«مانچەستەر يۋنايتەد» كومانداسىن جانكۇيەرلەرگە تانىستىرۋدىڭ ءوزى ارتىق بولار. 2017 جىلعى ەۋروپا ليگاسىنىڭ چەمپيونى بۇگىندە ۋەفا كلۋبتار رەيتينگىندە 10-ورىندا كەلەدى. سونداي-اق كلۋب جازعى ترانسفەر كەزەڭىندە 19 فۋتبولشىسىمەن قوشتاستى. ولاردىڭ اراسىندا بەلگيالىق شابۋىلشى رومەلۋ لۋكاكۋ, يسپانيالىق جارتىلاي قورعاۋشى اندەر ەررەرا, ەكۆادورلىق قورعاۋشى انتونيو ۆالەنسيا بار. سونىمەن قاتار چيليلىك شابۋىلشى الەكسيس سانچەس, اعىلشىندىق تاجىريبەلى قورعاۋشى كريس سموللينگ پەن تاعى 9 فۋتبولشىنى جالعا بەرگەن. ءبىر كوماندالىق قۇرامدى تاراتىپ جىبەرگەن ميۋ ىشكى بىرىنشىلىكتە اجەپتاۋىر السىرەپ قالدى. اعىلشىن پرەمەر-ليگاسىنىڭ العاشقى بەس تۋردىڭ ەكى ويىنىندا جەڭىسكە جەتسە, ەكى ماتچتا تەڭ ءتۇستى. ال ءبىر ويىندا قارسىلاستارىنا ەسە جىبەردى. العاشقى تۋردا «چەلسيدى» 4:0 ەسەبىمەن تاس-تالقانىن شىعارعانى بولماسا, قالعان ويىنداردا مانچەستەر كومانداسىنىڭ جاعدايى اسا ءماز ەمەس. بەسىنشى تۋردا ءوز الاڭىندا «لەستەر» كلۋبىن قابىلداپ, 8-مينۋتتا ماركۋس راشفوردتىڭ پەنالتيدەن سوققان جالعىز گولىنىڭ ارقاسىندا ارەڭ جەڭىسكە جەتتى. قۇلدىراۋ كەزەڭىن باستان وتكەرىپ جاتقان اعىلشىندىق كلۋبتى «استانا» دا جەڭىپ كەتۋى عاجاپ ەمەس.
ەلوردا كومانداسى ەل چەمپيوناتىنداعى سوڭعى تۋردا «شاحتەر» كومانداسىن جەڭىپ, انگلياعا جاقسى كوڭىل-كۇيدە اتتاندى. سونداي-اق «استانا» چەمپيوندار جانە ەۋروپا ليگاسىنىڭ توپتىق كەزەڭىندە ەۋروپانىڭ توپ-5 چەمپيوناتىنداعى «اتلەتيكو مادريد», «ۆيلياررەال» (يسپانيا), «سەلتيك» (شوتلانديا), «بەنفيكا», «سپورتينگ» (پورتۋگاليا) سەكىلدى ازۋلى كوماندالارمەن كەزدەسىپ, تاجىريبە جيناقتاعان. بۇعان دەيىن «مانچەستەر يۋنايتەد» كومانداسى «استانانىڭ» چەمپيوندار ليگاسىنىڭ العاشقى ىرىكتەۋ كەزەڭىندەگى قارسىلاسىن رۋمىنيانىڭ چفر (2:1), شۆەيتساريانىڭ «بازەل» (2:1) كوماندالارى جەڭىپ كەتسە, رەسەيدىڭ ورتانقول كوماندالارىنىڭ ءبىرى «روستوۆپەن» (1:1) تەڭ تۇسكەن. مىنە, وسى ناتيجەلەردەن-اق فۋتبولدىڭ بولجاپ بولمايتىن ويىن ەكەنىن اڭعارامىز. چەمپيوندار ليگاسىنىڭ بىلتىرعى ماۋسىمىنداعى «ليۆەرپۋلدىڭ», «توتتەنحەمنىڭ» كامبەكتەرىن فۋتبول جانكۇيەرلەرى بىرازعا دەيىن ۇمىتپايتىنى انىق.
وعان قوسا, «استانا» فۋتبولشىلارى دا جەڭىس ءۇشىن بارىن سالاتىنىن ايتىپ جاتىر. مىسالى, كوماندانىڭ ۇزدىك قورعاۋشىلارىنىڭ ءبىرى دميتري شومكو مانچەستەرگە الاڭدا «ساياحاتتاۋ» ءۇشىن ەمەس, جەڭىس ءۇشىن بارىمىزدى سالۋعا بارامىز دەيدى.
«ارينە, قازاقستاندىق فۋتبول جانكۇيەرلەرىنە ەۋرودودانىڭ كۇزگى ماۋسىمىن سىيلاعانىمىزعا قۋانىشتىمىز. سونداي-اق توپتاعى العاشقى كەزدەسۋدى ازۋلى «مانچەستەر يۋنايتەد» كومانداسىنا قارسى وتكىزەمىز. قۇرامىندا جۇلدىزدى فۋتبولشىلارى بار «مانچەستەر يۋنايتەد» ءبىزدىڭ توپتىڭ ۇزدىگى ەكەنىنە ەشكىم كۇمان كەلتىرمەيدى. بىراق جۇلدىزدار دا ادام ەكەنىن ۇمىتپاۋىمىز كەرەك. ولار دا قاتەلەسۋى مۇمكىن. جەڭىس ءۇشىن بارامىزدى سالامىز», دەيدى شومكو.
ەۆگەني پوستنيكوۆ توپتىق كەزەڭگە جەرەبە تارتۋ ءراسىمى الدىندا «ارسەنال» نەمەسە ميۋ ءبىزدىڭ توپقا تۇسسە ەكەن دەگەن وي بولعانىن جانە سىرت الاڭدا ميۋ-دان ۇپاي الۋعا تىرىساتىندىقتارىن جەتكىزدى. «مەنىڭشە, «مانچەستەر يۋنايتەد» الەم بويىنشا جانكۇيەرلەرى ەڭ كوپ, ءنومىرى ءبىرىنشى كوماندا. اتموسفەرانى سەزىنۋ جانە اعىلشىن كومانداسىنىڭ دەڭگەيىن كورۋ وتە قىزىقتى بولماق. قانشا دەگەنمەن توپ كوماندا عوي. قىزىقتى ويىن بولاتىنىنا كۇمانىم جوق. جوق دەگەندە مانچەستەردەن ءبىر ۇپاي الۋعا تىرىسامىز», دەيدى قورعاۋشى.
قوس كوماندا اراسىنداعى كەزدەسۋ بۇگىن تۇندە وتەدى. ماتچتى «Qazsport» تەلەارناسىنان ساعات 01:00-دە تىكەلەي ەفيردەن تاماشالاي الاسىزدار.
