ب. شولپانقۇلوۆ اتاپ وتكەندەي, بيزنەستى «كولەڭكەدەن» شىعارۋ جۇمىستارى سالىق جانە كەدەن ساياساتىن جەتىلدىرۋ جانە قولما-قول اقشاسىز اينالىمنىڭ ۇلەسىن ارتتىرۋ ارقىلى جۇزەگە اسىرىلىپ جاتىر.
«ىسكە اسىرىلىپ جاتقان شارالار سالىقتىق جانە كەدەندىك اكىمشىلەندىرۋدى تسيفرلاندىرۋعا, اقپاراتتىق جۇيەلەردى ينتەگراتسيالاۋعا نەگىزدەلگەن, مۇندا اقپاراتتىق جۇيەلەردى دامىتۋ سەكىلدى باستامالاردى ىسكە اسىرۋدان ۇلكەن ناتيجە كۇتىلەدى, ولار: ءونىمدى تاڭبالاۋ, ەلەكتروندى شوت-فاكتۋرالار, «ۆيرتۋالدى قويما» ءمودۋلى, تاۋەكەلدەردى باسقارۋ جۇيەسى, ونلاين-كاسسالىق باقىلاۋ ماشيناسىن ەنگىزۋ جانە ت.ب.», دەدى ب. شولپانقۇلوۆ.
ونىڭ ايتۋىنشا, تاۋارلاردى باقىلاۋ جۇيەسىن قۇرۋ ەكونوميكانى كونترافاكتىلىك ونىمدەردەن قورعاۋعا كومەكتەسەدى. سونىمەن, «ەلەكتروندىق شوت-فاكتۋرالار» اج تۇپكىلىكتى تۇتىنۋشىعا دەيىن تاۋارلاردىڭ قوزعالىسىن باقىلاۋعا مۇمكىندىك بەرەدى, «ۆيرتۋالدى قويما» ءمودۋلى تاۋارلاردىڭ قوزعالىسىن اۆتوماتتى تۇردە باقىلاۋعا مۇمكىندىك بەرەدى.
«ناقتى قاداعالاۋ تۇرعىسىنان تاۋارلاردى تاڭبالاۋ جۇمىستارى جۇرگىزىلىپ جاتىر. تەرى بۇيىمدارى بويىنشا پيلوتتىق جوبانىڭ ناتيجەسىندە 2018 جىلى كىرىستەر 1,5 ەسەگە ءوستى. بۇگىندە تەمەكى مەن الكوگول ونىمدەرى بويىنشا پيلوتتىق جوبا جۇرگىزىلۋدە», دەدى ءبىرىنشى قارجى ۆيتسە-ءمينيسترى.
سونىمەن قاتار, وسى جىلدىڭ 1 قاڭتارىنان باستاپ شاعىن جانە ورتا بيزنەسكە ارنالعان سالىقتىق راقىمشىلىق جاساۋ جۇمىستارى باستالدى. 90 مىڭعا جۋىق سالىق تولەۋشىگە راقىمشىلىق جاسالادى. ولاردىڭ 45%-ىنا راقىمشىلىق جاسالدى. نەگىزگى ماقسات — سالىق تۇسىمدەرىن ارتتىرۋ.
ب. شولپانقۇلوۆتىڭ ايتۋىنشا, بلوكچەين تەحنولوگياسى ارقىلى ققس باقىلاۋ شوتىن قولدانا وتىرىپ, ققس-تى باسقارۋدىڭ جاڭا ءادىسى ەنگىزىلگەن.
ققس باقىلاۋ شوتىن قولداناتىن سالىق تولەۋشىلەرگە قاتىستى سالىقتىق تەكسەرۋلەر ققس قايتارىلعان كەزدە الىنىپ تاستالادى, ققس قايتارۋ مەرزىمى 55-تەن 15 جۇمىس كۇنىنە دەيىن قىسقاردى.
تاۋارلار قوزعالىسىن باقىلاۋدىڭ سوڭعى كەزەڭى - 2020 جىلعى 1 قاڭتاردان باستاپ ونلاين-كاسسالىق باقىلاۋ ماشينالارىن پايدالانۋعا جاپپاي كوشۋ, بۇل رەيدتىك تەكسەرۋلەردەن قاشىقتان سالىقتىق باقىلاۋ جۇرگىزۋگە كوشۋگە اكەلەدى.
سونىمەن قاتار ەاەو اۋماعى بويىنشا تاۋارلار ءترانزيتىنىڭ بىرىڭعاي جۇيەسىن قۇرۋ جۇمىستارى جۇرگىزىلىپ جاتىر. قىرعىزستاننان رەسەي فەدەراتسياسىنا قازاقستان اۋماعى ارقىلى ترانزيتتىك تاۋارلاردى باقىلاۋ ماقساتىندا ناۆيگاتسيالىق ەلەكتروندىق پلومبالاردى پايدالانۋ بويىنشا پيلوتتىق جوبا ىسكە قوسىلدى.
ب. شولپانقۇلوۆتىڭ ايتۋىنشا, كولەڭكەلى اينالىمدى ازايتۋ بويىنشا مينيسترلىكتىڭ نەگىزگى مىندەتتەرىنىڭ ءبىرى — «اينالى» كەدەندىك ستاتيستيكاداعى سايكەسسىزدىكتەردى ازايتۋ.
ءۇشىنشى ەلدەردەن اكەلىنەتىن تاۋارلاردىڭ تۇسىمدەرىنىڭ 30%-ىن قىتايدان شىققان تاۋارلار قۇرايدى. وسىعان بايلانىستى, جاقىندا مينيسترلىكتىڭ مەملەكەتتىك كىرىستەر كوميتەتى مەن قحر-دىڭ باس كەدەندىك باسقارماسى اراسىندا ءوزارا ىنتىماقتاستىق تۋرالى ءتيىستى حاتتامالارعا قول قويىلدى. ۇسىنىلعان باستامالاردىڭ ناتيجەسى بيۋدجەتكە 800 ملرد تەڭگە كولەمىندە قوسىمشا تۇسىمدەر تۇرىندە كۇتىلەدى.
«جۇرگىزىلىپ جاتقان باستامالار مەن قابىلدانىپ جاتقان شارالار كولەڭكەلى ەكونوميكانى ازايتۋعا, بيۋدجەتكە سالىقتىق جانە كەدەندىك تۇسىمدەردىڭ ۇلعايۋىنا جول اشادى», دەپ تۇيىندەدى ب. شولپانقۇلوۆ.
