ەكونوميكا • 17 قىركۇيەك، 2019

قازاقستان «حالىقارالىق ساۋدا» ينديكاتورى بويىنشا دۇنيەجۇزىلىك بانك رەيتينگىندە 21-پوزيتسياعا كوتەرىلدى

28 رەتكورسەتىلدى

پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ساۋدا جانە ينتەگراتسيا ۆيتسە-ءمينيسترى ازامات اسقار ۇلى قازاقستاننىڭ «Doing Business» رەيتينگىندەگى، سونداي-اق جاھاندىق لوگيستيكالىق تيىمدىلىك رەيتينگىندەگى (LPI) پوزيتسياسىن جاقسارتۋ بويىنشا قابىلدانىپ جاتقان شارالار تۋرالى باياندادى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى. 

ساۋدا جانە ينتەگراتسيا مينيسترلىگى «Doing Business» رەيتينگىندە «حالىقارالىق ساۋدا» يندەكسى بويىنشا جاۋاپتى.

دۇنيەجۇزىلىك بانكتىڭ «Doing Business» رەيتينگىندە «حالىقارالىق ساۋدا» ينديكاتورى بويىنشا قازاقستان وتكەن جىلمەن سالىستىرعاندا 123-ورىننان 21-پوزيتسياعا كوتەرىلە وتىرىپ، 102-ورىندا تۇر. 

پوزيتسيانى جاقسارتۋعا ەلەكتروندىق كەدەندىك دەكلاراتسيالاۋدى ەنگىزۋ، كەدەندىك رەسىمدەۋ ءۇشىن الىم مولشەرلەمەسىن تومەندەتۋ جانە كەدەندىك باقىلاۋدى رەسىمدەۋ كەزەڭىنەن كەدەننەن كەيىنگى باقىلاۋعا كوشىرۋ شارالارى اسەر ەتتى.

سونىمەن قاتار، كورسەتكىشتەردىڭ ودان ءارى جاقسارۋىنا قابىلدانعان بىرقاتار شارالار اسەر ەتۋى مۇمكىن، بىراق ولار ءالى ەسكەرىلمەگەن:

  1. دەكلاراتسيا ءۇشىن كەدەندىك الىمدار مولشەرلەمەلەرىن (دەكلاراتسيانىڭ نەگىزگى پاراعى ءۇشىن 19 000 تەڭگەدەن جانە قوسىمشا پاراق ءۇشىن 7 000 تەڭگەدەن 20 000 تەڭگەگە دەيىن) تومەندەتۋ (2018 جىلعى قاراشا). 

  2. ەلەكتروندىق ۇكىمەتتىڭ تولەم ءشليۋزى ارقىلى كەدەندىك تولەمدەر مەن سالىقتاردى تولەۋ مۇمكىندىگىن ەنگىزۋ (ۋاقىتى 1-3 جۇمىس كۇنىنەن 5-7 مينۋتقا دەيىن قىسقاردى).

  3. ەكسپورتتىق-يمپورتتىق وپەراتسيالار بويىنشا بىرىڭعاي تەرەزەنى (2019 جىلعى 27 ناۋرىز) ىسكە قوسۋ. جۇمىستى 2019 جىلدىڭ سوڭىنا دەيىن اياقتاۋ جوسپارلانۋدا. بۇگىندە «بىرىڭعاي تەرەزە» كومپونەنتتەرىن تەستىلەۋ جۇرگىزىلۋدە.

