«سيبير» كومانداسى 8 مىڭعا جۋىق جانكۇيەردىڭ الدىندا «بارىس» كومانداسىنا ەش قارسىلىق كورسەتە المادى. ءبىرىنشى كەزەڭنەن باستاپ باسىمدىقتى ءوز قولدارىنا العان ەلوردا كومانداسى 0:2 ەسەبىمەن جەڭىسكە جەتتى. كوماندالار العاشقى كەزەڭدە تەڭ ويناعانىمەن, كەزدەسۋدىڭ ەكىنشى جانە ءۇشىنشى بولىگىندە «بارىس» ويىنشىلارى قارسىلاسىنىڭ قاقپاسىنا ەكى شايبا سوقتى. ماتچتىڭ 37-مينۋتىندا كوربەن نايت مەرگەندىگىمەن كوزگە تۇسسە, ءۇشىنشى كەزەڭنىڭ 42-مينۋتىندا اركادي شەستاكوۆ ەسەپتى 2:0-گە جەتكىزدى.
وسىلايشا «بارىس» سىرت الاڭدا وتكىزگەن ەكى كەزدەسۋىندە دە جەڭىسكە جەتتى. بۇل جەڭىسىنەن كەيىن «بارىس» قحل-ءدىڭ «شىعىس» كونفەرەنتسياسىندا 22 ۇپايمەن 3-ورىنعا تۇراقتادى. ەندى وتانداستارىمىز الداعى ءۇش كەزدەسۋىن «بارىس ارەنادا» وتكىزەدى. اتاپ ايتار بولساق, بۇگىن ۆلاديۆوستوكتىڭ «ادميرالىمەن» كەزدەسسە, 16 قازاندا «دينامو» (ريگا), 20 قازاندا «ۆيتياز» (ماسكەۋ وبلىسى) كلۋبىمەن كۇش سىناسادى.
