«The Sutton Trust» ۇيىمىنىڭ مالىمدەۋىنشە, ەڭ جوعارى دەڭگەي – لوندوندا. ۇلىبريتانيا استاناسىنداعى ورتا مەكتەپ وقۋشىلارىنىڭ 41 پايىزى مەكتەپتەن تىس ۋاقىتتا تاعى دا ساباق وقيدى. وسىعان وراي, قايىرىمدىلىق ۇيىمى قالتالى ءارى جومارت جانداردى تۇرمىسى تومەن وتباسىنىڭ بالالارىنا قوسىمشا ساباق الۋى ءۇشىن قولداۋ كورسەتۋگە شاقىرعان. قايىرىمدىلىق قوردىڭ (جوعارىداعى ۇيىم) نەگىزىن قالاۋشى پيتەر لەمپل (Peter Lampl): ء«بىر سەانسى كەم دەگەندە 25 فۋنت ستەرلينگ تۇرادى, كوپتەگەن اتا-انالار مۇنداي سومانى تولەي المايدى», دەپتى. 25 فۋنت دەگەنىڭىز قازىرگى كۋرسپەن 11 925 تەڭگە بولادى. ءبىز انگليالىق جەكەمەنشىك وقىتۋ ورتالىقتارىنىڭ سايتتارىنا كىرىپ, باعالارىن باعامداپ كوردىك. كەيبىر قوسىمشا وقىتۋ ورتالىقتارى ءبىر بالانى دايىنداۋى ءۇشىن ساعاتىنا 15 پەن 41 فۋنتتىڭ (7155-19557 تەڭگە) اراسىندا اقشا الادى ەكەن.
جوعارىدا اتالعان ۇيىم ۇزدىك وقۋشىلاردىڭ قاتارىنا قوسىلۋعا ىقپال ەتكەنىمەن, ازداعان قولداۋدى قاجەت ەتەتىن الەۋمەتتىك جاعدايى ناشار وتباسىنىڭ بالالارىنا الاڭداۋشىلىق بىلدىرگەن. سونداي-اق كەي ورتالىقتاردىڭ جۇمىسىن كولەڭكەلى بيزنەسكە جاتقىزىپتى. جاعدايى جاقسى وتباسىلاردىڭ 34 پايىزى, ال جاعدايى تومەندەۋلەرىنىڭ 20 پايىزعا جەتپەيتىندەرى قوسىمشا وقىتاتىن مۇعالىمدەردى جالدايتىن كورىنەدى. ۇيىمنىڭ زەرتتەۋ قورىتىندىسىنا سايكەس, ورتا مەكتەپ مۇعالىمدەرىنىڭ تورتتەن ءبىر بولىگى سوڭعى ەكى جىلدا جەكە رەپەتيتور بولىپ جۇمىس ىستەگەن, ولاردىڭ كوپشىلىگى اتا-انالاردىڭ سۇراۋىمەن ساباقتان كەيىن ساباق بەرەدى.
شىندىعىندا, بۇل – بىزدە دە بەلەڭ الىپ بارا جاتقان ءۇردىس. نارىقتىق زاماندا مۇنداي مۇمكىندىكتىڭ مۇعالىمدەر ءۇشىن قوسىمشا تابىس كوزى بولىپ تۇرعانى راس. الايدا وسى جايت ماسەلەنىڭ ەكىنشى جاعىن العا شىعارادى. الەۋمەتتىك جاعىنان وقۋشىلاردىڭ اراسىندا پسيحولوگيالىق وزگەرىستەردىڭ تۋىنداۋىنا دا سەبەپ بولىپ وتىر. ياعني اتا-انالارى مەن مەكتەپ مۇعالىمىنىڭ نازارىنداعى, قولداۋىنداعى وقۋشىلار وزدەرىن تۇرمىسى تومەن وتباسىنداعى بالالاردان جوعارى ۇستايدى. ال ەلىمىزدە كەڭ تاراعان ءۇي تاپسىرماسىنا ادام جالداۋ جۇمىسباستى اتا-انالاردى ودان سايىن بالالارىنان الىستاتۋعا الىپ كەلەتىن كورىنەدى.
