ينستيتۋت تاريحىنداعى وسىناۋ دارا تۇرار داتاعا وراي اسكەري قىزمەتشىلەر مەن كۋرسانتتاردىڭ, قارۋلى كۇشتەر جانە اسكەري ينستيتۋت ارداگەرلەرىنىڭ قاتىسۋىمەن سالتاناتتى شارا ءوتتى.
جينالعانداردى ايتۋلى كۇنمەن قۇتتىقتاعان وقۋ ورداسىنىڭ باستىعى گەنەرال-مايور اسقار مۇستابەكوۆ بۇگىنگى كۋرسانتتاردىڭ اسكەري ينستيتۋتتىڭ ايشىقتى داستۇرلەرىن لايىقتى تۇردە جالعاستىراتىندىعىنا سەنىم ءبىلدىردى.
ء«بىزدىڭ جەتىستىگىمىز ءاربىر اسكەري قىزمەتشىنىڭ, وقۋ ورنىنىڭ بارلىق ازاماتتىق پەرسونالىنىڭ سانالى تۇردە جانە ايانباي تەر توككەن ەڭبەگىنىڭ جەمىسى. سىزدەر اسكەري ءبىلىم بەرۋدى دامىتۋعا, جوعارعى وقۋ ورنىنىڭ نىقتاپ قالىپتاسۋىنا, بولاشاق وفيتسەرلەردى دايىنداۋعا لايىقتى ۇلەس قوساسىزدار. وسىنىڭ ارقاسىندا ءبىزدىڭ ينستيتۋت ەلىمىزدىڭ اسكەري جوعارعى وقۋ ورىندارى اراسىندا جەتەكشى ۇجىمداردىڭ ءبىرى بولىپ سانالادى. قازاقستان قارۋلى كۇشتەرى ءۇشىن وفيتسەر كادرلارىن دايارلاۋ بويىنشا مەملەكەتتىك مىندەتتەردى تابىستى ورىنداپ كەلەدى»,- دەدى اسقار مۇستابەكوۆ.
اسكەري ينستيتۋت 18 جىلدىڭ ىشىندە اۋە قورعانىس كۇشتەرى, قازاق ارمياسىنىڭ باسقا اسكەري تۇرلەرى مەن تەكتەرى قاتارىن تولتىرعان 1 730-عا جۋىق لەيتەنانتتى تاربيەلەپ شىعارعان. 185 تۇلەك وقۋدى ۇزدىك بىتىرسە, ونىڭ 27-ءسى «اسكەري وقۋ ورنىن ۇزدىك بىتىرگەنى ءۇشىن» ءتوس بەلگىسىمەن ماراپاتتالعان. قازاقستان رەسپۋبليكاسى قارۋلى كۇشتەرى جوعارى باس قولباسشىسى ءوز قولىمەن 18 تۇلەككە ديپلوم تابىس ەتكەن.
راديوەلەكترونيكا جانە بايلانىس اسكەري ينجەنەرلىك ينستيتۋتى زەنيتتى زىمىران, راديتەحنيكالىق اسكەرلەر, اۆياتسيانى رەديوتەحنيكامەن قامتاماسىز ەتۋ بايلانىس ءبولىمى ءۇشىن بىلىكتى وفيتسەرلەردى, سونداي-اق اسكەرلەر مەن قارۋ-جاراقتى باسقارۋدىڭ اۆتوماتتاندىرىلعان جۇيەلەرىنىڭ ينجەنەرلەرىن دايىندايدى. وفيتسەرلەر-راديوينجەنەرلەردى دايارلاۋ 5 ماماندىق بويىنشا جۇرگىزىلەدى.
اسكەري جوو زاماناۋي وقۋ-ماتەريالدىق بازامەن قامتاماسىز ەتىلگەن. وقۋ اۋديتوريالارى مەن زەرتحانالارى ءتۇرلى راديوتەحنيكالىق ستەندتتەرمەن, كومپتەرلىك جانە لينگوفوندى تەحنيكالارمەن, سيمۋلياتورلارمەن, سونداي-اق جاتتىعۋ كەشەندەرىمەن جابدىقتالعان.
كۋرسانتتار تەوريالىق بىلىمدەرىن, ينستيتۋتتىڭ وقۋ ورتالىعىندا جەتىلدىرە تۇسەدى. بولاشاق وفيتسەرلەر شىنايى جاۋىنگەرلىك تەحنيكالاردا تاجىريبەدەن ءوتىپ, راديولوكاتسيالىق بەكەتتەر مەن بايلانىس اسكەري تەحنيكالارىنا قىزمەت كورسەتەدى.
