اتالعان جوبا بويىنشا ەلىمىزدىڭ بارلىق وڭىرىنەن جاستار وزدەرى تۇراتىن اۋداننىڭ نەمەسە اۋىل-ايماقتىڭ تىنىس-تىرشىلىگىنە وزگەرىس الىپ كەلۋگە تىرىسقان ەكەن. قاتىسۋشىلار كوشە سپورتىنا ارنالعان الاڭدى جابدىقتاۋ, جاڭا ايالداما تۇرعىزۋ, قوقىس تاستايتىن جاشىكتەر ورناتۋ, اۋىل اللەياسىنا جارىق تارتۋ سياقتى ءوز اۋلاسىنا قاجەتتى ءتۇرلى ۋربانيستيكالىق شەشىمدەردى ۇسىنعان. ناتيجەسىندە 600 جاستىڭ 100 جوباسىنا شاعىن گرانت بەرىلەتىن بولدى. اتالعان جوبانى ۇيىمداستىرۋعا ازاماتتىق باستامالاردى قولداۋ ورتالىعى مەن جاستار قىزمەتكەرلەر قاۋىمداستىعى اتسالىستى.
«بۇل جوبادا ءبىز ەكى ماقساتتى كوزدەيمىز. ءبىرىنشىسى قىزمەتكەر جاستاردىڭ قۇزىرەتتىلىگىن ارتتىرۋ بولسا, ال ەكىنشىسى – جاستاردىڭ الەۋمەتتىك جوبالارىنا قولداۋ كورسەتۋ. شىلدە ايىندا 600 جاستى ىرىكتەپ الدىق. ولار 5-6 كىشىگىرىم توپتارمەن ءوز جوبالارىن دايىندادى. ءبىز جاستاردىڭ ازاماتتىق ۇستانىمىن دامىتىپ, وزدەرى تۇرىپ جاتقان جەرگىلىكتى مەكەندەردەگى الەۋمەتتىك, ەكولوگيالىق ماسەلەلەردى بايقاپ, شەشىمدەرىن ۇسىنعانىن كوزدەدىك. وسىلايشا توپتار وڭىرلەردەگى تالىمگەرلەرىمەن بىرگە وزدەرىن قورشاعان ورتاعا قانداي دا ءبىر وزگەرىس الىپ كەلۋگە تىرىستى», دەدى جاستار قىزمەتكەرلەر قاۋىمداستىعىنىڭ وكىلى ايدار حاميت.
جالپى, جوبا ەكى باعىتتا جۇزەگە اسىرىلدى. ۇيىمداستىرۋشىلار ەڭ ۇزدىك الەۋمەتتىك باستامالاردى ىرىكتەپ قانا قويماي, بارلىق وڭىردەن قاتىسۋشىلارعا ءوز باستامالارىن دايىنداۋعا كومەكتەسىپ, باعىت-باعدار بەرگەن تالىمگەرلەردى دە دايارلاعان. ناتيجەسىندە بارلىعى 68 جاستار ءىسى جونىندەگى قىزمەتكەرلەر تاڭدالىپ, ارنايى وقىتۋدان ءوتتى. تالىمگەرلەردىڭ ءبىرى اقتوبە وبلىستىق جاستار رەسۋرستىق ورتالىعىنىڭ باسشىسى گۇلنار كابيەۆانىڭ ايتۋىنشا, قاتىسۋشىلاردى اۋىل جاستارى مەن جۇمىسسىزدار قاتارىنان تاڭداۋعا تىرىسقان. «رەسپۋبليكا بويىنشا تالىمگەرلەرگە ىرىكتەۋ بولدى. جاستارمەن تىكەلەي جۇمىس ىستەگەندىكتەن قىزىعۋشىلىق تانىتىپ, ءوتىنىم بەردىم. وقۋ ءۇش ءتۇرلى كەزەڭدە جۇزەگە استى. اقتوبە وبلىسى بويىنشا تاڭدالعان 5 تالىمگەردىڭ ءبىرى بولدىم. ءبىزدىڭ وڭىردە ىرىكتەۋدەن وتكەن 72 جاس قاتىسۋشى بار, ولاردان 14 توپ قۇرادىق. مەنىڭ جەتەكشىلىگىمدە بولعان ءۇش توپ دايىنداعان جوبالار گرانت يەلەندى», دەدى گ. كابيەۆا.
