قازاقستان • 30 قىركۇيەك، 2019

ءبىلىم الماسۋ باعدارلاماسىنىڭ قارقىنى قانداي؟

17 رەتكورسەتىلدى

ءبىلىم الماسۋ باعدارلاماسى (KSP – knowledge sharing program) شەڭبەرىندە جىل سايىنعى وڭىرلىك سەمينار ءوتتى. الەمنىڭ 70 ەلىندە 1 مىڭعا جۋىق تاقىرىپتىق زەرتتەۋلەردى قامتيتىن بۇل باعدارلامانى 2004 جىلى كورەيا رەسپۋبليكاسىنىڭ ەكونوميكا جانە قارجى مينيسترلىگى دايىنداعان. اتالعان جوبا كورەيانىڭ تاجىريبەسى نەگىزىندە ارىپتەس ەلدەرگە الەۋمەتتىك-ەكونوميكالىق قولداۋ كورسەتەتىن ستراتەگيالىق زەرتتەۋلەر مەن كونسۋلتاتسيا­لار كەشەنىن ازىرلەۋدى كوزدەيدى. وسى ماقساتتا قازاقستانمەن ارىپتەستىك 2009 جىلى باستالعان ەدى.  

جيىندا ءسوز العان كورەيا رەسپۋب­ليكاسى ەكونوميكا جانە قارجى مينيسترلىگىنىڭ وكىلى سۋ كيۋسيك وسى باعدارلامانىڭ ەۋرازيادا، ونىڭ ىشىندە قازاق­ستاندا جۇزەگە اسىرىلىپ وتىر­عانى ۇلكەن ماڭىزعا يە ەكە­نىن جەتكىزدى. «بۇل – ءدال ەۋرازيا اۋماعىندا العاش ۇيىم­داستى­رىلىپ وتىرعان ايماقتىق سەمينار. ەلىمىز ءبىلىم الماسۋ باعدار­لاماسىن دۇنيە جۇزىندەگى كوپتەگەن ەلدەر اراسىنداعى دوستىق جانە ارىپتەستىك قارىم-قاتى­ناسىمىزدى نىعايتۋ، سون­داي-اق ءوزىمىزدىڭ وزىق تاجى­ري­بەلەرىمىزبەن ءبولىسۋ ماق­ساتىندا جۇرگىزىپ كەلەدى. ءبىز شارادا ينۆەستيتسيا، ساۋدا سا­لا­سىنداعى كوشباسشىلار مەن جەتەكشى قىز­مەتكەرلەردىڭ باسىن قوسۋدى قالادىق. وسى جۇمىس بارىسىندا اتالعان سالادا جەمىستى جۇمىس ىستەپ جۇرگەن پراكتيك-مامانداردىڭ بايانداماسىن تىڭ­­­­داپ، ارنايى جوسپارلانعان پى­كىرتالاس الاڭدارىندا تالقىعا سالامىز»، دەدى سۋ كيۋسيك. ونىڭ ايتۋىنشا، پىكىرتالاسقا ءبىلىم الماسۋ باعدارلاماسىن جۇرگىزۋ، تيىمدىلىگى مەن ارتىقشىلىقتارى ارقاۋ بولادى. وسى ايماقتىق سەمينار اتالعان باعدارلامانىڭ ەۋرازياداعى بولاشاق الەۋەتىن ايقىنداۋعا، بولجام جاساۋعا جاقسى مۇمكىندىك بەرەدى.

