قازاقستان رەسپۋبليكاسى پارلامەنتىنىڭ ءبىر توپ دەپۋتاتتارى ازىرلەگەن زاڭ جوباسىنىڭ ماقساتى كادرلاردى كونكۋرستىق ىرىكتەۋدى جۇرگىزۋ جانە مەملەكەتتىك قىزمەتتى وتكەرۋ, سىبايلاس جەمقورلىققا قارسى ءىس-قيمىل جۇيەسىندەگى شارالاردى ىسكە اسىرۋ كەزىندەگى قۇقىقتىق ولقىلىقتاردى, كولليزيالاردى جويۋ ارقىلى مەملەكەتتىك قىزمەت ماسەلەلەرى بويىنشا زاڭنامانى جەتىلدىرۋ بولىپ تابىلادى.
مەملەكەتتىك قىزمەتتى وتكەرۋدى جاڭعىرتۋ ءۇشىن زاڭ جوباسىندا كونكۋرستىق راسىمدەر وڭايلاتىلادى, وزىق شەتەلدىك جوعارى وقۋ ورىندارىندا دوكتورانتۋرا باعدارلامالارى بويىنشا وقىعان, سونداي-اق حالىقارالىق ۇيىمدارداعى جۇمىس تاجىريبەسى بار ادامداردى كونكۋرستان تىس تاعايىنداۋ كوزدەلەدى, مەملەكەتتىك قىزمەتشىلەردى الەۋمەتتىك قورعاۋ جونىندەگى شارالار ناقتىلانادى.
مەملەكەتتىك قىزمەت ىستەرى جونىندەگى ۋاكىلەتتى ورگاننىڭ قۇقىق قورعاۋ ورگاندارى لاۋازىمدارىنا قويىلاتىن بىرىڭعاي بىلىكتىلىك تالاپتارىن بەكىتۋ جونىندەگى جانە مەملەكەتتىك اكىمشىلىك لاۋازىمدارعا ورنالاسۋعا كانديداتتاردىڭ جانە قۇقىق قورعاۋ قىزمەتىنە كىرەتىن ازاماتتاردىڭ تەستىلەۋ ناتيجەلەرىنە شاعىم جاساۋ ءتارتىبىن ايقىنداۋ جونىندەگى قىزمەتى رەتتەلەدى.
مەملەكەتتىك قىزمەتتى وتكەرۋ كەزىندە كاسىبي الەۋەتىن اناعۇرلىم ءتيىمدى پايدالانۋدى قامتاماسىز ەتۋ ءۇشىن ساياسي جانە مەملەكەتتىك قىزمەتشىلەردى روتاتسيالاۋ تەتىگى ناقتىلانعان. نورماتيۆتىك قۇقىقتىق اكتىلەردىڭ جوبالارىنا سىبايلاس جەمقورلىققا قارسى عىلىمي ساراپتاما جاساۋ ينستيتۋتى قالپىنا كەلتىرىلەدى.
ۇلتتىق ءال-اۋقات قورى توبىنا كىرەتىن ۇيىمداردا باسقارۋ فۋنكتسيالارىن اتقاراتىن ادامداردىڭ ۇلتتىق ءال-اۋقات قورىنىڭ توبىنا كىرەتىن باسقارۋ ورگاندارىنداعى, باقىلاۋ كەڭەستەرىندەگى, اتقارۋشى ورگاندارداعى, وزگە دە ۇيىمدارداعى اقى تولەنەتىن لاۋازىمدارعا ورنالاسۋ قۇقىعىن رەتتەيتىن ەرەجە الىپ تاستالادى.
زاڭ جوباسىن تالقىلاۋ بارىسىندا سەناتتىڭ تۇراقتى كوميتەتتەرى مەن دەپۋتاتتارىنىڭ ەسكەرتپەلەرى مەن ۇسىنىستارىن ەسكەرە وتىرىپ, ءماجىلىس ماقۇلداعان زاڭ جوباسىنا وزگەرىستەر مەن تولىقتىرۋلار ەنگىزۋ قاجەتتىگى تۋىندادى.
قولدانىستاعى ءتارتىپتى ساقتاۋ ماقساتىندا وبلىستاردىڭ, رەسپۋبليكالىق ماڭىزى بار قالالاردىڭ جانە استانانىڭ جەرگىلىكتى اتقارۋشى ورگاندارىنا دەنساۋلىق ساقتاۋدىڭ, ءبىلىم بەرۋدىڭ, مادەنيەت پەن سپورتتىڭ وبلىستىق باسقارمالارىنىڭ باسشىلارىن تاعايىنداۋ, سونداي-اق ولاردى بوساتۋ كەزىندە كانديداتۋرالاردى ءتيىستى ۋاكىلەتتى مەملەكەتتىك ورگاندارمەن كەلىسۋ ۇسىنىلىپ وتىر.
وبلىستاردىڭ (رەسپۋبليكالىق ماڭىزى بار قالالاردىڭ, استانانىڭ) پوليتسيا دەپارتامەنتتەرىنىڭ باستىقتارىن قۇقىق قورعاۋ ورگاندارى باسشىلىعىنىڭ پرەزيدەنتتىك رەزەرۆىندە تۇرعان پوليتسيا قىزمەتكەرلەرىنىڭ قاتارىنان ءتيىستى جەرگىلىكتى اتقارۋشى ورگاندارمەن كەلىسۋ بويىنشا قازاقستان رەسپۋبليكاسىنىڭ ىشكى ىستەر ءمينيسترىنىڭ تاعايىنداۋى كوزدەلەدى.
ودان باسقا, لاۋازىمدار ساناتتارى (ساياسي جانە اكىمشىلىك مەملەكەتتىك قىزمەتشىلەر) بويىنشا وزدەرىنە باعىنىستى ادامداردىڭ سىبايلاس جەمقورلىق قۇقىق بۇزۋشىلىق جاساعانى ءۇشىن لاۋازىمدى ادامداردىڭ جاۋاپكەرشىلىگىن ناقتىلاۋعا جانە رەگلامەنتتەۋگە باعىتتالعان تۇزەتۋلەر ەنگىزىلەدى.
سەناتتىڭ تۇراقتى كوميتەتتەرى مەن دەپۋتاتتارىنان كەلىپ تۇسكەن بارلىق ەسكەرتپەلەر مەن ۇسىنىستار سالىستىرما كەستەگە جيناقتالدى.
قۇجات پالاتا قاراۋىنا جىبەرىلدى.
