قوعام • 28 قازان، 2019

مەكتەپ الەمىن وزگەرتەتىن ۇستازدار

65 رەتكورسەتىلدى

وسىنداي تاقىرىپتا وتكەن حالىقارالىق كونفەرەنتسيادا الەمنىڭ 17 مەملەكەتىنەن جينالعان ءبىلىم بەرۋ سالاسىنىڭ ماماندارى باس قوستى. 2 مىڭنان اسا دەلەگات كەلگەن شارانىڭ اشىلۋىنا ەلوردا اكىمى التاي كولگىنوۆ، ءبىلىم جانە عىلىم ۆيتسە-ءمينيسترى شولپان كارينوۆا جانە «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتورايىمى كۇلاش ءشامشيدينوۆا قاتىستى.

ەكى كۇنگە سوزىلعان اۋقىمدى جيىننىڭ اشىلۋىندا ءسوز ال­عان ا.كولگىنوۆ كونفەرەنتسيا تاقى­رىبىنىڭ وتە سالماقتى، اسا ماڭىزدى ەكەنىن اتاپ ءوتتى. «مەم­لەكەت باسشىسىنان باستاپ، ۇكىمەتىمىز ءبىلىم بەرۋ سالاسى­نا جانە ونداعى ماماندارعا اي­رىقشا كوڭىل بولەدى. سونىڭ ءبىر دالەلى – ەلباسى نۇرسۇلتان نازارباەۆتىڭ باستاماسىمەن «پەداگوگ مارتەبەسى تۋرالى» زاڭ جوباسىنىڭ ازىرلەنۋى. بۇل شەشىمدى قوعام بولىپ قولداپ وتىرمىز. پرەزيدەنت قاسىم-جومارت توقاەۆ بيىلعى تامىز كەڭەسىندە مەملەكەتتىڭ ءبىلىم سالاسىنا ەرەكشە نازار اۋداراتىنىن كورسەتىپ، ۇكىمەتكە ونداعى تۇيتكىلدى ماسەلەلەردىڭ ءتۇيىنىن تارقاتۋدى تاپسىردى. مۇعالىم – قوعامداعى باستى تۇلعا. ونسىز ەڭ كەرەمەت كىتاپ وقىلماي، تاماشا وقۋ جابدىعى قولدانىلماي قالادى. سوندىقتان ولاردىڭ ەڭبەگى باعالانۋى كەرەك»، دەدى.

ال ءمينيسترىڭ ورىنباسارى وسىمەن 11-ءشى رەت وتكىزىلىپ وتىرعان كونفەرەنتسيانىڭ ءبىلىم بەرۋ جۇيەسىندەگى وزەكتى ماسە­لەلەردى تالقىلايتىن يننوۆا­تسيالىق الاڭعا اينالعانىن ايتتى. ونىڭ ويىنشا، بۇل شا­رانىڭ ماڭىزى جاڭا باعىتتار­دى ايقىنداۋ جولىندا مامان­دار­دىڭ تىڭ تەحنولوگيالار مەن جاڭا ءادىس-تاسىلدەر تۋرالى تاجىري­بە­لەرىمەن بولىسۋىندە بولماق. سون­داي-اق ش.كارينوۆا ءوز سوزىندە وتاندىق ءبىلىم بەرۋ جۇيەسىنىڭ جاڭا مودەلىن قالىپتاستىرۋدا ەلىمىزدەگى بارلىق مەكتەپتەرگە ۇلگى بولىپ كەلە جاتقان نازارباەۆ زياتكەرلىك مەكتەپتەرىنە، ونداعى ارىپتەستەرىنە العىسىن ءبىلدىرىپ، جاۋاپتى جۇمىستارىنا جەمىس تىلەدى.

جيىنداعى باياندامالار لەگىن باستاعان ك.ءشامشيدينوۆا بيىلعى پلەنارلىق وتىرىس­تار، سەكتسيالار جانە شەبەرلىك ساباق­تارىندا مەكتەپ الەمىن جاڭعىر­تاتىن مۇعالىمدەر تۋرالى پىكىر الماسۋ بولاتىنىن جەت­كىزدى. كونفەرەنتسيا تاقىرى­بىنا نەگىزدەلگەن بايانداماسىندا «نازارباەۆ زياتكەرلىك مەك­­تەپتەرى» دببۇ باسقارما ءتورا­­يىمى: «قازىرگى زامان تالاپ­­تارىنا ساي  مەكتەپ الەمىن ۇنە­مى جاڭعىرتىپ وتىراتىن  مۇعا­لىم قانداي بولۋ كەرەك؟ بۇعان تەك ۋاقىتتى ءتيىمدى پايدالانا بىلەتىن، مىندەتتەردى ناقتى انىقتاي الاتىن، ولاردى شەشۋدىڭ وڭتايلى جولدارىن تەز تاباتىن، قوعامعا قىزمەت ەتىپ، سول قىزمەتى ءۇشىن تولىق جاۋاپكەرشىلىك الا الاتىن كوشباسشى مۇعالىمنىڭ عانا شاماسى جەتەدى. ءۇش جىل بويى جالپى ءبىلىم بەرەتىن جەتەكشى مەكتەپتەرمەن جۇمىس ىستەۋ بارىسىندا مىندەتتى پان­دىك جانە پەداگوگيكالىق ءبىلىم مەن داعدىلاردىڭ ماڭىزدى­لى­عىمەن قاتار وقىتۋ پروتسە­سىندە مۇعالىمنىڭ جەكە تۇلعا­لىق قاسيەتتەرى مەن وزىق يننوۆا­تسيالىق تاجىريبەلەردى قولدا­نىپ، وقىتۋ ادىستەمەسى مەن ستراتە­گيالارىن بايىتا الاتىن قۇزىرەت­تىلىك باسىمدىلىعىنىڭ ارتا باستاعانىن بايقادىق»، دەيدى. ونىڭ ايتۋىنشا، مۇعالىم ەڭ الدىمەن وزىنە-ءوزى سەنۋى ءتيىس.

كونفەرەنتسيا اياسىندا ۇلى­بريتانيا، ارمەنيا، اقش، رەسەي، نورۆەگيا، ۆەنگريا، نيدەرلاند، سينگاپۋر ەلدەرىنەن كەلگەن حالىقارالىق دارەجەدەگى ساراپ­شىلار، وتاندىق بەلدى ءبىلىم بەرۋ ورتالىقتارىنىڭ وكىلدەرى مەن نازارباەۆ زياتكەرلىك مەك­تەپتەرىنىڭ ءار وڭىرلەردەگى پەداگوگتارى ءتۇرلى تاقىرىپتا سەمينار، شەبەرلىك ساباقتارىن وتكىزدى. شارا ءبىلىم بەرۋ سالاسى قىزمەتكەرلەرىنىڭ تاجىريبە الاڭىنا اينالدى.

 

سوڭعى جاڭالىقتار

ۇقساس جاڭالىقتار