ەكى قۇراما اراسىنداعى العاشقى كەزدەسۋ ماۋسىم ايىندا بەلگيادا وتكەن بولاتىن. سول ماتچتا ەدەن ازار باستاعان بەلگيالىق فۋتبولشىلار قازاقستان قۇراماسىنىڭ قاقپاسىنا جاۋاپسىز 3 گول سوعىپ, جەڭىسكە جەتكەن ەدى. ارادا 4 اي وتكەندە «استانا ارەنا» ستاديونىندا بەلگيا قۇراماسى ءوزىنىڭ مىقتىلىعىن تاعى دا دالەلدەدى.
ءاۋ باستا فۋتبول ماماندارى بۇل ماتچتا بەلگيا قۇراماسى ەش قيىندىقسىز جەڭەدى دەپ بولجاعان-دى. ءتىپتى «قىزىل سايتاندار» ءبىزدىڭ قاقپاعا جاۋاپسىز 4-5 گول سوعادى دەپ تە ساۋەگەيلىك جاساعاندار بار ەدى... قازاقستان قۇراماسى ويىندى جاقسى باستادى دەپ ايتۋعا بولادى. ماتچتىڭ العاشقى 20 مينۋتىن وتانداستارىمىز قورعانىستا دا, شابۋىلدا دا ءساتتى وتكىزدى. ويىنداعى العاشقى قاۋىپتى شابۋىلدى دا ءبىزدىڭ جىگىتتەر ۇيىمداستىرىپ, گول سوعاتىن تاماشا مۇمكىندىكتى پايدالانا المادى. 8-مينۋتتا ماكسيم فەديننىڭ ايىپ الاڭىنىڭ ماڭايىنان تەپكەن دوبى قاقپا باعانىنان ءسال عانا قيىس كەتتى. قوناقتار دا قورعانىسقا جاتىپ الدى دەپ ايتا المايمىز. ەدەن ازار, ميشي باتشۋاي سياقتى كىل مىقتىلار جينالعان بەلگيا فۋتبولشىلارى دا دميتري نەپوگودوۆ قورعاعان قاقپانى بىرنەشە رەت نىساناعا العانىمەن, ناتيجە شىقپادى. دەسە دە, ويىننىڭ 21-مينۋتىندا باتشۋاي مەرگەندىگىمەن كوزگە ءتۇسىپ, ەسەپتى اشتى. وتانداسى دەننيس پراتتان پاس العان ميشي قورعاۋشى ابزال بەيسەبەكوۆ پەن قاقپاشى دميتري نەپوگودوۆتى قاپى قالدىرىپ, گول سوعىپ كەتتى. ءبىرىنشى تايمنىڭ سوڭىنا دەيىن بەلگيالىقتار بىرنەشە قاۋىپتى شابۋىل ۇيىمداستىرعانىمەن, ەسەپتى ەسەلەي المادى.
ەكىنشى تايم دا بەلگيا قۇراماسىنىڭ باسىمدىعىمەن باستالدى. قوناقتار ءبىزدىڭ قاقپا ماڭايىندا ءجيى شابۋىلداعانىمەن, كوبىسى ءساتسىز اياقتالىپ جاتتى. بىراق 53-مينۋتتا قوناقتاردىڭ كاپيتانى ەدەن ازار وڭ قاناتتان اشىلعان توما مەنەگە ءدال پاس اسىردى. قورعاۋشى دميتري شومكونى قاپى قالدىرىپ, دوپتى وزىنە ءساتتى يكەمدەپ العان مەنە نەپوگودوۆ قاقپاسىنا سوققى باعىتتاپ, ەسەپتى 2:0-گە جەتكىزدى. كەزدەسۋ سوڭىنا دەيىن بەلگيا قۇراماسىنىڭ ەسەپتى ەسەلەيتىن بىرنەشە مۇمكىندىگى بولدى. دريس مەرتەنس پەن ميشي ءباتشۋايدىڭ تەپكەن دوپتارى بىردە قيىس كەتسە, بىردە نەپوگودوۆ قىراعىلىق تانىتتى. جەرلەستەرىمىز العاشقى تايمداعىداي ەكىنشى 45 مينۋتتا دا ءبىر عانا قاۋىپتى شابۋىلىمەن كوزگە ءتۇستى. 79-مينۋتتا بەلگيا بىرىنشىلىگىندە دوپ تەۋىپ جۇرگەن يان ۆوروگوۆسكي قاقپاشىمەن بىرگە-ءبىر شىعىپ, گول سوعا المادى. بۇل جەردە ۆوروگوۆسكيگە ساتتىلىك پەن شەبەرلىك جەتىسپەدى. وسىلايشا, بەلگيا 0:2 ەسەبىمەن جەڭىسكە جەتىپ, كەزەكتى ءۇش ۇپايىن ولجالادى. ال قازاقستان قۇراماسى ەۋروپا چەمپيوناتىنىڭ ىرىكتەۋىن ءوز الاڭىندا جەڭىسپەن باستاپ (قازاقستان – شوتلانديا – 3:0), جەڭىلىسپەن اياقتادى. ەندى وتانداستارىمىز ىرىكتەۋ كەزەڭىندەگى سوڭعى ەكى ويىنىن سىرت الاڭدا وتكىزەدى. 16 قاراشادا سان-مارينوعا قوناققا بارسا, 20 قاراشادا شوتلانديا قۇراماسىمەن كەزدەسەدى.
