كورمەنىڭ اشىلۋ سالتاناتىندا ءسوز سويلەگەن چەحيانىڭ قازاقستانداعى توتەنشە جانە وكىلەتتى ەلشىسى رۋدولف گيكل: «الدىمەن بىرەر اي بۇرىن ءبىزدىڭ ۇسىنىسىمىزدى قابىل العان ۇلتتىق مۋزەيدىڭ باسشىلىعىنا شىن جۇرەكتەن ريزاشىلىعىمدى جەتكىزگىم كەلەدى, – دەپ العىسىن ءبىلدىردى, – شىنى بۇيىمدارىن ءوندىرۋ – ءبىزدىڭ تاريحىمىزدا ەجەلدەن بار ءداستۇر. زامان اعىمىنا ساي قارقىندى دامىپ كەلە جاتقان شىنى ونەرى ۇلتتىق ماقتانىشىمىز سانالادى. چەحتار مەن قازاقتاردىڭ مادەنيەتى ءبىر-بىرىنە ەتەنە جاقىن, بۇعان مەن قازاق ەلىنىڭ مادەنيەتىمەن جاقىن تانىسۋ ارقىلى كوز جەتكىزدىم. بۇل ۇقساستىق ەكى ەل اراسىنداعى ديپلوماتيالىق قارىم-قاتىناستى نىعايتا تۇسەدى. سونىمەن قاتار كورمە اۆتورى يرجي پاچينەكتىڭ از ۋاقىت ىشىندە شىنىدان جاسالعان كوركەم دۇنيەلەرىن ۇشاقپەن الىپ كەلگەنىنە ريزاشىلىعىمدى بىلدىرەمىن. مۇنى يرجي پاچينەكتىڭ ونەرگە دەگەن جانە ءوزىنىڭ وتانىنا دەگەن ادالدىعى دەپ ەسەپتەيمىن».
ەسىمى الەمگە ايگىلى شەبەر يرجي پاچينەك تە قازاقستانعا العاش رەت تابان تىرەپ تۇرعانىن تىلگە تيەك ەتتى. ول كورمەگە فلورا مەن فاۋنا الەمىن بەينەلەيتىن 30 ەكسپوناتىن ۇسىنىپ وتىر.
حالىقارالىق دەڭگەيدەگى اسەم شىنى شىعارۋشى تسۆيكوۆ ماڭىنداعى ءوزىنىڭ لينداۆا جانە كۋنراتيتسە شىنى زاۋىتىندا وندىرىلگەن تاڭعاجايىپ بۇيىمدارىمەن الەمگە كەڭىنەن تانىمال. يرجي پاچينەكتىڭ 12 شەبەرىمەن بىرگە چەحتىڭ ءداستۇرلى ءادىسى بويىنشا جاساعان بۇيىمدارى كوزدىڭ جاۋىن الادى. ونىڭ ايتۋىنشا, اۋەلى مەتالل ىسقىرعىشپەن شىنى ۇرلەنىپ, قولمەن جاسالعان پىشىندەر وتقا قىزدىرىلادى. مۇنىڭ ءبارى ارنايى تەحنيكامەن اتقارىلىپ, بالقىتۋ پەشى پايدالانىلادى. ال شىنى پەش 1900 گرادۋسقا دەيىن توتەپ بەرەتىن كورىنەدى. ونىڭ بۇل تاجىريبەسىن ۇيرەنۋگە الەمنىڭ ءار تۇكپىرىنەن كەلۋشىلەر كوپ, ولاردىڭ ىشىندە قازاقستاندىق ستۋدەنتتەر دە كەزدەسەتىنىن ەستىدىك.
كورمەدە ءسوز سويلەگەن ۇلتتىق مۋزەي ديرەكتورىنىڭ ورىنباسارى الماز نۇرازحان دا كەلەشەكتە بۇل سالا بويىنشا ەكى ەل ماماندارى اراسىندا تاجىريبە الماسۋ بايلانىستارى ورناتىلاتىنىن, كوركەم تۋىندىلار كورمەسى 20 قازانعا دەيىن جالعاساتىنىن ايتتى.
قارشىعا كۇلەن
