ءوڭىر باسشىسى وقۋشىلاردى تابيعاتتى ايالاۋعا شاقىردى.
– شىنىن ايتقاندا, ۇلكەندەر ەكولوگيا ماسەلەسىن سىزدەرسىز اۋىزدىقتاي المايدى. بۇگىندە بۇكىل الەم قوقىستى بولەك جيناۋدى, جاڭا, جاڭارتىلاتىن ەنەرگيا كوزدەرىن ىزدەۋدى, ەكولوگيالىق تازا ونىمدەرگە كوشۋدى قولعا العان. مەنىڭ ويىمشا, بۇل وتە ماڭىزدى داعدىلار. سىزدەردىڭ بۋىننىڭ جاس كەزىنەن ەكولوگيا ماسەلەسىن زەرتتەيتىنى مەنى قۋانتادى, – دەپ اتاپ ءوتتى جەڭىس قاسىمبەك.
اكتسيا بارىسىندا وبلىس اكىمى وقۋشى بالالارمەن ەمەن-جارقىن اڭگىمەلەستى. وسكەلەڭ ۇرپاقتىڭ وكىلدەرى ءوڭىر باسشىسىنا وزدەرىن قىزىقتىرعان سۇراقتاردى قويىپ, ولارعا تولىققاندى جاۋاپ الدى. مىسالى, جەڭىس قاسىمبەك مەكتەپتە, كەيىن ۋنيۆەرسيتەتتە وقىپ جۇرگەنىندە فيزيكا مەن ماتەماتيكانى جاقسى كورگەنىن, سونداي-اق دەنە شىنىقتىرۋ ساباعىندا فۋتبول ويناعاندى ۇناتقانىن ايتتى. «ەگەر مەن مەملەكەتتىك قىزمەتشى بولماسام, وندا ءوزىمنىڭ العاشقى ماماندىعىم – قۇرىلىسشى-ساۋلەتشى بولىپ جۇمىس ىستەر ەدىم. ماعان ول شىنىمەن ۇنايدى», دەدى ول.
بۇدان كەيىن وبلىس باسشىسى مەن وقۋشىلار پلاستيكتەردى وڭدەيتىن EcoTruck جىلجىمالى بەكەتىنىڭ جۇمىسىمەن تانىستى. شاناعىندا قوقىس وڭدەيتىن قوندىرعىسى بار جۇك كولىگى قاراشا ايىنىڭ 15-ىنەن باستاپ ءساۋىردىڭ ورتاسىنا دەيىن قاراعاندىنىڭ مەكتەپتەرىن ارالاپ, بالالاردى قوقىستى بولەك جيناۋعا ۇيرەتەتىن بولادى.
ەسكە سالساق, رەسپۋبليكالىق «ەكوساعات» اكتسياسى ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆتىڭ باستاماسىمەن ۇيىمداستىرىلعان بولاتىن. بۇل كۇنى ەلىمىزدەگى بارلىق وبلىس, قالا جانە اۋدان اكىمدەرى وقۋشىلارعا ەكولوگيانى قورعاۋ جونىندە ءدارىس وقىپ, اعاش ەگۋ شاراسىنا ات سالىستى.
