وكىنىشكە قاراي, قوعامدا جاستاردى ەڭبەكقورلىققا تاربيەلەۋگە تەرەڭ ءمان بەرۋدە, ۇستازداردىڭ مارتەبەسىن بيىكتەتۋدە, الەۋمەتتىك دەڭگەيى تومەن تۇرعىندارعا جۇيەلى قولداۋ بەرۋدە, قىلمىستىڭ ءار قيلى كورىنىستەرىمەن كۇرەسۋدە قوردالانعان ماسەلە جەتەرلىك.
جولداۋ وزەكتى ماسەلەلەردىڭ قاتارىنا قازىرگى قوعامداعى جەمقورلىق پەن سىبايلاستىققا, بولاشاققا قاراي ۇمتىلمايتىن بوسبەلبەۋلىككە قارسى كۇرەس جاتقىزىلدى. ادام ءومىرىنىڭ قۇندىلىقتار مەن ونىڭ قۇقىقتارى مەن بوستاندىعىن بارلىعىنان جوعارى قويۋ دەموكراتيالىق ەلدەرگە ءتان قاسيەت بولىپ سانالادى. اسىرەسە وسى ماقساتتى جۇزەگە اسىرۋ ءۇشىن كومەك بەرىلۋگە ءتيىستى الەۋمەتتىك توپتار مەن جەكە ازاماتتار ءتىزىمى ناقتى تۇردە انىقتالعانى ءجون. سوندا ءبىزدىڭ ۇلكەن وندىرىستەن شەتتەپ قالعان, بىراق شاماسى كەلگەنشە شاعىن بيزنەسپەن اينالىساتىن كوپشىلىك قاۋىمعا اتاۋلى جانە ناقتى كومەك بەرىلەرى انىق. ءاربىر ءوندىرۋشى كاسىپكەر ءوزىنىڭ ەڭبەگىنىڭ قىزىعىن الدىمەن ءوزى كورۋى كەرەك. سوندا عانا ەكونوميكا سالاسىندا ىنتالانۋدان بەلسەندى دامۋ پروتسەسى جۇزەگە اسادى, العا قاراي وركەندەۋدىڭ قاينار كوزى اشىلادى.
«مەن حالىققا بەرگەن ۋادەلەرىمدى مىندەتتى تۇردە ورىندايمىن», دەيدى پرەزيدەنت ق.توقاەۆ. دەمەك, ەلدىڭ بولاشاعى ءسوز بەن ءىستىڭ ءوزارا ۇيلەسۋىندە. «ايتىلعان ءسوز – اتىلعان وق» دەيدى حالقىمىز. بارلىق دەڭگەيدەگى سوزگە دەگەن قۇرمەت كوبەيسە, وندا بولاشاققا قاراي قادامىمىز دا شيراق بولار ەدى, قوعامدىق ساناعا سەنىم دە كىرەتىنى بەلگىلى. وكىنىشكە قاراي, ءارتۇرلى دەڭگەيدە قۇرعاق ۋادە بەرۋ, ازاماتتاردى الدامسىراتۋ كورىنىس بەرىپ وتىرعانى جۇرتشىلىقتى قىنجىلتىپ كەلگەنى شىندىق. قوعامداعى تەرىس قۇبىلىستاردىڭ پايدا بولۋى سەبەپتەرىنىڭ استارىندا, ءتۇپ توركىنىندە شەشىلمەگەن الەۋمەتتىك-ەكونوميكالىق ماسەلەلەر, رۋحاني داعدارىستار مەن اۋىتقۋلار, الەۋمەتتىك پروبلەمالار جاتاتىنى بەلگىلى. ەندى ماسەلەلەردى كوپ بولىپ ەڭسەرۋگە ۇمتىلساق قانا جولداۋدا ايتىلعان سىندارلى ويلار جۇزەگە اسارى انىق. ديالوگتان ىسكە كوشەتىن كەزەڭ جاقىن دەگەن ويدامىز.
سەرىك نۇرمۇراتوۆ,
فيلوسوفيا عىلىمدارىنىڭ دوكتورى, پروفەسسور, فيلوسوفيا, ساياساتتانۋ جانە ءدىنتانۋ ينستيتۋتى ديرەكتورىنىڭ ورىنباسارى
