ەكى كوماندا اراسىنداعى كەزدەسۋدىڭ ءبىرىنشى كەزەڭى تەڭ ەسەپتە اياقتالدى. شابۋىلشىلار ەسەپتى اشۋعا قانشا تىرىسقانىمەن, قورعاۋشىلار مەن قاقپاشىلار ءساتتى ونەر كورسەتتى. دەگەنمەن ەكىنشى كەزەڭنىڭ ەكىنشى مينۋتىندا الاڭ يەلەرى «بارىس» قاقپاسىنا شايبا سوعىپ, ەسەپتە العا شىعىپ الدى. شايبا اۆتورى – يگور رۋدەنكوۆ. ارادا التى مينۋت وتكەندە رومان ستارچەنكو مەرگەندىگىمەن كوزگە ءتۇسىپ, ەسەپتى تەڭەستىردى.
كەزدەسۋدىڭ ءۇشىنشى كەزەڭى وتە تارتىستى باستالدى. ويتكەنى جەڭىس ەكى كومانداعا دا اۋاداي قاجەت بولاتىن. «بارىس» بۇعان دەيىنگى ءتورت ويىننىڭ ەكەۋىندە جەڭىسكە جەتسە, «امۋر» بارلىق كەزدەسۋدە جەڭىلىس تاپقان. الاڭ يەلەرى بۇل جولى دا جەڭىلىستەن قۇتىلا المادى. ماتچتىڭ 56-مينۋتىندا ەريك تانگرەيدي «بارىستى» ەسەپتە العا شىعارسا, 59-مينۋتتا نيكيتا ميحايليس ويىنداعى سوڭعى ءارى كومانداسىنىڭ جەڭىس شايباسىن سوقتى.
بەسىنشى تۋردان كەيىن «بارىس» تۋرنير كەستەسىندە التى ۇپايمەن بەسىنشى ورىندا كەلەدى. جەرلەستەرىمىز كەلەسى كەزدەسۋىن بۇگىن ۆلاديۆوستوكتىڭ «ادميرال» كلۋبىمەن وتكىزەدى.