ۆيتسە-ءمينيستردىڭ ايتۋىنشا، بيزنەس ورتانى جاقسارتۋ بويىنشا زاڭنامالىق تۇزەتۋلەردىڭ سەگىزىنشى پاكەتىن قالىپتاستىرۋ شەڭبەرىندە دەرەكتەردى قورعاۋ، مەملەكەتتىك مەكەمەلەر اراسىندا دەرەكتەر الماسۋعا جانە جەتكىزۋگە وكىلەتتىكتەر، سايكەستەندىرۋ، اۋتەنتيفيكاتسيا جانە اۆتوريزاتسيالاۋ، دەرەكتەر ساپاسى ماسەلەلەرى، ەلەكتروندىق قۇجاتتار، ەلەكتروندىق مۇراعاتتاۋ، زياتكەرلىك مەنشىك قۇقىعى جانە دەرەكتەر بازاسىنا مەنشىك قۇقىعى جانە باسقالار بويىنشا ۇسىنىستار ەنگىزىلدى. ولاردى شەشۋ ءۇشىن 10-نان استام زاڭدى وزگەرتۋ قاجەت. 

قازان ايىندا وتكىزىلگەن رەفورمالاردى تالقىلاۋ جانە ولاردى ىسكە اسىرىلعان شارالارعا ەسەپكە الۋ ءۇشىن ۆاشينگتون قالاسىنداعى دۇنيەجۇزىلىك بانكتىڭ ساراپشىلارىمەن كەزدەسۋ وتكىزۋ جوسپارلانعان. 

دۇنيەجۇزىلىك بانكتىڭ «ساۋدا جانە كولىك ينفراقۇرىلىمىنىڭ دامۋى» رەيتينگىندە قازاقستان 71-ورىندا تۇر. 

قازاقستان رەسپۋبليكاسىنىڭ اتالعان رەيتينگتەگى ۇستانىمىن جاقسارتۋ شەڭبەرىندە ساۋدا جانە ينتەگراتسيا مينيسترلىگى يندۋستريا جانە ينفراقۇرىلىمدىق دامۋ مينيسترلىگىمەن بىرلەسىپ، ەل ىشىندە ساۋدانى دامىتۋدى جانە سىرتقى نارىقتارعا شىعۋ مۇمكىندىگىن قامتاماسىز ەتۋگە باعىتتالعان كوپ فورماتتى ساۋدا-ءبولۋ ينفراقۇرىلىمىن قۇرۋ بويىنشا اۋقىمدى جۇمىس جۇرگىزۋدە.

ەل ىشىندە جۇيە وركەنيەتتى ساۋدا ءۇشىن جاعداي جاساۋعا، حالىقتىڭ جەتكىلىكتى ساۋدا ينفراقۇرىلىمىمەن جانە تاۋارلاردىڭ ۇلكەن اسسورتيمەنتىمەن قامتاماسىز ەتىلۋىن ارتتىرۋعا، حالىق تۇتىناتىن تاۋارلارعا باعانى تومەندەتۋ ءۇشىن نارىقتا باسەكەلەستىكتى كۇشەيتۋگە مۇمكىندىك بەرەدى.

ەكسپورتتى دامىتۋ شەڭبەرىندە جۇيە تاۋارلاردى ءوزارا جەتكىزۋدى، ولاردىڭ قازاقستان ارقىلى ءترانزيتىن قامتاماسىز ەتەدى، سونداي-اق باسقا ەلدەرگە ەكسپورتتاۋ ءۇشىن ءبىزدىڭ كورشىلەرىمىزبەن بىرلەسىپ وندىرۋشىلەردىڭ بىرىڭعاي پۋلىن قۇرۋ ءۇشىن نەگىز بولادى.

بۇگىنگى كۇنى ساۋدا-تاراتۋ جۇيەسىن قۇرۋ ءۇشىن 2019 جىلى اياقتاۋ مەرزىمىمەن قاراعاندى، پاۆلودار، سولتۇستىك قازاقستان، جامبىل، باتىس قازاقستان وبلىستارىندا 5 كوتەرمە-تاراتۋ ورتالىعىن سالۋ جۇزەگە اسىرىلۋدا. 2020 جىلى 3 وڭىردە – الماتى، اقتوبە جانە سەمەي قالالارىندا جالپى كولەمى 96 مىڭ شارشى مەتر قۇرايتىن تاراتۋ ورتالىقتارىن سالۋ جوسپارلانۋدا. 

