قوعام • 16 قازان، 2019

زاڭ جوباسىن تالقىلادى

44 رەتكورسەتىلدى

«حالىق كوممۋنيستەرى» پارلامەنتتىك فراكتسياسىنىڭ ۇيىمداستىرۋىمەن «پەداگوگ مارتەبەسى: ۇسىنىستان ناقتى قادامعا» تاقىرىبىندا كەڭەيتىلگەن وتىرىس ءوتتى. شارا بارىسىندا «پەداگوگ مارتەبەسى تۋرالى» زاڭ جوباسى تالقىلاندى. جيىنعا ءبىلىم جانە عىلىم مينيسترلىگىنىڭ وكىلدەرى، اتالعان پارتيانىڭ دەپۋتاتتارى مەن ءبىلىم بەرۋ سالاسىنىڭ قىزمەتكەرلەرى قاتىستى.

وتىرىستىڭ اشىلۋىندا ءسوز العان ءماجىلىس دەپۋتاتى يرينا سميرنوۆا قابىلدانعالى تۇرعان زاڭ ەلىمىزدىڭ بولاشاعىمەن بايلانىستى ەكەنىن ايتتى. «ەلباسى پەداگوگتاردىڭ مارتەبەسىن كو­تەرەتىن زاڭ جوباسىن ازىرلەۋ تۋ­رالى باستاما كوتەرگەندە، مۇ­عالىمدەردىڭ ءوز قىزمەتىنە جاتپاي­تىن جۇمىستارعا جەگىلۋىنە شەكتەۋ قويۋ كەرەكتىگىن شەگەلەپ ايتقان ەدى. مىنە، زاڭ جوباسى قايدان باستاۋ الدى؟»، دەگەن ماجىلىسمەن نەگىزگى ويدان ال­شاقتاماي، باستى تالاپتى ورىن­داۋ قاجەتتىگىنە توقتالدى. «جاڭا زاڭ جوباسىندا كوپ ماسەلە قاراستىرىلعان. بىراق ءبىز ناقتى ناتيجەنى كورگىمىز كەلەدى. ايتالىق، مۇعالىمنىڭ ايلىعى قانشا، پەداگوگقا بەلگىلەنگەن جۇك­تەمە قانداي بولارىن وسى زاڭدا اشىق كورسەتىلگەنىن قا­لايمىز. بۇل ءۇشىن انىق، سال­ماق­تى ۇسىنىستارىمىزدى ورتاعا سالايىق»، دەپ ءسوز كەزەگىن سپيكەرلەرگە بەردى.

ەلورداداعى اتا-انالار قا­ۋىم­­داستىعىنىڭ ءتورايىمى گۇل­نار مانسۇرقىزى تال­قى­لاۋعا تۇسكەن زاڭ جوباسى تەك مۇعا­لىمدەرگە ەمەس، تۇتاس قوعامعا قا­تىستى ماسەلە ەكەنىن جەتكىزدى. ونىڭ ويىنشا، پەداگوگتاردىڭ ماتەريالدىق جاعدايىن ءسوزسىز جاقسارتۋ قاجەت. دەسە دە قو­عام الدىنداعى مۇعالىمنىڭ مار­تەبەسىن بالالاردى وتباسىندا پەداگوگپەن دۇرىس قارىم-قا­تى­ناسقا تاربيەلەۋ ارقىلى لايىقتى دەڭگەيگە كوتەرە الامىز. «ال زاڭ جوباسىنا كەلسەك، قۇجاتتى وسى كۇيىندە قا­بىلداۋدىڭ قاجەتى دە جوق سياق­تى. سەبەبى بۇل مۇعالىمنىڭ مار­تە­بەسىن كوتەرۋدەن گورى كەي تۇستاردا قۇقىعىن شەكتەپ تۇر. ماسەلەن، پەداگوگ بالانىڭ سۋيتسيدكە بارعىسى كەلەتىنىن، ومىرىنە قانداي دا ءبىر قاۋىپ تونگەنىن پو­ليتسياعا ايتۋى ءتيىس ەكەن. بۇل مۇ­عالىمنىڭ فۋنكتسيونالدىق قىز­مەتىنە جاتپايدى. سودان سوڭ مۇ­عالىم العاش وسى قىزمەتكە كەل­گەندە مەكتەپ باسشىلىعى بەكىت­كەن ماتىنگە سايكەس انت بەرۋى كەرەك كورىنەدى. بۇل ديرەكتورعا دەگەن تاۋەلدىلىككە الىپ كەلەدى»، دەيدى. اتا-انانىڭ پايىمداۋىنشا، بىزدە مەكتەپ ديرەكتورلارىن تاعايىنداۋدىڭ ءوز ءتارتىبى ەنگىزىلۋى ءتيىس. ءبىلىم-يننوۆاتسيا ليتسەيلەرىندە مەكتەپ ديرەكتورلارى ءار 4 جىل سايىن اۋىسىپ وتىرادى. سونداي تاجىريبەنى جالپى مەكتەپتەرگە قولدانعان ءجون. ايتپەسە، باس قالانىڭ وزىندە 20 جىلدان بەرى تابان اۋدارماي ءبىر ءبىلىم وشاعىن باسقارىپ وتىرعان باسشىلار بار.

ال شەتەلدەردەگى مۇعالىم مار­تەبەسىن كوتەرۋگە باعىتتالعان با­عىت­تاردى زەردەلەگەن ساراپ­شى ايجان داستانقىزى پەدا­گوگ­تاردىڭ الەۋمەتتىك كارتاسىنا باسا نازار اۋدارۋ كەرەكتىگىنە توق­تالدى. «اقش-تا مۇعالىمدەر زەينەتكە شىققاندا مەملەكەتتەن الاتىن زەينەتاقىسىنان بولەك تاعى اقشا الادى. ونى ءاربىر شتاتتاعى ارنايى قور تاعايىندايدى. مۇنداي ۇيىمدار پەداگوگتاردىڭ زەينەتاقى قورىنا بەلگىلى ءبىر مولشەردە اقشا سالىپ وتىرادى. سونى كەيىن زەينەتاقى رەتىندە بەرەدى. وسى تاجىريبەنى زەرتتەپ، بىزدەگى زاڭ جوباسىنا ەنگىزۋدى ۇسىنامىن»، دەگەن ا.داستانقىزى ءار شتاتتىڭ ەكونوميكالىق، گەوگرافيالىق ەرەكشەلىكتەرىنە قاراي زەينەتاقى مولشەرى ءارتۇرلى بولاتىنىن ايتتى. سول سەبەپتى ەلىمىزدەگى جەرگىلىكتى اتقارۋشى ورگانداردىڭ دا ءتۇرلى دەڭگەيدە قاراستىرۋى زاڭدى بولماق.

 

سوڭعى جاڭالىقتار

عاسىر زۇلماتى

قوعام • كەشە

ۇقساس جاڭالىقتار