ءباسپاسوز كونفەرەنتسياسىندا العاشقىلاردىڭ ءبىرى بولىپ ءسوز العان تۇڭعىش پرەزيدەنت – ەلباسى قورى اتقارۋشى ديرەكتورىنىڭ ورىنباسارى يگور روگوۆ ەكىنشى جىل قاتارىنان وتكەلى وتىرعان بۇل بايقاۋ ارقىلى ەلباسى قورى ادامگەرشىلىك قۇندىلىقتاردى, قايىرىمدىلىق جانە گۋمانيزم يدەيالارىن ناسيحاتتايتىنىن جەتكىزدى. ء«بىز جۇرەگى كەڭ ازاماتتارىمىزدى, ءوز زامانىمىزدىڭ ناعىز باتىرلارىن حالىققا كورسەتىپ, تانىستىرعىمىز كەلەدى. «قايىرىمدىلىق كەرۋەنى» جوباسى ازاماتتاردىڭ زور ىقىلاسىنا يە بولعانى قۋانتادى. وتكەن جىلى كوميسسيانىڭ قاراۋىنا قازاقستاننىڭ بارلىق وڭىرىنەن 97 ءوتىنىش كەلىپ ءتۇستى», دەدى ي.روگوۆ. ونىڭ ايتۋىنشا, ەلىمىزدىڭ ءار تۇكپىرىندەگى تالانتتاردى ىرىكتەپ, جەڭىمپازداردى انىقتاۋ ءۇش ايعا, ياعني وسى جىلعى 29 قاراشاعا دەيىن جالعاسادى.
«بىزدە ءومىردىڭ قيىن جاعدايىنا تۇسكەن ادامداردى قولتىعىنان دەمەپ جىبەرەتىن جومارت, قامقور جۇرەكتى جاندار جەتەرلىك. بىراق ولار وتە قاراپايىم كەلەدى جانە جاقسىلىقتى جاريالاماعاندى ءجون سانايدى. وسى بايقاۋدىڭ ناتيجەسىندە ەرجۇرەك كەيىپكەرلەرىمىزدى ولاردان كومەك العان ادامدار ارقىلى انىقتايمىز», دەيدى تۇڭعىش پرەزيدەنت – ەلباسى قورى اتقارۋشى ديرەكتورىنىڭ ورىنباسارى. سونداي-اق ول جوبانى ىسكە اسىرۋعا قازاقستاننىڭ ىسكەر ايەلدەر قاۋىمداستىعى, «حابار» اگەنتتىگى, كتك تەلەارناسى جانە «وقجەتپەس» ەمدەۋ-ساۋىقتىرۋ كەشەنى قولداۋ كورسەتكەنىن جەتكىزدى.
قازاقستاننىڭ ىسكەر ايەلدەر قاۋىمداستىعىنىڭ پرەزيدەنتى راۋشان سارسەمباەۆا ۇمىتكەرلەردى ءار نوميناتسياعا ساي ىرىكتەۋمەن اينالىساتىن جۇمىس توبى قۇرىلاتىنىن ايتتى. ونىڭ قۇرامىنا اتالعان قاۋىمداستىقتىڭ, وڭىرلەردەگى ىشكى ساياسات باسقارمالارىنىڭ, باق-تىڭ وكىلدەرى كىرەدى. ال رەسپۋبليكالىق دەڭگەيدەگى كوميسسيا ىرىكتەلگەن وتىنىمدەردى ءجىتى قارايدى. «بيىل دا نازار اۋدارارلىق كەيىپكەرلەر كەزدەسەدى دەپ ويلايمىز. البەتتە بارلىق ۇمىتكەر ىنتالاندىرۋعا, ناسيحاتتاۋعا جانە باعالاۋعا لايىق. دەسە دە بايقاۋدىڭ بەلگىلى ءبىر شارتتارى بار», دەيدى ر.سارسەمباەۆا. اتالعان بايقاۋعا الەۋمەتتىك ماسەلەلەردى شەشۋگە ۇلەس قوسىپ جۇرگەن, وزدەرىنىڭ يگى ىستەرىمەن باسقالاردى ىنتالاندىراتىن جەكە جانە زاڭدى تۇلعالار ءوتىنىم بەرە الادى. الايدا قايىرىمدىلىق قىزمەتىن مەملەكەتتىك قولداۋمەن (مەملەكەتتىك گرانت, مەملەكەتتىك تاپسىرىس جانە ت.ب.) ىسكە اسىراتىن كاسىپكەرلىك سۋبەكتىلەر جانە جەكە تۇلعالار قاتىسا المايدى.
ۇيىمداستىرۋشىلاردىڭ حابارلاۋىنشا, «قايىرىمدىلىق كەرۋەنىنىڭ» جەڭىمپازدارى بەس اتالىم بويىنشا انىقتالادى: «اسار» (قايىرىمدىلىق قىزمەتى حالىقتىق سالت-داستۇرلەرمەن بايلانىستى بولۋى كەرەك), «تۋعان جەر» (تۋعان جەرگە ءبىلىم, ەكولوگيا جانە اباتتاندىرۋ مادەني نىسانداردى قالپىنا كەلتىرۋ جانە ت.ب. سالالارىندا كومەك كورسەتكەندەرگە), «باتىل جۇرەك» (ەرلىك, قايسارلىق تانىتقان ادامدارعا), «مەيىرىم جولىندا» ء(وز ەركىمەن, ءوز قاراجاتىنا ادامدارعا كومەك كورسەتكەن جەكە جانە زاڭدى تۇلعالارعا), «قايىرىمدىلىق تاريحى» (قوعامنىڭ نازارىن الەۋمەتتىك پروبلەمالارعا اۋداراتىن ماتەريالداردى ۇسىناتىن, باق-تا قايىرىمدىلىق تاقىرىپتارىن ۇزدىك جاريالاعان جۋرناليستەرگە نەمەسە شىعارماشىلىق توپتارعا بەرىلەدى).
ايتا كەتەيىك, وتىنىمدەردى ىرىكتەۋ جۇمىسى بيىل جەلتوقسان ايىندا اياقتالادى. ال بايقاۋ جەڭىمپازدارىن ماراپاتتاۋ 2020 جىلعى اقپان ايىنىڭ سوڭىندا – العىس ايتۋ كۇنىنە جوسپارلانىپ وتىر.
