قالامگەردىڭ رۋحىن اسپانداتقان ايتۋلى شاراعا رەسەيدەن تۋعان-تۋىستارى مەن جۇبايى ارنايى كەلدى. جينالعاندار جىلى ەستەلىكتەرىمەن ءبولىسىپ, قابىرعالى قالامگەردىڭ ازاماتتىق تۇلعاسىن تەبىرەنە ەسكە الدى. اسىرەسە, اكەسىنىڭ اتىنا كوشە بۇيىرعانى قىزى يرينا بەلگەردى ايرىقشا قۋانتىپتى. سەبەبى, قازىر ول گەرولد بەلگەردىڭ قولجازبالارىن, جەكە زاتتارىن جيناستىرىپ, مۇراجايعا وتكىزۋدى قولعا العان. «اكەمىزدىڭ ومىردەن وزعانىنا بەس جىلعا جۋىقتادى. قازىر قولىمىزدان كەلگەنشە ونىڭ ەسىمىن ۇرپاق ساناسىندا الديلەۋ ءۇشىن ەستەلىكتەر جيناستىرۋ ۇستىندەمىز. قولىمىزدا كوپتەگەن قولجازبالارى بار. ولاردى رەتكە كەلتىرۋدى كوزدەپ وتىرمىز. اكەم ۇلتى نەمىس بولسا دا قازاق حالقىن ەرەكشە ءسۇيدى, سوڭعى دەمى قالعانشا ادەبيەتى مەن رۋحانياتىنا قالتقىسىز قىزمەت قىلدى», – دەيدى يرينا بەلگەر.
جازۋشىنىڭ قىزى تىلگە تيەك ەتكەندەي, سانالى عۇمىرىنىڭ ساۋلەلى ساتتەرىن ادەبيەت الەمىنە باعىشتاعان بەلگەردىڭ قازاق حالقىنا دەگەن ماحابباتى شىعارمالارى ارقىلى كوپتەپ كورىنىس تابادى. وعان جازۋشىنىڭ «اباي ي گەتە» زەرتتەۋ ەڭبەگىندەگى: «مەنىڭ ابايدى تانۋىم گەتەنى تۇسىنۋدەن باستالۋعا ءتيىس سىقىلدى ەدى. قانشاما قازاقشا وقىپ, قازاق اۋىلىندا ءوستىم دەگەنمەن, نەمىس ەمەسپىن بە؟ بىراق ءبارى كەرىسىنشە بولىپ شىقتى. مەن اۋەلى اباي ارقىلى گەتەنى تاپتىم. بۇل انشەيىن ايتىلا سالعان جىلتىراق ءسوز ەمەس. باسقاسىن بىلاي قويعاندا, گەتەنىڭ ايگىلى «جولاۋشىنىڭ تۇنگى جىرى» اتتى ولەڭىن مەن اۋەلى ابايدىڭ «قاراڭعى تۇندە تاۋ قالعىپ» دەگەن ولەڭىن وقىپ بارىپ, لەرمونتوۆتىڭ «تاۋ شىڭدارى» ارقىلى بويىما ءسىڭىرىپپىن», دەگەن جولدارى دالەل.
دارىن اتىنداعى داڭعىلدىڭ رەسمي اشىلۋ سالتاناتىنا جينالعان زيالى قاۋىم وكىلدەرى دە ونىڭ قازاقتىڭ قاسيەتتى سالتىن وتە تەرەڭ بىلەتىنىن, شىعارمالارى حالىققا ءبىرتابان جاقىن ەكەنىن ايتىپ, بەلگەردىڭ جازۋشىلىق قىرى مەن ازاماتتىق سىرى تۋرالى تەرەڭنەن تولعادى.
الماتىنىڭ ناۋرىزباي اۋدانىندا سوڭعى ەكى جىلدا 100 كوشە جاڭا اتاۋ ەنشىلەگەن. بۇعان دەيىن ەلىمىزدىڭ ەكى بىردەي ءىرى قالاسىندا جازۋشىنىڭ اتىنا كوشە اتاۋى بەرىلگەن بولاتىن.
