اتالمىش كورمە 1 قازان كۇنى «التىن ادامنىڭ» الەم مۋزەيلەرىنە شەرۋى» حالىقارالىق كورمەسى جوباسىنىڭ اياسىندا مالايزياداعى كۋالا-لۋمپۋر مۋزەيلەرىنىڭ دەپارتامەنتىندە اشىلدى.
وسىعان دەيىن حالىقارالىق كورمە بەلارۋس, رەسەي, ازەربايجان, قىتاي, پولشا, وڭتۇستىك كورەيا, وزبەكستان, سولتۇستىك ماكەدونيا جانە تۇركيا مۋزەيلەرىندە ءوتىپ, شەتەلدىكتەر قازاقستاننىڭ تاريحي-مادەني باي مۇراسى مەن تاڭعاجايىپ تاريحىنا ءتانتى بولدى. اسىرەسە ەلىمىزدىڭ ەڭ قۇندى جادىگەرى – بۇكىل الەمگە تانىمال «التىن ادامعا» اسا ءمان بەرىلدى.
ءبىر ايعا سوزىلاتىن كورمە بارىسىندا ۇلتتىق مۋزەي قورىنان باس-اياعى 346 جادىگەر ۇسىنىلماق. ال قازاقستان مەن مالايزيانىڭ اراسىنداعى مادەني بايلانىستارعا كەلسەك, ەكى ەلدىڭ ءوزارا ۇقساستىعى – كوپەتنوستى جانە كوپسالالى مەملەكەت سانالاتىندىعىندا. ەل استاناسى – كۋالا-لۋمپۋر ءزاۋلىم عيماراتتارىمەن كوز تارتادى. اسىرەسە ورتالىعىنا ورنالاسقان قوس مۇنارا بيىكتىگى جاعىنان دۇنيە ءجۇزى بويىنشا ەڭ بيىك عيمارات بولىپ ەسەپتەلەدى. ۇشكىر تۇمسىعى كوك تىرەگەن ساۋلەت تۋىندىلارىن كوزبەن كورگەن تۋريستەر مۇنارا نيۋ-يوركتەگى ەمپاير ستەيت بيلدينگ عيماراتى مەن چيكاگونىڭ ءزاۋلىم ۇيلەرىنەن دە اسىپ تۇسەدى دەگەندى العا تارتادى. قازاقستان ءۇشىن سونداي تەڭدەسسىز تۋىندى, رۋحاني جاۋھار بولىپ سانالاتىن «التىن ادام» دا كۋالا-ءلۋمپۋردى عاجايىپ اسەرگە بولەپ, تاعىلىمى تەرەڭ تاريحتىڭ تىلسىم سىرىنا جەتەلەيدى دەگەن ويدامىز.
قارشىعا كۇلەن
