جيىننىڭ كۇن تارتىبىندە بىرقاتار ماسەلەلەر قارالدى. اۋەلى وبلىس تۇرعىندارىنىڭ تۇرمىستىق تابىسىن جاقسارتۋ جوباسىنىڭ ءوڭىر بويىنشا اتقارىلۋ بارىسى سارالاندى. جامبىل وبلىستىق اۋىل شارۋاشىلىق باسقارماسىنىڭ باسشىسى بەرىك نىعماشەۆتىڭ مالىمدەۋىنشە, جوبا اياسىنداعى پيلوتتىق ون اۋىلدىق وكرۋگتەر بويىنشا بەكىتىلگەن جۇمىس الگوريتمى جوسپارعا ساي ورىندالۋدا. باسقارما باسشىسى جوباعا قاتىسۋشىلاردىڭ وتىنىمدەرىن قابىلداۋدىڭ كۇندەلىكتى جوسپارى بەلگىلەنگەنىن ايتىپ, اتالعان باعىتتا قارقىندى جۇمىستار جۇرگىزىلىپ جاتقانىن جەتكىزدى. بۇگىندە تۇرعىنداردان «تاراز» الەۋمەتتىك كاسىپكەرلىك كورپوراتسياسىنا 1020 قۇجات وتكىزىلىپ, ونىڭ 947-ءسى قابىلدانعان. ال, 73 قۇجات قايتا قارالۋعا جىبەرىلگەن. سونداي-اق, وبلىستا ساتىپ الىناتىن مال باسىنىڭ, تۇقىم مەن تىڭايتقىشتىڭ, جەم-ءشوپتىڭ جوسپارلى كورسەتكىشى مەن قۇرىلعان كووپەراتيۆتەردىڭ قاجەتتى تەحنيكامەن قامتىلۋ جۇيەسى دە ويداعىداي ورىندالۋدا. ءوز سوزىندە اسقار مىرزاحمەتوۆ ۇكىمەتتە بەكىتىلگەن ءتيىستى قاراجاتتىڭ كەلەر ايدىڭ باسىندا تۇسەتىنىن ايتا كەلىپ, قۇجات قابىلداۋ شارالارى ءبىرىنشى قاراشاعا دەيىن تولىعىمەن اياقتالۋ كەرەكتىگىن ەسكەرتتى. ول بويىنشا جوسپاردان كەشىككەن بىرقاتار اۋدانداردىڭ جۇمىستارى سىنعا الىنىپ, اۋدان اكىمدەرىنە ناقتى تاپسىرمالار جۇكتەلدى. اكىم قۇرىلعان كووپەراتيۆتەردىڭ تەحنيكا بازالارىنىڭ ورنالاسۋ ايماعىنا كوڭىل ءبولىپ, الداعى ۋاقىتتا اۋىلدىق وكرۋگتەر ماڭىنان شاعىن قايتا وڭدەۋ زاۋىتتارىن سالۋدىڭ ماڭىزدىلىعىنا دا نازار اۋداردى. ول بويىنشا جوسپارلى جۇمىستاردى بۇگىننەن باستاپ جۇيەلەي بەرۋ كەرەكتىگىن باسا ايتتى.
باسقوسۋداعى ەكىنشى ماسەلە بويىنشا جامبىل وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى گۇلدانا جاۋىنبەكوۆا ءسوز الىپ, اعىمداعى جىلدىڭ قاڭتار-قىركۇيەك ايلارىندا وبلىس ەكونوميكاسىنىڭ بارلىق سالالارىندا وڭ كورسەتكىشتەر ورىن الىپ وتىرعانىن جەتكىزدى. اتاپ ايتقاندا, ەكونوميكالىق ءوسىم ءبىرىنشى جارتىجىلدىق قورىتىندىسىمەن 3,3 پايىزدى قۇراسا, قىسقا مەرزىمدى ەكونوميكالىق ينديكاتور 105,6 پايىز دەڭگەيىندە قالىپتاسقان. سول سەكىلدى ونەركاسىپ سالاسىنداعى ءوسىم 5,7 پايىزعا, اۋىل شارۋاشىلىعىنىڭ جالپى ءونىمىنىڭ ءوسىمى 5,0 پايىزعا, نەگىزگى كاپيتالعا سالىنعان ينۆەستيتسيا كولەمى 17,3 پايىزعا, حالىقتىڭ ورتا ەسەپپەن جان باسىنا شاققانداعى اقشالاي تابىستارى 12,2 پايىزعا ارتقان. ءوز كەزەگىندە اكىم توعىز ايدىڭ قورىتىندىسى بويىنشا وبلىستىڭ ەكونوميكالىق دامۋى ۇكىمەتتە وڭ باعالانعانىن ايتىپ, جىل سوڭىنا دەيىن وسى جوعارى ديناميكانى ساقتاپ تۇرۋعا بارىنشا كۇش سالۋ كەرەكتىگىن ەسكەرتتى.