2018 جىلدىڭ قورىتىندىسى بويىنشا ەلىمىزدە 26 كولىك-لوگيستيكالىق ورتالىقتارى قولدانىستا، 2022 جىلعا دەيىن قوسىمشا جالپى الاڭى 1 067 065 شارشى مەتر قۇرايتىن 14 كولىك-لوگيستيكالىق ورتالىق سالۋ جوسپارلانۋدا.

ء«بىزدىڭ مينيسترلىكتىڭ نەگىزگى مىندەتتەرىنىڭ ءبىرى - كولىكتىك-لوگيستيكالىق جانە ساۋدا ينفراقۇرىلىمدارىن بىرىكتىرۋ. وسىنداي ينفراقۇرىلىمدىق وبەكتىلەرىنىڭ سانى جانە ساپاسى ۇلعايۋىنا قاراي ساۋدا شىعىندارىن قىسقارتۋ اسەرى كۇشەيتىلەتىن بولادى. باعالاردىڭ تومەندەۋى تۇتىنۋشى ءۇشىن تىكەلەي اسەر ەتەدى»، دەدى ا. اسكار ۇلى.

سونىمەن قاتار ۆيتسە-مينيستر LPI رەيتينگىنىڭ فوكۋسى ۇنەمى وزگەرىپ وتىراتىنىن اتاپ ءوتتى. 2007 جىلى رەيتينگ تەك جاريالانعان كەزدە، ول ءبىرىنشى كەزەكتە ساۋدانى وڭايلاتۋعا جانە شەكاراداعى كەدەرگىلەردى جويۋعا باعىتتالعان. بۇگىندە رەيتينگ ىشكى لوگيستيكا فاكتورلارىمەن: جەتكىزۋ تىزبەگىنىڭ الەۋمەتتىك-ەكونوميكالىق تۇراقتىلىعى، داعدىلار مەن وقىتۋ، قورشاعان ورتاعا اسەرى ءوزارا بايلانىستى.

LPI رەيتينگىسىندە ەلدىڭ ۇستانىمىن جاقسارتۋ ماقساتىندا مەملەكەتتىك-جەكەشەلىك ارىپتەستىك جوباسى شەڭبەرىندە ساۋدا جانە ينتەگراتسيا مينيسترلىگى جۇكتەردى قاداعالاۋ مۇمكىندىگىنىڭ كورسەتكىشى بويىنشا استانا-1 اقپاراتتىق جۇيەسىندە يمپورتتىق-ەكسپورتتىق وپەراتسيالار جۇيەسىن ەلدىڭ كولىك-لوگيستيكالىق جۇيەسىمەن ىقپالداستىرۋعا مۇمكىندىك بەرەتىن ەلەكتروندىق جۇيەنى ەنگىزۋ ماسەلەلەرىن پىسىقتاۋدا.

ء«بىز رەيتينگتەگى پوزيتسيالاردىڭ جاقسارۋىن تەك شەتەلدىك ينۆەستورلاردى تارتۋ ءۇشىن عانا قاداعالامايمىز. ءبىزدىڭ نەگىزگى مىندەتىمىز – جولداردى جاقسارتۋ، تاۋارلاردى ساقتاۋدىڭ جاڭعىرتىلعان ينفراقۇرىلىمىن قۇرۋ، حالىق پەن كاسىپكەرلىك سۋبەكتىلەرىنىڭ شەكارادان تەز جانە ىڭعايلى ءوتۋى ارقىلى حالىقتىڭ ءومىر ءسۇرۋ ساپاسىن ارتتىرۋ»، دەپ تۇيىندەدى ساۋدا جانە ينتەگراتسيا ۆيتسە-ءمينيسترى ا. اسقار ۇلى. 

سوڭعى جاڭالىقتار

ءجۇز جىل

100 • كەشە

تاپا تال تۇستەگى قاراقشىلىق

ايماقتار • 20 قاراشا، 2019

ۇقساس جاڭالىقتار