ابۋ-رايحان بيرۋني اتىنداعى يران-قازاقستان ەكونوميكالىق زەرتتەۋلەر ورتالىعىنىڭ اشىلۋ سالتاناتىندا ءسوز العان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ حالىقارالىق بايلانىستار جانە يننوۆاتسيالار جونىندەگى پرورەكتورى اقبوتا نيازقىزى ورتالىق اشۋ يدەياسى اتالعان وتاندىق جوو-نىڭ ءبىلىمدى ينتەرناتسينولداندىرۋ ستراتەگياسىنان تۋىنداعانىن ايتتى. «قازاقستان-يران قاتىناستارىنىڭ تاريحىندا تۇڭعىش رەت 2018 جىلى 6 مامىردا ۋنيۆەرسيتەتىمىزدىڭ باستاماسىمەن جانە دەلەگاتسياسىنىڭ قاتىسۋىمەن يراندا يران-قازاقستان مادەني-ءبىلىم بەرۋ ورتالىعى اشىلعان بولاتىن. يرانداعى ورتالىقتا قازاق ءتىلى, تاريحى مەن مادەنيەتى بويىنشا كۋرستار ءبىر جارىم جىلدان بەرى وقىتىلىپ كەلەدى. مىنە, وسى جوباعا جاۋاپ رەتىندە بىزدە دە ورتالىق اشىلدى. ءبىر ەرەكشەلىگى, ءبىزدىڭ ورتالىق – يران مەملەكەتىنىڭ شەتەلدەگى العاشقى جوباسى», دەدى ۇلتتىق ۋنيۆەرسيتەت پرورەكتورى. ونىڭ ايتۋىنشا, جاڭا ورتالىق ەكونوميكا سالاسىنداعى جاڭالىقتاردى زەرتتەۋگە باعىتتالعاندىقتان, مۇندا ۋنيۆەرسيتەتتەگى ەكونوميكا كافەدراسىنىڭ پروفەسسور-وقىتۋشىلارى مەن ستۋدەنتتەر جۇمىس ىستەيدى.
ال اشىلۋ راسىمىنە قوناق بولىپ كەلگەن اللامە تاباتاباي ۋنيۆەرسيتەتىنىڭ پرەزيدەنتى حۋسەين ساليمي ورتالىق جۇمىسى قوس جوو-نىڭ اراسىنداعى دوستىق قارىم-قاتىناستى ودان ءارى جاقسارتا تۇسەرىنە ۇمىتتەنەدى. «يران مەن قازاقستاننىڭ ەكونوميكالىق جۇيەسى, سونداي-اق ەكى ەلدىڭ ۇلتتىق جانە حالىقارالىق ەكونوميكاسىنداعى الماسۋ مودەلى ءارتۇرلى. ارينە بىرقاتار ەكونوميكالىق ۇقساس تابىس كوزدەرى, ايتالىق, مۇناي سالاسىندا ەكى ەلدىڭ ورتاق پورتى بار. دەسە دە وسى ەكى ەرەكشەلىك پەن وزگەشەلىك قوس مەملەكەتتىڭ ەكونوميكاسى مەن قالىپتاسقان اكادەميالىق جۇيەسىنە پايدالى بولادى دەگەن ويدامىن», دەدى ح.ساليمي.
