پرەمەر-مينيستر جاڭا اكىمدى قاراعاندى وبلىسىنىڭ اكتيۆىنە تانىستىرا وتىرىپ, ونىڭ ۇلكەن تاجىريبەسى مەن جوعارى بىلىكتىلىگىن اتاپ ءوتتى.
«جاڭا اكىمنىڭ الدىنا ءوڭىردى الەۋمەتتىك-ەكونوميكالىق دامىتۋ بويىنشا سالماقتى مىندەتتەر قويىلدى. ەلباسى ن. نازارباەۆ پەن مەملەكەت باسشىسى ق. توقاەۆ قاراعاندى وبلىسىنىڭ دامۋىنا ەرەكشە كوڭىل بولەدى. ج. قاسىمبەكتىڭ وسى جوعارى سەنىمدى اقتايتىنىنا سەنىمدىمىن», — دەدى ا. مامين.
پرەمەر-مينيستر وسىعان دەيىن بولعان اكىم ەرلان قوشانوۆقا اتقارعان جۇمىستارى ءۇشىن العىس ءبىلدىرىپ, جاڭا قىزمەتىندە ساتتىلىك تىلەدى.
جەڭىس ماحمۇد ۇلى قاسىمبەك 1975 جىلى 7 مامىردا جامبىل وبلىسىنىڭ شۋ قالاسىندا دۇنيەگە كەلگەن. قازاق مەملەكەتتىك ساۋلەت-قۇرىلىس اكادەمياسىن «ساۋلەتشى-ديزاينەر» ماماندىعى بويىنشا جانە ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىن «مەملەكەتتىك جانە جەرگىلىكتى باسقارۋ» ماماندىعى بويىنشا اياقتاعان.
ەڭبەك جولىن 1997 جىلى قازبسقا-دا تاعىلىمگەر-زەرتتەۋشى رەتىندە باستاعان. ءتۇرلى جىلدارى «تەمىربانك» ااق باس مامانى, قر مونوپولياعا قارسى ساياسات كوميتەتىنىڭ ءبولىم باسشىسى, قر كولىك جانە كوممۋنيكاتسيا مينيسترلىگىنىڭ سۋ كولىگى دەپارتامەنتىنىڭ ديرەكتورى, «اقتاۋ حالىقارالىق تەڭىز ساۋدا پورتى» رمك ديرەكتورى, قر كولىك جانە كوممۋنيكاتسيالار ۆيتسە-ءمينيسترى, قر كولىك جانە كوممۋنيكاتسيالار مينيسترلىگىنىڭ جاۋاپتى حاتشىسى لاۋازىمدارىن اتقارعان. 2014 جىلعى ناۋرىزدا قر كولىك جانە كوممۋنيكاتسيالار ءمينيسترى بولىپ, كەيىن قر ينۆەستيتسيالار جانە دامۋ ءمينيسترى بولىپ, قر يندۋستريا جانە ينفراقۇرىلىمدىق دامۋ مينيسترلىگىنىڭ باسشىسى بولىپ تاعايىندالعان. 2019 جىلعى 25 اقپاننان باستاپ قازىرگى تاڭعا دەيىن قر پرەمەر-ءمينيسترىنىڭ ورىنباسارى قىزمەتىن اتقاردى.
