۇعان دەيىن استانا قالاسىنداعى ەكى قاباتتى ءدامحانادان ءورت شىققانىن حابارلاعان ەدىك.
