سەسسيادا ەڭ الدىمەن گرۋزيانىڭ وكىلى زۋراب اباشيدزە اسسامبلەيا توراعاسى ءارى گرۋزيا ادىلەت ءمينيسترىنىڭ ورىنباسارى گوچا لوردكيپانيدزە اتىنان ءسوز سويلەدى. زۋراب اباشيدزە حالىقارالىق سىبايلاس جەمقورلىققا قارسى اكادەمياعا قىزمەت ەتۋ جانە سىبايلاس جەمقورلىقپەن كۇرەسكە ۇلەسىن قوسۋدى ۇلكەن مارتەبە سانايتىنىن جەتكىزدى.
اسسامبلەيا قاتىسۋشىلارىن قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆ ەل پرەزيدەنتى اتىنان قۇتتىقتادى. قۇتتىقتاۋ سوزىندە مەملەكەت باسشىسى قاسىم-جومارت توقاەۆ: «تەوريا مەن تاجىريبەنىڭ سيمبيوزى, ۇزدىك الەمدىك تاجىريبەنى تالداۋ اكادەمياعا سىبايلاس جەمقورلىققا قارسى ءىس-قيمىل سالاسىندا جوعارى بىلىكتى مامانداردى دايىنداۋعا مۇمكىندىك بەرەدى» دەپ, اكادەميانىڭ جوعارى ءرولى مەن بىرەگەيلىگىن اتاپ وتكەن.
قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ ءوز كەزەگىندە ەلىمىزدىڭ سىبايلاس جەمقورلىققا قارسى كۇرەستە قول جەتكىزگەن جەتىستىكتەرى تۋرالى ايتىپ ءوتتى. «قازىرگى ۋاقىتتا قازاقستاندا سىبايلاس جەمقورلىق دەڭگەيىن تۇبەگەيلى ازايتۋعا باعىتتالعان رەفورمالاردىڭ جاڭا پاكەتىن دايىنداۋ بويىنشا جۇيەلى جانە دايەكتى جۇمىس جۇرگىزىلۋدە», دەدى ۆەدومستۆو باسشىسى.
سونىمەن قاتار قازاقستان ءۇشىن ەڭ نەگىزگى باسىمدىقتاردىڭ ءبىرى تۇرمىستىق سىبايلاس جەمقورلىقتى جويۋ ەكەنىن اتاپ ءوتتى. ء«بىرىنشى كەزەكتە مەملەكەتتىك قىزمەتتەردى بارىنشا تسيفرلاندىرۋ ارقىلى جوياتىن بولامىز. بۇگىن قازاقستان بۇۇ-نىڭ ءتيىستى رەيتينگىسىندە ەلەكتروندى ۇكىمەتتى دامىتۋ دەڭگەيى وتە جوعارى ەلدەر قاتارىنا كىرەدى. بارلىق جۇزەگە اسىرىلىپ جاتقان جۇمىستىڭ ناتيجەسى رەتىندە قازاقستان «Doing Business-2019» رەيتينگىندە 190 مەملەكەتتىڭ اراسىندا 28-ورىندا», دەدى ا.شپەكباەۆ.
ال حسجقا باسشىسىنىڭ مىندەتىن اتقارۋشى كريستيانا پون-حۋفناگل دەلەگاتسيانى اكادەميانى قولداۋدى كۇشەيتۋگە شاقىردى. سونداي-اق سىبايلاس جەمقورلىققا قارسى ءبىلىم بەرۋدى دامىتۋدا جاڭا جانە يننوۆاتسيالىق باعىتتاردى ىزدەستىرۋدە حسجقا-مەن بىرلەسىپ ارەكەت ەتۋ ماسەلەسىن قوزعادى.
«2011 جىلى قۇرىلعاننان باستاپ حسجقا سىبايلاس جەمقورلىققا قارسى زەرتتەۋلەر سالاسىندا جوعارى ءبىلىم بەرۋدىڭ ۇزدىك ۇلگىسىمەن قامتاماسىز ەتۋ ءۇشىن ءتيىمدى تاجىريبە ورتالىعى رەتىندە تۇراقتى قاتىسۋشىلارىمىزدىڭ, باعدارلامالارىمىزدىڭ بەدەلى ايتارلىقتاي ءوستى. مۇنىڭ بارىنە شەكتەۋلى رەسۋرستار ارقىلى قول جەتكىزىلدى», دەدى ءوز سوزىندە كريستيانا پون-حۋفناگل.
سونىمەن بىرگە جيىن بارىسىندا 2019 جىلدىڭ 15 قازانىندا فرانتسيانىڭ ستراسبۋرگ قالاسىندا ەۋروپا كەڭەسىنىڭ شتاب-پاتەرىندە ەلىمىزدىڭ ەۋروپا كەڭەسى سىبايلاس جەمقورلىققا قارسى مەملەكەتتەر توبىنا (گرەكو) قوسىلۋى تۋرالى قازاقستان مەن ەۋروپا كەڭەسى اراسىندا كەلىسىمگە قول قويۋ جوسپارلانعانى ءمالىم بولدى. ساراپشىلاردىڭ ايتۋىنشا, بۇل سىبايلاس جەمقورلىققا قارسى ساياساتتى جەتىلدىرۋ بويىنشا ەۋروپالىق مامانداردان ۇسىنىستار الۋ مۇمكىندىگىن بەرمەك. سونداي-اق سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ءبىرىنشى ورىنباسارى ولجاس بەكتەنوۆ وتىرىس سوڭىندا قاتىسۋشى مەملەكەتتەر ءوز ۇسىنىستارى مەن كەڭەستەرىن ەنگىزە الاتىن «نۇر-سۇلتان دەكلاراتسياسى» قابىلداناتىنىن مالىمدەدى.
قازاقستان حالىقارالىق اكادەميا جۇمىسىنا 2013 جىلدان باستاپ بەلسەندى ارالاسىپ كەلەدى. ال اكادەميا اۋستريا ۇكىمەتىنىڭ, ەۋروپانىڭ الاياقتىقپەن كۇرەس بيۋروسىنىڭ, بۇۇ ەسىرتكى جانە قىلمىس جونىندەگى باسقارماسىنىڭ باستاماسىمەن حالىقارالىق ۇيىم رەتىندە قۇرىلدى. ۇكىمەت وكىلدەرىن قوسا العاندا 46-دان استام ۇلتتىق جانە ينستيتۋتسيونالدىق ۇيىمداردىڭ دەلەگاتتارى ءۇش كۇن بويى ەلوردادا حسجقا ستراتەگياسىن تالقىلاماق. كۇن تارتىبىندە اكادەميا جۇمىسى ءۇشىن قاراجات جيناۋ, ونىڭ جۇمىس باعدارلاماسىن ىسكە اسىرۋ جانە جاڭا ستراتەگيانى ازىرلەۋ ماسەلەلەرى بار. بۇدان بولەك, حسجقا-نىڭ بىرقاتار سىبايلاس جەمقورلىققا قارسى باعدارلامالارى تالقىلاناتىن پانەلدىك پىكىرتالاس وتەدى.
