ءمۇسىنشى شوقان تۋىندىلىرى جۇرتقا كوپتەن تانىس. تەك ءوز ەلىمىزدە عانا ەمەس, اقش, فرانتسيا, بەلگيا, يتاليا, شۆەيتساريا, ۇلىبريتانيا اۋستريا مۇراجايلارى مەن كورنەكتى ورىندارىندا كورمەلەرىن وتكىزىپ, تىڭ تۋىندىلارىمەن تالايلاردى ءتانتى ەتكەنىن ايتا كەتەلىك. بەلگىلى شەبەردىڭ قولىنان شىققان مۇسىندەرىنىڭ ءبىر ەرەكشەلىگى – ەستەتيكالىق تالعامعا باي. كوز سالىپ, كوڭىل توقتاتقان ءار ادام ءوزى وي قورىتىپ, فيلوسوفيالىق يىرىمدەرىنە ۇڭىلۋىنە مۇمكىندىك بەرەتىندىگىندە جاتسا كەرەك.
كورمەنىڭ اشىلۋ سالتاناتىندا بەلگىلى ونەر قايراتكەرلەرى, قالامگەرلەر شوقان شىعارماشىلىعىنا جان-جاقتى توقتالدى. ونىڭ تۋىندىلارى نەگىزىنەن قولادان, اليۋمينيدەن, اعاشتان, ءمارمار تاستاردان جاسالعان كامەرالىق جۇمىستار ەكەنىنە دە جەتە ءمان بەردى. اسىرەسە ءار مۇسىنىندە شىعىس پەن ەۋروپالىق مادەنيەت ۇشتاسا كەلىپ, ۇلتتىق دۇنيەنىڭ التىن ارقاۋى سالتانات قۇراتىنىن باسا ايتىپ جاتتى. سوعان دالەل رەتىندە, اساۋ تولقىننىڭ ۇستىندە قايىقپەن كەلە جاتقان قازاقتىڭ ءۇش ابىز قارياسىنىڭ ەرەكشە بولمىسىن اتاپ وتۋگە بولادى. اتى ايتىپ تۇرعانداي, بۇل – قازاق بىرلىگىنىڭ ايقىن كورىنىسى ەكەندىگىن ايتقىزباي ۇقتىرادى. سول سەكىلدى, ارعى تاريحتان تامىر تارتاتىن «توميريس», «ساق جاۋىنگەرى», «اتيللا», ۇلت ونەرىنىڭ جاۋھارى سانالاتىن «ساۋكەلە», «قوبىز», «قاريا» سىندى وزگە دە مۇسىندەرىن ەرەكشە اتاۋعا بولادى. اسىرەسە قولا, اليۋميني, اعاش, تاس قوسىندىلارىنان جاسالعان «كەربەز استانا» ءمۇسىنى جۇرتشىلىقتىڭ ەرەكشە ءىلتيپاتىنا بولەندى. كورەرمەننىڭ كوز جاۋىن العان اتالعان كورمە ءبىر اي بويى ەلوردالىقتار نازارىنا ۇسىنىلىپ, ودان كەيىن الماتىدا جالعاسىن تابادى.
قاسىمجومارت داۋلەت ۇلى
