ەلوردا كومانداسى ەۋروكۋبوك ويىندارىندا جەتىنشى جىل قاتارىنان ويناپ جاتسا دا, بيىل ءبىرىنشى رەت سەربيالىق كوماندامەن كەزدەسكەلى تۇر. «پارتيزان» كلۋبىنىڭ تاريحى تەرەڭ بولعانىمەن, اتاق جاعىنان ەۋروپانىڭ ورتانقول كومانداسى سانالادى. 1945 جىلى قۇرىلعان كوماندا قازىرگى ۋاقىتتا ۋەفا كلۋبتار رەيتينگىندە 71-ورىندا تۇر. ال 10 جىلدىق تاريحى بار «استانا» توپ-50 كلۋبتىڭ قاتارىندا ەكەنى بارشاعا بەلگىلى.
«پارتيزان» كومانداسى نۇر-سۇلتانعا سەيسەنبىنىڭ كەشىندە كەلدى. باس باپكەر ساۆو ميلوشەۆيچتىڭ ايتۋىنشا, قۇرامادا جاراقات العان فۋتبولشى جوق. شاكىرتتەرى بۇگىنگى ويىنعا ساقاداي-ساي. سونداي-اق كوماندانىڭ قورعاۋشىسى بويان وستويچ قازاقستان استاناسىنا كەم دەگەندە ءبىر ۇپاي الۋعا كەلگەندىگىن ايتادى. «قازاقستان چەمپيونىنا قارسى ويىن – ءبىز ءۇشىن كەزەكتى ءبىر ەمتيحان. ويتكەنى وسى ويىن ارقىلى ءبىز ءوز دەڭگەيىمىزدى انىقتاپ الامىز. ءبىزدىڭ باستى ماقساتىمىز – جەڭىلمەۋ جانە ۇپاي ولجالاۋ بولىپ تۇر. سونىمەن قاتار قاقپامىزعا گول وتكىزبەۋگە تىرىسامىز. قالعانىن الاڭ شەشەدى. قازىر كومانداداعى جىگىتتەردىڭ كوڭىل كۇيى وتە جاقسى», دەيدى ول.
راس, «پارتيزان» فۋتبولشىلارى ەلورداعا وتە كوتەرىڭكى كوڭىل كۇيدە كەلدى. ويتكەنى سەربيا بىرىنشىلىگىندەگى 9-تۋر ويىنىندا سىرت الاڭدا «رادنيچكي نيش» كلۋبىن 4:1 ەسەبىمەن تاس-تالقانىن شىعاردى. بۇدان بولەك بەلگراد كومانداسى 15 تامىزدان بەرى جەڭىلىستىڭ نە ەكەنىن بىلمەي كەلەدى. سوڭعى رەت تامىزدىڭ ورتاسىندا ەۋروپا ليگاسىنىڭ ىرىكتەۋ كەزەڭىندە تۇركيانىڭ «يەني مالاتياسپور» كومانداسىنا سىرت الاڭدا 1:0 ەسەبىمەن ەسە جىبەرگەن. سودان بەرى 9 ويىن وتكىزىپ, التاۋىندا جەڭىسكە جەتسە, ءۇش ويىنىندا تەڭ تۇسكەن. ءتىپتى ىشكى بىرىنشىلىكتەگى نەگىزگى قارسىلاستارى «تسرۆەنا زۆەزدا» كومانداسىنان دا باسىم تۇسكەن. ال ەۋروپا ليگاسىنىڭ توپتىق كەزەڭىندەگى ءبىرىنشى تۋر ويىنىندا نيدەرلاندىنىڭ «از الكمار» كومانداسىمەن تەڭ ءتۇستى. «پارتيزان» كلۋبىنىڭ قازىرگى جاعدايى وسىنداي.
«استانا» كومانداسى دا بۇگىنگى ويىندا جەڭىسكە جەتۋگە تاس-ءتۇيىن دايىن. «مانچەستەر يۋنايتەدپەن» وتكەن ماتچتان كەيىن ىشكى بىرىنشىلىكتە «جەتىسۋ» كومانداسىنان جەڭىلىپ قالعانى بولماسا, كەيىنگى ەكى ويىندا قارسىلاستارىنان باسىم ءتۇستى. ءتىپتى ەلوردا كومانداسى قوسالقى قۇرام فۋتبولشىلارىمەن ويناسا دا قارسىلاس كوماندانىڭ قاقپاسىنا جەتى گول سوقتى. ءبىر وكىنىشتىسى, «پارتيزانعا» قارسى وتەتىن ويىندا جاراقاتىنا بايلانىستى يۋري لوگۆينەنكو كومانداعا كومەكتەسە المايدى. بۇل تۋرالى باس باپكەر رومان گرينورچۋك «قايسارعا» قارسى وتكەن ماتچتان كەيىنگى ءباسپاسوز ءماسليحاتىندا ايتتى. ال قالعان جىگىتتەر ويىنعا تولىق دايىن دەيدى.
جوعارىدا اتاپ وتكەنىمىزدەي, بۇگىنگى ويىندا جەڭىس «پارتيزانعا» قاراعاندا «استاناعا» اۋاداي قاجەت. سەبەبى ءدال وسى ماتچ «استانانىڭ» پلەي-وفف كەزەڭىنە شىعۋ-شىقپاۋىن انىقتاپ بەرەدى. ال «پارتيزانعا» تەڭ ويىن دا جەتكىلىكتى. ولار وتكەن تۋردا «از الكمارمەن» تەڭ ويناپ, ءبىر ۇپاي ولجالاعان. جەرلەستەرىمىز العاشقى تۋردا ميۋ-دەن جەڭىلىپ, كوش سوڭىندا قالىپ قويدى. سوندىقتان بۇگىنگى ويىندا «استانا» قالايدا جەڭىسكە جەتىپ, ءۇش ۇپاي ولجالاۋدى كوزدەيدى. سونداي-اق توپتاعى ەكىنشى ويىندا «از الكمار» ءوز الاڭىندا «مانچەستەر يۋنايتەدتى» قابىلدايدى. بۇل ويىندا بىزگە اعىلشىن كومانداسىنىڭ جەڭىسكە جەتكەنى ءتيىمدى. ويتكەنى بۇگىن «استانا» جەڭىسكە جەتىپ جاتسا, ءۇش ۇپايمەن ەكىنشى ورىنعا كوتەرىلەدى. ال جەرلەستەرىمىز ءۇشىنشى تۋردا نيدەرلاندىعا قوناققا بارادى. «الكمارعا» قارسى ويىندا دا ۇپاي الاتىن بولساق, ەكىنشى ورىنمەن پلەي-وفف كەزەڭىنە جولداما الۋعا تولىق مۇمكىندىك بار.
سونىمەن قوس كوماندا اراسىنداعى كەزدەسۋ بۇگىن «استانا ارەنا» ستاديونىندا وتەدى. ماتچ نۇر-سۇلتان ۋاقىتى بويىنشا 20:50-دە باستالادى.
