سوڭعى جىلدارى فۋتبول ەرەجەلەرى ءجيى وزگەرىسكە ۇشىراپ, قوسىمشا تولىقتىرۋلار ەنگىزىلدى. مىسالى, بىلتىردان باستاپ ۆيدەو قايتالاۋ ياعني, VAR جۇيەسى قولدانىلا باستادى. ال بيىلعى جىلدىڭ شىلدەسىنەن باستاپ فۋتبول ەرەجەسىنە بىرقاتار وزگەرىس ەنگىزىلىپ, رەسمي ويىنداردا كەڭىنەن قولدانىلىپ جاتىر. سونىمەن بيىل فۋتبولعا قانداي وزگەرىستەر ەنگىزىلدى؟
ويىنشى الماستىرۋ. ەندى ويىنشى الماستىرۋ ساتىندە فۋتبولشى بۇكىل الاڭدى كەزىپ شىقپاي, وزىنە جاقىن تۇرعان الاڭ جيەگىنەن شىعۋعا مىندەتتى. سوڭعى جىلدارى «اسا دارىندى» باپكەرلەر ويىننىڭ سوڭعى ۋاقىتىندا ء(تىپتى سوڭعى سەكۋندتارىندا) كوماندانىڭ ويىنىن كۇشەيتۋ ءۇشىن ەمەس, قارسىلاستىڭ ويىن قارقىنىن باسەڭدەتۋ نەمەسە ۋاقىت ۇتۋ ءۇشىن الاڭعا فۋتبولشى شىعاراتىن بولدى. ال جاڭا ەرەجە بويىنشا باپكەرلەر ەندى ويىنشى الماستىرۋدان ۋاقىت ۇتا المايدى.
پەنالتي. ەندى قاقپاشى دوپ تەبىلمەي تۇرىپ قاقپاداعى سىزىق ۇستىنە ءبىر اياعىن قويسا جەتكىلىكتى. بۇل – داۋلى ماسەلەلەردى ازايتۋعا ارنالعان وزگەرىس. پەنالتي تەبەتىن ءساتتى قاقپاشىلار ادەتتە «ەكى اياقپەن سىزىقتى باسىپ تۇرۋ» ەرەجەسىن بۇزاتىن ەدى. ياعني, دوپ تەبىلمەي تۇرىپ العا سەكىرىپ نەمەسە العا قادام تاستايتىن. تورەشىلەر بولسا, مۇنداي جاعدايعا ءاردايىم نازار اۋدارا بەرمەيتىن. وسىلايشا, بۇل وزگەرىس قاقپاشىنىڭ اياعىنداعى «كىسەندى» بوساتتى دەسەك تە بولاتىن شىعار.
گول سوعىلۋى مۇمكىن جاعدايدا دوپ قولعا تيسە – ەرەجە بۇزىلادى. قاقپا ماڭايىنداعى قاۋىپتى شابۋىل كەزىندە دوپ قورعانۋشى كوماندا ويىنشىسىنىڭ قولىنا تيسە, تورەشى كوپ جاعدايدا كوز جۇما قارايتىن. ياعني, تورەشى ويىن ۋاقىتىندا فۋتبولشى دوپقا قولىن ادەيى تيگىزسە عانا ويىندى توقتاتاتىن. قىسقاسى, ەندى دوپقا «ادەيى» نەمەسە «بايقاۋسىزدا» قولىن تيگىزىپ السا دا ويىن ەرەجەسى بۇزىلادى.
ء«تىرى قابىرعا» (ستەنكا): قورعانۋشى كوماندانىڭ قاتارىندا ورىن جوق. جاڭا ەرەجە بويىنشا, شابۋىلداۋشى كوماندا ايىپ دوبىن ورىنداۋ كەزىندە قارسىلاس تاراپىنان كۇرىلاتىن ء«تىرى قابىرعاعا» قوسىلا المايدى جانە قورعاۋشىلارعا كەدەرگى كەلتىرە المايدى. ەكى كوماندانىڭ فۋتبولشىلارى اراسىنداعى قاشىقتىق – ءبىر مەتر بولۋى ءتيىس. بۇل ەرەجەنىڭ ماڭىزدىلىعى – ەكى تاراپ فۋتبولشىلارىنىڭ بوسقا تارتىسپاۋ جانە ويىن ۋاقىتىن سوزباۋ.
جازالاۋ قاعازى. ەندى باس باپكەرلەرگە دە سارى جانە قىزىل قاعاز كورسەتىلەدى. كوپ جاعدايدا تورەشىلەر شەكتەن شىققان باس باپكەرلەرگە يشارا ارقىلى الاڭنان شىعىپ كەتۋىن تالاپ ەتەتىن. ال ەندى ولار قىزبالىققا سالىنعان باپكەرلەرگە سارى جانە قىزىل قاعاز كورسەتە الادى. قىزىل قاعاز بارشاعا تۇسىنىكتى بولسا كەرەك, ال سارى قاعاز ماڭىزدى ويىندا باپكەردى تىنىشتاندىرۋ ءۇشىن ويلاپ تابىلعان «قاراپايىم» جاڭالىق.
دوپ تورەشىگە تيسە, ويىن توقتاتىلادى. بۇرىنعى ەرەجە بويىنشا, دوپ تورەشىگە تيەتىن بولسا, ويىن توقتاتىلمايدى. بىراق كەي جاعدايدا مۇنداي وقيعا كۇتپەگەن جەردەن قاۋىپتى شابۋىل ۇيىمداستىرۋعا مۇمكىندىك بەرەدى. ياعني, تورەشىنىڭ «جاردەمى» ارقىلى ءبىر كوماندانىڭ ءجابىر شەگۋى, ءبىر كوماندانىڭ باسىمدىققا يە بولۋى ەرەجەدە قاراستىرىلماعان. سوندىقتان جاڭا ەرەجە بويىنشا, دوپ تورەشىگە تيسە دەرەۋ ويىن توقتاتىلىپ, ەكى كوماندانىڭ ويىنشىلارى اراسىندا دوپ قايتا ماتچقا قوسىلادى.
قاقپادان بەرىلگەن دوپتى ايىپ الاڭى ىشىنەن قابىلداۋعا بولادى. بۇرىنعى ەرەجە بويىنشا, دوپ قاقپا ماڭايىنان ويىنعا قوسىلسا, فۋتبولشىلار ءوز ايىپ الاڭىندا دوپقا اياق تيگىزۋگە بولمايتىن. جاڭا وزگەرىسكە ساي, ەندى فۋتبولشى ءوز ايىپ الاڭى ىشىنەن دوپتى ويىنعا قوسىپ, شابۋىل ۇيىمداستىرا الادى.
قىسقاسى, بيىل قولدانىسقا ەنشىزىلگەن وزگەرىستەردىڭ قىسقاشا ەرەجەلەرى وسىنداي. فۋتبولدى تەلەديدار نەمەسە الاڭنان تاماشالاپ قانا قويماي, وسىنداي وزگەرىستەردەن ۇنەمى حاباردار بولىپ ءجۇرىڭىز.
