بۇل جولى كوماندا نيدەرلاندقا جاراقاتىنا بايلانىستى نەگىزگى قۇرامداعى بىرنەشە فۋتبولشىنى اپارعان جوق. اتاپ ايتار بولساق, «استانانىڭ» «موتورى» سانالاتىن حورۆاتيالىق جارتىلاي قورعاۋشى مارين توماسوۆ, قازاقستاندىق كوماندانى العا سۇيرەيدى دەپ سەنگەن كونگولىق شابۋىلشى فيرمين مۋبەلە, يسلانديالىق جارتىلاي قورعاۋشى رۋنار سيگۋرونسسون جانە چەرنوگوريالىق قورعاۋشى جاركو توماشەۆيچ.
نيدەرلاندتىڭ گااگا قالاسىنداعى «كارس دجينس» ستاديونىندا وتكەن ويىندا باس باپكەر رومان گريگورچۋك جاسىل الاڭعا ءبىرىنشى مينۋتتان باستاپ فۋتبول ويناماعانىنا ءبىر اپتا بىلاي تۇرسىن, بىرنەشە ايدىڭ ءجۇزى بولعان فۋتبولشىلارعا سەنىم ارتتى. جۇمساقتاپ ايتقاندا, الاڭعا ەكىنشى قۇرام ويىنشىلارىن شىعاردى. بۇل كەزدەسۋدە ەل چەمپيوناتىنداعى 30 تۋردا الاڭعا نەبارى 5 رەت شىققان شابۋىلشى ديدار جالمۇقان ەۋرودودا ويىندارىندا العاشقى كەزدەسۋىن وتكىزدى. بەس ويىندا 164 مينۋت ويناعان جالمۇقان از كومانداسىنا قارسى تولىق ءبىر ماتچ وتكىزدى. ويىن تاجىريبەسى جوق فۋتبولشى حالىقارالىق دەڭگەيدەگى ەۋروپا ليگاسىندا قالاي جاسىنداي جارقىلداماق؟ ال ەۋرودودا ويىندارىندا سوڭعى رەت شىلدە ايىندا شىعىپ, وندا دا 9 مينۋت ويناعان, ەل چەمپيوناتىنداعى سوڭعى ويىنىن 19 قىركۇيەكتە وتكىزگەن سەرىكجان مۇجىقوۆتان كىم قانداي شەدەۆر كۇتتى؟ سونىمەن قاتار ءبىر ويىن ويناپ, ەكى ماتچ دەمالاتىن شابۋىلشى يۋري پەرتسۋح پەن قورعاۋشى ابزال بەيسەبەكوۆ, 100 مۇمكىندىكتىڭ تەك بىرەۋىندە عانا گول سوعاتىن شابۋىلشى رانگەلو يانگا «استانانى» قالايشا ورگە سۇيرەسىن؟ وسىنداي قۇراممەن الاڭعا شىققان فۋتبولشىلاردىڭ جەڭىلەتىنى انىق ەدى. سوندىقتان بۇل جەڭىلىسكە اسا قاتتى تاڭعالۋدىڭ رەتى جوق سياقتى.
ءبىرىنشى تايمنىڭ وزىندە «استانا» ءماجبۇرلى تۇردە ەكى ويىنشىسىن الماستىرعانى دا ويىنعا كەرى اسەرىن تيگىزبەي قويمادى. ماتچ باستالا سالىسىمەن ويىن تىزگىنىن ءوز قولدارىنا العان الاڭ يەلەرىنىڭ بىرقاتار قاۋىپتى شابۋىلىن بىردە قورعاۋشىلار, بىردە قىراعى قاقپاشى ەريچ قايتارىپ جاتتى. كەزدەسۋدىڭ 26-مينۋتىندا ەريچ جاراقات الىپ, ورنىنا الەكساندر موكين شىققاننان كەيىن ونسىز دا ويىنى جۇرمەي جاتقان جەرلەستەرىمىز ودان بەتەر تىعىرىققا تىرەلدى. ۇرىمتال ءساتتى ءمۇلت جىبەرمەيتىن «از الكمار» كومانداسىنىڭ فۋتبولشىلارى 39-مينۋتتا پەنالتيدەن گول سوعىپ كەتتى. 11 مەترلىك ايىپ دوبىن 21 جاستاعى تيون كوپمەينەرس ءساتتى ورىندادى. ارادا 4 مينۋت وتكەندە 18 جاستاعى مايرون بوادۋ قاقپامىزعا ەكىنشى گولىن سوعىپ كەتتى.
ەكىنشى تايمدا باس باپكەردەن اقىل-كەڭەس تىڭداعان ءبىزدىڭ جىگىتتەر ويىندا بەتبۇرىس جاسايتىن شىعار دەپ ۇمىتتەنگەن ەدىك. بىراق «استانا» ويىنشىلارى ءبىز كۇتكەننەن دە ناشار ويىن كورسەتتى. ماتچتىڭ 77-مينۋتىنان باستاپ الاڭ يەلەرى تاراپىنان گولداردىڭ تيەگى اعىتىلدى. از فۋتبولشىلارى اينالدىرعان 15 مينۋتتىڭ ىشىندە قاقپامىزعا ءتورت گول سوقتى. تەن كوپمەينەرس ەكىنشى رەت پەنالتيدەن گول سوقسا, 20 جاستاعى كەلۆين ستەنگس, 19 جاستاعى جاپونيالىق يۋكيناري سۋگاۆارا جانە 23 جاستاعى ۋسساما يدريسسي ءبىر-ءبىر گولدىڭ اۆتورى اتاندى. گول سوققان ويىنشىلاردىڭ ەسىمىنىڭ الدىنا جاس مولشەرىن بەكەرگە جازعان جوقپىز. «استانا» قاقپاسىنا قاي جاستاعى فۋتبولشىلاردىڭ گول سوققانىن بىلە وتىرىڭىزدار.
ءسوز سوڭىندا مىناداي قىزىقتى دەرەكتى بولىسە كەتكەن ءجون شىعار. 2017 جىلى «سەلتيككە» قارسى وتكەن ماتچتا «استانا» قاقپاسىن قورعاعان الەكساندر موكين سول ويىندا قاقپاسىنا 5 گول جىبەرىپ العاننان كەيىن كەشە 2 جىلدىق ۇزىلىستەن سوڭ ەۋروكۋبوك ويىندارىنا الاڭعا العاش رەت شىققان ەدى. قىرسىق ءبىر اينالدىرعاندا شىر اينالدىرادى دەگەندەي, بۇل جولعى ماتچتا موكين قاقپاسىنا 6 گول وتكىزىپ, انتيرەكورد ورناتتى.
