قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆ 2019 جىلدى «جاستار جىلى» دەپ جاريالادى. وسى ورايدا, جاستار اراسىندا جاڭا جوبالار قۇرۋ ماقساتىندا قازاقستان جاستارىنىڭ كونگرەسى قازاق تەحنولوگيا جانە بيزنەس ۋنيۆەرسيتەتىندە جانە استانا مەديتسينالىق ۋنيۆەرسيتەتىندە دوڭگەلەك ۇستەل ۇيىمداستىردى. جيىن بارىسىندا قازاقستان جاستارىنىڭ كونگرەسى جانىنداعى رەسپۋبليكالىق جاستاردى دامىتۋ ورتالىعىنىڭ باسشىسى ەرعازى ءازىمحان ۇلى كەزدەسۋدىڭ ماڭىزىن اتاپ ءوتىپ, قاتىسۋشىلارعا تۇسىنىك بەردى.
الەۋمەتتىك كاسىپكەر ەمين اسكەروۆ پرەزيدەنت قاسىم-جومارت توقاەۆتىڭ العاشقى جولداۋىنا قاتىستى ءوز پىكىرىمەن ءبولىستى.
«جولداۋدى تىڭداۋ بارىسىندا پرەزيدەنتىمىزدىڭ قوعامنىڭ ولقى جاقتارىنان حاباردار ەكەنىن بايقادىم. سەبەبى بۇل جولداۋدا قوعامنىڭ نەگىزگى تۇستارىنا نازار اۋدارىلدى. مىسالى, ورتا جانە شاعىن كاسىپتى سالىقتان بوساتۋ, مەملەكەتتىك ساتىپ الۋلارداعى جەمقورلىقتى تىيۋ باستامالارى پرەزيدەنتتىڭ بۇل ماسەلەگە الاڭدايتىنىن بىلدىرەدى. زەينەتاقى جيناعىن باسپانا مەن ءبىلىم الۋعا جۇمساۋعا بولاتىنى – تىڭ جاڭالىق. بۇل – قازىرگى تاڭدا باسپانا ساتىپ الۋعا نە وقۋ اقىسىن تولەۋگە مۇمكىندىگى جوق ادامدار ءۇشىن ۇلكەن مۇمكىندىك ەكەنىن ءتۇسىندىم», دەدى ول.
قازتبۋ-دە وتكەن ءىس-شارادا «حابار» ارناسىنىڭ جاس ءتىلشىسى – بەكبولات ارىستانبەكوۆ جانە «مادەنيەت ۇزدىگى» توسبەلگىسىنىڭ يەگەرى, رەجيسسەر, ءانشى, اكتريسا, كوپتەگەن تانىمال اندەردىڭ اۆتورى قۇرماناي باحتيارقىزى پرەزيدەنت جولداۋىنا قاتىستى ءوز ويلارىن ورتاعا سالدى.
قازاقستان جاستارىنىڭ كونگرەسى ءتۇسىندىرۋ جۇمىستارىن جۇرگىزۋگە ارنالعان دوڭگەلەك ۇستەلدەر مەن كەزدەسۋلەردى نۇر-سۇلتان قالاسىنىڭ بارلىق جوعارى وقۋ ورىندارىنىڭ وكىلدەرىمەن وتكىزۋدى جوسپارلاپ وتىر.