اقتوبە وبلىسى ايتەكە بي اۋدانىنىڭ قاراقۇدىق اۋىلىنىڭ قاتىسۋشىلارى فۋتبول الاڭىن سالۋدى ۇسىنعان. تالىمگەردىڭ ايتۋىنشا, ولار جەرگىلىكتى اكىمشىلىكپەن بايلانىسىپ, اۋماعى مەن جەر تەلىمى بويىنشا كەلىسىپ قويعان, ەندى تەك گرانتتى كۇتىپ وتىر. قاتىسۋشىلار وسىلايشا اۋىل بالالارىنىڭ بوس ۋاقىتىن پايدالى وتكىزۋى مەن سپورتپەن شۇعىلدانۋ ماسەلەسىن شەشۋدى كوزدەيدى. ىرعىز اۋدانىنان قاتىسىپ جاتقان وزگە ەكى توپ جەڭىپ العان قاراجاتىن ۇ.ق ۇلىمبەتوۆ اتىنداعى ساياباقتى جوندەۋگە جۇمساماق. ءبىر توپ ساياباقتىڭ ىشىندەگى توزعان ورىندىقتاردى رەتكە كەلتىرىپ, قوقىس جاشىكتەرىن ورناتۋدى جانە ساياباقتى اباتتاندىرۋدى قولعا العىسى كەلەدى. ال ەكىنشىسى ساياباق جانىنان دەنە شىنىقتىرۋعا, جاتتىعۋعا ارنالعان سپورت الاڭىن جاساقتاۋدى قولعا الىپ وتىر. وسىلايشا جاستار اۋدان تۇرعىندارىنا جاڭا دەمالىس ورنىن سىيلاماق. «جىل سوڭىندا وتەتىن فەستيۆالدە 100 جوبانىڭ ىشىنەن ۇزدىك اتانعاندارىنىڭ اۆتورلارى ماراپاتتالادى. ال ءبىز تالىمگەر رەتىندە جوبامىز ۇزدىكتەر قاتارىنا ىلىكسە قۋانار ەدىك. سونداي-اق جوبا ءارى قاراي جالعاسىن تاپسا جاستار مەن وڭىرلەر ءۇشىن پايدالى بولماق. كەلەسى ۆولونتەرلەر جىلىندا دا ءونىمدى جوبالاردى جۇزەگە اسىرامىز دەپ سەنەمىز», دەدى اقتوبە وبلىستىق جاستار رەسۋرستىق ورتالىعىنىڭ باسشىسى گ.كابيەۆا.
ال جامبىل وبلىسىنان كەلگەن تالىمگەر, بايزاق اۋدانى جاستار رەسۋرستىق ورتالىعىنىڭ قىزمەتكەرى نۇرجان ەسىرگەنوۆ جوباعا تاجىريبە جيناپ, مەنتورلىق, ترەنەرلىك داعدىلارىن دامىتۋ ءۇشىن قاتىسۋعا نيەت ءبىلدىرىپتى. «جامبىل وبلىسىنان ۇسىنىلعان 8 جوبانىڭ 6-ى سوڭعى كەزەڭگە ءوتىپ گرانت ۇتىپ الدى. مەن وسى جەڭىسكە جەتكەن 6 جوبانىڭ بارلىعىنىڭ باسى-قاسىندا بولىپ, جاستارعا مۇمكىندىگىنشە كومەكتەسۋگە تىرىستىم», دەيدى ول. جوبالاردىڭ بارلىعى بايزاق اۋدانىندا قاراشا ايىنىڭ سوڭىنا دەيىن جۇزەگە اسىرىلۋى ءتيىس. اۋدانداعى تاۋلى ايماقتاردىڭ بىرىندە تۇراتىن بالالار مەكتەپكە باسقا اۋىلعا اۆتوبۋسپەن بارادى ەكەن, الايدا حالىقارالىق ماڭىزدى جول بويىندا جانە تەمىر جول تورابىندا ورنالاسقان ۇشبۇلاق اۋىلىندا ايالداما جوق. سول اۋىلدىڭ بالالارى وقۋشىلار ءۇشىن جاڭا ايالداما تۇرعىزىپ بەرمەك. تالىمگەردىڭ ايتۋىنشا, تاعى ەكى جوبا باسقا اۋىلدارعا تاسىمالدانىپ وقيتىن شالعاي اۋىلداردىڭ بالالارىنا ارناپ مەكتەپ جانىنان ايالداما سالۋدى كوزدەيدى. جوبالار اراسىندا تۋعان اۋىلىن كوركەيتىپ, ساياباعىن رەتكە كەلتىرەتىن تاعى ەكى جوبا بار ەكەن. سونداي-اق ەكولوگيالىق ماسەلەنى شەشۋگە باعىتتالعان «قولشاتىرعا قوقىس سال» جوباسى ارقىلى قاتىسۋشىلار قوقىس جاشىكتەرىن ەرەكشە قولشاتىر پىشىندە جاساپ, بالالاردى جاقسى ادەتكە وسىلايشا قىزىقتىرۋعا تىرىسىپتى.