ال ءىس-شارانى ۇيىمداس­تىرعان ەلىمىزدىڭ ۇلتتىق ەكونوميكا مينيستر­لىگىنىڭ دەپار­تامەنت باسشىسى بيبىگۇل ما­سەر­باەۆا الدىمەن ءبىلىم الما­سۋ باعدارلاماسىن ىسكە اسى­رۋ ارقىلى ەكىجاقتى ىن­تى­ماق­تاس­تىقتى ارتتىرۋعا اتسالىس­قا­نى ءۇشىن ەكى ەل ماماندارىنا العىس ايتتى. «قازاقستان – حا­لىق­ارالىق ۇيىمدارمەن ءوزارا ءىس-قيمىل جانە ورتالىق ازيا ەلدەرى اراسىندا ماڭىزدى جوبالاردى ىسكە اسىرۋ  بويىن­شا كوش باستاپ تۇرعان ەل. 2010 جىلدان باستاپ كورەيا  رەس­پۋب­ليكاسىنىڭ ەكونوميكا جانە قارجى مينيسترلىگى مەن قازاقستان رەسپۋبليكاسىنىڭ ۇلت­تىق ەكونوميكا مينيسترلىگى ارا­سىندا ءوزارا تۇسىنىستىك تۋرالى نەگىزدەمەلىك مەموراندۋم جاسالدى. وتكەن جىلدارى شاعىن جانە ورتا بيزنەستى دا­مىتۋ، نەسيەگە كەپىلدىك بە­رۋ سالاسىنداعى زەرتتەۋلەر، سونداي-اق يندۋستريالىق-ين­نوۆا­تسيالىق دامۋدى قولداۋ، ينستيتۋتسيونالدىق مەملەكەت-جەكەمەنشىك ارىپتەستىك تابىس­تى ىسكە اسىرىلدى»، دەدى. ب.ما­سەر­­باەۆا­نىڭ مالىمدەۋىن­شە، ايماقتىق سەمينار جىل سايىن ءار ەلدە ۇيىمداستىرىلادى. بيىل قازاقستاندا وتكەن شارا­دا «ينۆەستيتسيالار جانە ونەركاسىپتى دامىتۋ» تاقىرىبى تالقىعا ءتۇسىپ، وڭىرلىك، جاھاندىق جانە كورەي ساراپشىلارى ءۇشىن پىكىر الماسۋ الاڭىنا اينالدى.

سەميناردا سپيكەر رەتىندە بايانداما جاساعان «Kazakh Invest» ۇلتتىق كومپانياسىنىڭ مەنەد­جەرى دانيار ايتقۇلوۆ ءبىلىم الماسۋ باعدارلاماسىنىڭ ناتيجەسىندە اتقارىلعان جۇمىس­تارعا توقتالدى. «ەكونوميكانىڭ باسىم سەكتورلارىنا شەتەلدىك ينۆەستيتسيالاردى تارتۋ جانە ينۆەستيتسيالىق جوبالاردى جان-جاقتى قولداۋ جولىمەن قازاقستان رەسپۋبليكاسىنىڭ ورنىقتى الەۋمەتتىك-ەكونو­ميكا­لىق دامۋىنا جاردەمدەسۋ ماقساتىندا جۇمىس ىستەيتىن ۇلتتىق كومپانيا جالپى قۇنى 39 ملرد دوللاردى قۇرايتىن 156 جوبانى يەلەنەدى. سونىڭ ىشىندە 86 جوبا ەلگە 21 ملرد دوللار ينۆەستيتسيا تارتتى. ال 18 ملرد دوللارعا لايىقتالعان 71 جوبا ءالى جۇزەگە اسىرىلىپ جاتىر. وسى ناتيجەگە قول جەت­كىزۋدە كورەيا ەلىمەن ارىپ­تەستىك ورناتۋىمىزدىڭ ايرىقشا ۇلەسى بار»، دەدى. د.ايت­قۇلوۆ­تىڭ ايتۋىنشا، ءبىلىم الماسۋ باعدارلاماسى اياسىندا كو­رەي­لىك ساراپشىلار «Kazakh Invest» ۇلتتىق كومپانياسىنا ءار ايماقتىڭ ەرەكشەلىگىنە قاراي جەمىستى جۇمىس ىستەيتىن وڭىرلىك ماماندار دايىنداۋدى ۇسىنعان. وسىنىڭ نەگىزىندە قازىر ۇلتتىق كومپانيانىڭ ەلىمىزدەگى بار­لىق وبلىسىنداعى ارنايى ما­مان­دارى ءوز وڭىرلەرىندەگى الەۋمەتتىك-ەكونوميكالىق ەرەك­شەلىكتەرىن ەسكەرىپ، كومپانيا مەن اكىمدىكتەر اراسىنداعى دەلدال قىزمەتىن اتقارادى. ناتيجەسىندە كومپانيانىڭ الەۋەتى ارتىپ، ەل دامۋىنا قار­قىن­دى ەڭبەك ەتۋىنە ىقپال ەتە باستادى.

سوڭعى جاڭالىقتار

جولدىڭ جاۋى – اۋىر جۇك كولىكتەرى

ايماقتار • بۇگىن، 13:14

ساقتىق شارالارىن ساقتاۋ ماڭىزدى

كوروناۆيرۋس • بۇگىن، 13:08

تۋريزم دامىسىن دەسەك...

قازاقستان • بۇگىن، 12:55

ءتۋريزمنىڭ تۇرالاعان تۇستارى كوپ

قازاقستان • بۇگىن، 12:46

يتاياقپەن اس ىشكەن ايەل

رۋحانيات • بۇگىن، 10:30

ۇقساس جاڭالىقتار