وسىعان بايلانىستى اتقارۋشى قۇقىق قورعاۋ ورگاندارى, ۋچاسكەلىك پوليتسەيلەر جوعارىدا اتالعان ءىس-شاراعا قاتىستى ءتيىستى مالىمەتتەردى مەملەكەتتىك كىرىستەر دەپارتامەنتىنە ۇسىنۋى كەرەك. سالىق تولەۋدى دۇرىس كورسەتۋ بويىنشا جۇمىستى شيراتۋ كەرەكتىگىن ايتقان كەڭەس مۇشەلەرى تويحانالاردىڭ سالىق تولەۋ ماسەلەسىن كوتەردى. بۇل تۋرالى قالالىق قوعامدىق كەڭەستە كەڭىنەن تالقىلاندى.
شىمكەنت قالاسى بويىنشا مەملەكەتتىك كىرىستەر دەپارتامەنتى باسشىسىنىڭ ورىنباسارى نۇرپەيىس ق ۇلىمبەتوۆتىڭ ايتۋىنشا, 2019 جىلدىڭ 8 ايىنىڭ قورىتىندىسىمەن كوميتەت قۇزىرەتىنە جاتاتىن كىرىستەر بويىنشا مەملەكەتتىك بيۋدجەت جوسپارى 6 ملرد تەڭگە ارتىعىمەن قامتاماسىز ەتىلگەن. جوسپاردا 111 ملرد تەڭگە بولعان, ناقتى ءتۇسىم 117 ملرد تەڭگەنى قۇراپتى. سونىمەن قاتار اتالعان دەپارتامەنت تاراپىنان قالانىڭ بيۋدجەت تۇسىمدەرىن ۇلعايتۋ جانە قوسىمشا كىرىس كوزدەرىن انىقتاۋ ماقساتىندا ۇسىنىستار ايتىلدى.
سالىق تولەۋدەن جالتارعاندار قاتارىندا شاھارداعى سامالاداي سامساعان تويحانالار كوش باستاپ تۇر. دەرەككوزدەرگە سۇيەنسەك, شىمكەنتتە 118 تويحانا بار. الايدا تويحانالار سالىق تولەۋدەن جالتارعاندى ءجون كورەدى. ءتىپتى كەي تويحانادا 4 ادام عانا جۇمىس ىستەيدى دەپ كورسەتىلگەن. ول بويىنشا ءتيىستى حاتتاما تولتىرىلىپ, جاۋاپتى ورگانعا مىندەتتەمە جۇكتەلەدى.
شىمكەنت قالاسى 2020 جىلى تمد-نىڭ مادەني استاناسى بولىپ جاريالانۋىنا وراي كەڭەس مۇشەلەرى پوليتسيا دەپارتامەنتىنىڭ وكىلىنە شاھار اۋماعىنداعى زاڭسىز كوشە ساۋداسىن رەتتەۋ, كوشەدە قايىر سۇراۋشىلاردىڭ ارەكەتىن توقتاتۋ كەرەكتىگىن ايتتى. سونداي-اق قالاداعى الەۋمەتتىك ماڭىزى بار اۆتوبۋس باعىتتارىنىڭ تۇراقتى تاسىمالداۋ تاريفتەرىن بەلگىلەۋ تۋرالى قاعيدالارى قارالىپ, الداعى ۋاقىتتا قوعامدىق كەڭەس ارنايى كوميسسيا قۇراتىن بولدى.
شاھاردىڭ سانيتارلىق-ەپيدەميو-لوگيالىق جاعدايى تۋرالى بايانداما جاساعان شىمكەنت قالاسى قوعامدىق دەنساۋلىق ساقتاۋ دەپارتامەنتىنىڭ باسشىسى ءابدىماناپ تولەباەۆقا قوعامدىق كەڭەس جوعارى باعا بەرىپ, باسقا مەكەمەلەرگە ۇلگى بولسا دەگەندى ءبىلدىردى. سەبەبى شىمكەنت قالاسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى قوعامدىق كەڭەستىڭ وتىرىسىنا تۇگەل باسشىلىق قۇرامىمەن كەلگەن. كەڭەس مۇشەسى بەكايدار مۇسا ۇلىنىڭ ايتۋىنشا, اتالعان دەپارتامەنت بۇل ەسەپ بەرۋ ارقىلى قوعامدىق كەڭەسكە دەگەن قۇرمەتى جوعارى ەكەنىن كورسەتتى دەپ سانايدى.
قوعامدىق كەڭەستىڭ كۇن تارتىبىندەگى ماسەلەلەر بويىنشا كەڭەس مۇشەلەرى بىرقاتار ۇسىنىس ايتتى. ايتىلعان ۇسىنىستار مەن پىكىرلەر بويىنشا حاتتاما جاسالىپ, ولاردى ورىنداۋعا كۇش سالىناتىن بولادى.
جيىندا شىمكەنت قالاسى بويىنشا مەملەكەتتىك كىرىستەر, پوليتسيا جانە تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتتەرى ەسەپ بەرىپ, ءوز سالالارىنا قاتىستى ماسەلەلەردى ءسوز ەتتى. سونىمەن قاتار قالا اۋماعىن اباتتاندىرۋ, جاسىل جەلەكتى كۇتىپ ۇستاۋ جانە قورعاۋ, قالاداعى الەۋمەتتىك ماڭىزى بار اۆتوبۋس باعىتتارىنىڭ تۇراقتى تاسىمالداۋ تاريفتەرىن بەلگىلەۋ قاعيدالارى قارالىپ, نورماتيۆتىك-قۇقىقتىق اكت جوبالارى كەلىسىلدى.
شىمكەنت
