فوتوكورمەنىڭ اشىلۋ سالتاناتىندا ۇلتتىق مۋزەيدىڭ ديرەكتورى ارىستانبەك مۇحامەدي ۇلى قۇتتىقتاۋ ءسوز سويلەدى. ال اقش-تىڭ قازاقستانداعى توتەنشە جانە وكىلەتتى ەلشىسى ۋيليام موزەر مەن «National Geographic Qazaqstan» جۋرنالىنىڭ عىلىمي كەڭەسشىسى ءادىل احمەتوۆ كورمە جايىندا جيىلعان جۇرتشىلىققا ءبىرشاما ماعلۇمات بەردى.
كورمەنى ۇيىمداستىرۋشىلاردىڭ ايتۋىنشا, اقش ەلشىلىگى ۇلتتىق مۋزەيمەن 2014 جىلدان بەرى ىنتىماقتاستىق قارىم-قاتىناس ورناتقان. سونىڭ ناتيجەسىندە ەلشىلىك «تۋعان جەر» كورمەسىنىڭ وتۋىنە دەمەۋشىلىك كورسەتكەن. اتالعان كورمە امەريكالىقتار مەن قازاق مادەنيەتى اراسىنداعى ۇقساستىقتى اشىپ كورسەتۋگە ارنالعان بولاتىن. الداعى 2020 جىلى اقش-تىڭ قازاقستانداعى ەلشىلىگى ۇلتتىق مۋزەيمەن بىرلەسىپ «التىن ادام» كورمەسىن امەريكا قۇراما شتاتتارىندا وتكىزۋدى جوسپارلاپ وتىرعان كورىنەدى. سونداي-اق ەلشىلىكتىڭ National Geografic ۇيىمىمەن دە ىسكەرلىك قارىم-قاتىناس ورناتقانىن اتاپ وتكەن ءجون.
«گراند-كانون مەن شارىن شاتقالىنىڭ كەز-كەلگەن ادامدى ءتانتى ەتەتىن اسەمدىگىنەن باستاپ امەريكالىقتار مەن قازاقتار اراسىنداعى ەجەلگى اتبەگىلىك داستۇرگە دەيىنگى ۇقساستىق ەكى ەل اراسىندا ءبىز ويلاعاننان دا ورتاق نارسەلەر كوپ ەكەنىن بىلدىرەدى. سوندىقتان ءبىز كورمەنىڭ تاقىرىبىن ء«سىز ويلاعاننان دا جاقىن» دەپ اتادىق» – دەدى اقش-تىڭ قازاقستانداعى توتەنشە جانە وكىلەتتى ەلشىسى ۋيليام موزەر.
«National Geographic Qazaqstan» جۋرنالىنىڭ وكىلى وسىنىڭ الدىندا دا اقش ەلشىلىگىمەن بىرلەسىپ ۇيىمداستىرعان «National Geograhpic تاريحىنداعى 50 سۋرەت» اتتى كورمەنىڭ ءساتتى وتكەنىن اتاي وتىرىپ, بۇل كورمەنىڭ دە ماقساتى ەكى ەل اراسىنداعى ەكونوميكالىق, گەوگرافيالىق ءھام مادەني ۇقساستىقتاردى جانە قوس ەلدىڭ اينىماس سەرىكتەستىگى مەن بىرلىگى بەكەم ارىپتەس ەكەنىن جۇرتشىلىققا جەتكىزۋ ەكەنىن ايتتى.
جوسپار بويىنشا كورمەنى كورەرمەندەر قازان ايىنىڭ سوڭىنا دەيىن ۇلتتىق مۋزەيدە, ال قاراشا ايىندا ەلوردامىزداعى «MegaSilkWay» جانە الماتىداعى «Mega Almaty» ساۋدا-ويىن-ساۋىق ورتالىقتارىندا تاماشالاي الادى.
ايگۇل سەيىل,
«Egemen Qazaqstan»
