جىل سايىن ءداستۇرلى تۇردە وتكىزىلەتىن بيىلعى باسەكەدە 5-6 جاس ارالىعىنداعى 300-گە جۋىق سپورتشى باق سىنادى. سپورتتىق شارانىڭ نەگىزگى ماقساتى – ۆەلوسپورتتى حالىق اراسىندا كەڭىنەن ناسيحاتتاۋ جانە دامىتۋ, وسكەلەڭ ۇرپاقتى سالاماتتى ءومىر سالتىن ۇستانۋعا شاقىرۋ.
ەلىمىزدەگى وليمپيادالىق دايارلاۋ ورتالىعى ءبولىمىنىڭ جەتەكشىسى دينارا اۋباكىروۆا «وليمپيادا ءۇمىتى» ءتۋرنيرى ارقىلى بولاشاق چەمپيونداردى قازىردەن باستاپ دايىنداعىمىز كەلەدى دەيدى. ء«بىزدىڭ نەگىزگى ماقساتىمىز – ۆەلوسپورتتى كەڭىنەن ناسيحاتتاپ, بۇقارالىق سيپاتىن كەڭەيتۋ. سوعان سايكەس, قابىلەتتى بالالاردى ىرىكتەپ, بولەك دايىندىق جۇرگىزۋ ماسەلەسىن دە قاراستىرۋ ۇستىندەمىز. وسىعان بايلانىستى الداعى ۋاقىتتا وليمپيادالىق دايارلاۋ ورتالىعى جانىنان بۇلدىرشىندەرگە ارنالعان سەكتسيا اشىلۋى مۇمكىن. ەگەر وسى جوسپارىمىز ويداعىداي جۇزەگە اسسا, بالالار سپورتىنىڭ دامۋىنا ۇلكەن ءدۇمپۋ اكەلەر ەدى», دەيدى ول.
بالالار اراسىنداعى گران-پري جارىسى وسىمەن ءۇشىنشى جىل قاتارىنان ۇيىمداستىرىلىپ وتىر. باستاپقىدا كوپشىلىك اسا ءمان بەرمەگەنىمەن, جوبا ومىرشەڭ ەكەندىگىن دالەلدەدى. اتا-انالار بىلتىردان باستاپ جارىستىڭ اۋقىمى, فورماتى, تالابى جاعىنان كاسىپقوي جارىستاردان كەم ەمەستىگىنە كوز جەتكىزگەننەن كەيىن بالالارىن جارىسقا اكەلە باستادى. جارىس سوڭىندا جۇلدەلى ورىن يەلەنگەن سپورتشىلارعا ۇيىماستىرۋشىلار باعالى سىيلىقتار تابىستادى.
