وسىدان ءبىر اپتا بۇرىن ەكى كوماندا الماتىدا جولىعىپ, «بارىس» حوككەيشىلەرى 3:1 ەسەبىمەن جەڭىسكە جەتكەن-ءدى. ەندى مىنە, چەليابىدە وتكەن كەزدەسۋدە جەرلەستەرىمىز تاعى دا وزدەرىنىڭ مىقتىلىعىن دالەلدەدى. ماتچتىڭ ءبىرىنشى كەزەڭىندە مۇزايدىن يەلەرى الماتىدا كەتكەن ەسەنى قايتارۋ ءۇشىن ءبىرىنشى مينۋتتان باستاپ ويىن تىزگىنىن ءوز قولدارىنا الدى. بىرنەشە قاۋىپتى شابۋىلدان سوڭ «تراكتور» ويىنشىلارى ءوز دەگەنىنەن جەتتى. 10-مينۋتتا ەسسە ۆيرتانەن ەسەپ اشىپ, كومانداسىن العا شىعاردى. بىراق جەرگىلىكتى جانكۇيەرلەردىڭ قۋانىشى ۇزاققا سوزىلمادى. ارادا ەكى مينۋت وتكەندە داررەن ديتس ەسەپتى تەڭەستىرىپ كەتتى. ويىننىڭ ءبىرىنشى جانە ەكىنشى كەزەڭدەرى تەڭ ەسەپپەن اياقتالدى.
ال ءۇشىنشى كەزەڭنىڭ ورتا تۇسىنان اسقاندا, دالىرەك ايتقاندا 52-مينۋتتا «بارىستىڭ» جاڭا ويىنشىسى كوربەن نايت مەرگەندىگىمەن كوزگە ءتۇسىپ, كومانداسىنا ماڭىزدى جەڭىس سىيلادى. وسىلايشا, «بارىس» بيىلعى ماۋسىمدا «تراكتورمەن» ەكىنشى رەت كەزدەسىپ, ەكەۋىندە دە باسىم ءتۇستى. بۇل جەڭىسىنەن كەيىن جەرلەستەرىمىز قحل-ءدىڭ تۋرنير كەستەسىندە 14 ۇپايمەن 2-ورىنعا كوتەرىلىپ الدى.
«بارىس» كەلەسى كەزدەسۋىن بۇگىن «بارىس ارەنادا» «كۋنلۋنعا» قارسى وتكىزەدى.