قىزىلوردا وبلىسى قارماقشى اۋدانى جاستار رەسۋرستىق ورتالىعىنىڭ باسشىسى ءادىل ىبراحيم جوبانىڭ اۋىلدىق مەكەندەردى وزگەرتۋگە جاستارعا مۇمكىندىك بەرۋى قىزىقتىرعانىن ايتادى. سونداي-اق جوبا رەسپۋبليكاداعى جاستار ءىسى سالاسىندا قىزمەت ەتەتىن جاستاردىڭ بىلىكتىگىن ارتتىرۋدى ماقسات ەتۋىمەن ەرەكشە دەيدى ول. بۇل بارلىق ايماقتاعى ارىپتەستەردىڭ تانىسىپ-بىلىسۋىنە جانە ءوزارا تاجىريبە الماسۋىنا تاپتىرماس الاڭعا اينالعان. قىزىلوردا وبلىسىنان جالپى 7 جوبا جەڭىمپاز اتانعان. ونىڭ ءبىرى شيەلى اۋدانىندا پلاستيك قالدىقتارىن قايتا وڭدەيتىن مەكەمە سالۋدى كوزدەيدى. تالىمگەردىڭ ايتۋىنشا, بۇل جوبادان ۇتىپ العان شاعىن گرانت كەيبىر قاتىسۋشىلاردىڭ ۇلكەن باستامالارىنا جول اشاتىن باستاپقى ينۆەستيتسيا, جوبانى جۇزەگە اسىرۋ بارىسىندا قاتىسۋشىلار وزگە قاراجات كوزىن تارتۋعا قۇقىلى. تاعى ءبىر باستامادا قاتىسۋشىلار وسى شيەلى اۋدانىندا ۆەلوتۇراق جاساۋدى قولعا الماق كورىنەدى. ال قارماقشى اۋدانى بىرلىك اۋىلىنىڭ جاستارى ورتالىقتا ەسكىرگەن سپورت الاڭىن قايتا جوندەۋگە قاراجات سۇراسا, تومەنارىق اۋىلىنىڭ جاستارى كوشە سپورتىنا ارنالعان الاڭ سوققىلارى كەلەدى. جەڭىسكە جەتكەن كەلەسى ءبىر جوبا بويىنشا جاڭاقورعان كەنتىنىڭ وزىندە ورتالىق الاڭدا 50 مەترلىك جارىق شامدار ورناتىلادى. ۇيىمداستىرۋشىلاردىڭ ايتۋىنشا, گرانت ۇتىپ العان جوبالاردىڭ ەرەكشەلىگى – باستامالاردا جەكە باستىڭ مۇددەسىنەن قوعامنىڭ مۇددەسى جوعارى قويىلعان. بۇل جوبالاردىڭ جۇزەگە اسۋى جەرگىلىكتى تۇرعىنداردىڭ يگىلىگى ءۇشىن عانا ەمەس, تۋعان جەرىن جاقسارتۋعا تيتتەي دە ءبىر وزگەرىس الىپ كەلگەنىن سەزىنەتىن جاستار ءۇشىن جانە وسىلايشا اينالاڭدى وزگەرتۋ ءوز قولىڭدا ەكەنىن تۇسىنەتىن كەيىنگى ۇرپاق ءۇشىن ماڭىزدى.
