«اشىق ۇكىمەت» پورتالىنا تۇرعىندار مەن بيزنەس وكىلدەرىنىڭ قىزىعۋشىلىعى ارتقان. سوندىقتان, پورتالدارعا ورنالاستارىلاتىن اقپاراتتار قوعام ءۇشىن بارىنشا قولجەتىمدى ءارى پايدالى بولۋى ءتيىس.
مىسالعا, IT-قاۋىمداستىق جانە ۇكىمەتتىك ەمەس ۇيىمدار اتالعان پورتالداردا ققس تولەۋشىلەردىڭ ءتىزىلىمى, تولەۋشى رەتىندە تىركەۋ ەسەبىنەن شىعارىلعان سالىق تولەۋشىلەردىڭ ءتىزىمى, تىركەلگەن جەكە كاسىپكەرلەردىڭ ءتىزىلىمى, جەكەشەلەندىرۋ وبەكتىلەرىنىڭ ءتىزىلىمى, سوت اكتىلەرى بانكى جانە ت.ب اقپاراتتاردىڭ بولعانىن قالايدى.
مەملەكەتتىك ورگانداردىڭ وكىلدەرى جىل سوڭىنا دەيىن بىرقاتار سەرۆيستەردى Open API-گە كوشىرۋ (مىسالى, جەكە كاسىپكەرلەر مەن زاڭدى تۇلعالاردىڭ دەرەكتەرى) جانە جاڭا دەرەكتەر جيىنتىعىن (مىسالى, دارمەنسىز بورىشكەرلەر ءتىزىمى, ارەكەتسىز دەپ تانىلعان سالىق تولەۋشىلەر ءتىزىمى) اشىق تۇردە ورنالاستىرۋ جونىندەگى جوسپارلارى تۋرالى حاباردار ەتتى.
تالقىلاۋ قورىتىندىسى بويىنشا «اشىق بيۋدجەتتەر» پورتالىندا ورنالاستىرۋعا جاتاتىن اقپارات تىزبەسى بويىنشا ناقتى ۇسىنىستار ازىرلەۋ ءۇشىن مەملەكەتتىك ورگاندار مەن قوعامدىق ۇيىمداردىڭ وكىلدەرىمەن ارنايى جۇمىس توبىن قۇرۋ شەشىلدى.
كەزدەسۋ سوڭىندا ءىس-شاراعا قاتىسۋشىلار IT-كومپانيالار مەن ۇكىمەتتىك ەمەس ۇيىمدار ءۇشىن وسى كەزدەسۋدىڭ ماڭىزدىلىعىن اتاپ ءوتتى, سونداي-اق وسىنداي فورماتتا تۇراقتى نەگىزدە ديالوگتى جالعاستىرۋ قاجەتتىلىگى تۋرالى شەشىمگە كەلدى.
