اۋەسقويلار كومانداسىن ارەڭ جەڭدى
«استانانى» ەۋرودودا ويىندارىندا جىل سايىن ويناپ, دەڭگەيى ەۋروپالىق كوماندالارعا جەتەعابىل دەپ ماقتانعانىمىزبەن, بەيسەنبىدەگى ماتچتىڭ العاشقى تايمىندا ءبىز بىلەتىن «استانانى» تاني المادىق. ءبىرىنشى 45 مينۋتتا جىلدىق بيۋدجەتى مارين توماسوۆتىڭ تابىسىنا جەتپەيتىن «سانتا كولوما» ويىنشىلارى «استانادان» الدەقايدا ءتاۋىر وينادى. ءتىپتى ويىنداعى ەسەپتى ءبىرىنشى بولىپ اندوررا كومانداسى اشتى. كەزدەسۋدىڭ نەبارى جەتىنشى مينۋتىندا «سانتا كولومانىڭ» جارتىلاي قورعاۋشىسى ەنريك پي گول سوعىپ, ەريچتى سان سوقتىرىپ كەتتى. ءوز الاڭىندا ويناپ, ونىڭ ۇستىنە ءبىرىنشى گولدى وتكىزىپ العان سوڭ «استانا» ويىنشىلارى ابدەن ابدىرادى. 20 مۇمكىندىكتىڭ تەك بىرەۋىن عانا گولعا اينالدىراتىن شابۋىلشى دەگەن دارداي اتاعى بار يانگانى ايتپاعاننىڭ وزىندە, كوماندانىڭ ەڭ تاجىريبەلى ويىنشىسى دميتري شومكونىڭ ءوزى پاس بەرۋ ساتىندە ءبىر ەمەس بىرنەشە رەت قاتەلەسىپ, تەپكەن دوبى كوماندالاستارىنا جەتپەي جاتتى. دەگەنمەن, ويىننىڭ 24-مينۋتىندا ءبىرىنشى گولدىڭ اۆتورى ەنريك پي ءوز ايىپ الاڭىندا ءتارتىپ بۇزىپ, تورەشى 11 مەترلىك ايىپ دوبىن بەلگىلەدى. «استانا» ساپىنا جۋىردا عانا قوسىلعان يسلانديالىق فۋتبولشى رۋنار مار سيگۋرونسسون پەنالتيدى ءساتتى ورىنداپ, ارەڭ دەگەندە ەسەپتى تەڭەستىردى.
ويىننىڭ ەكىنشى تايمى دا «استانانىڭ» شابۋىلىمەن باستالدى. بىراق سول شابۋىلدى تۇيىندەيتىن فۋتبولشى تابىلماي جاتتى. ماتچتىڭ 60-مينۋتىندا الاڭعا حورۆاتيالىق لەگيونەر مارين توماسوۆ شىققاننان سوڭ «استانانىڭ» ويىنى تۇلەپ سالا بەردى. توماسوۆ جاسىل الاڭعا شىعا سالىپ جاسىنداي جارقىلدادى. اينالدىرعان 30 مينۋتتا قارسىلاستىڭ قاقپاسىنا جالعىز ءوزى ءۇش گول سوعىپ, كومانداسىن ورگە سۇيرەدى. العاشقى گولىن ماتچتىڭ 73-مينۋتىندا سالسا, اراعا التى مينۋت سالىپ دۋبل اۆتورى اتاندى. ويىننىڭ نەگىزگى كەزەڭىنە قوسىلعان قوسىمشا ۋاقىتتا ماتچتىڭ نۇكتەسىن قويدى. قورىتىندى ەسەپ – 4:1. «استانا» توماسوۆتىڭ ارقاسىندا اۋەسقويلاردان قۇرالعان كوماندانى ارەڭ جەڭدى.
ەندى ەلوردا كومانداسى 8 تامىز كۇنى ەۋروپا ليگاسىنىڭ ءۇشىنشى ىرىكتەۋ كەزەڭىندە مالتا چەمپيونى «ۆاللەتتا» كلۋبىن قابىلدايدى. قارىمتا ماتچ ءبىر اپتادان سوڭ سىرت الاڭدا وتەدى.
قايراتى كەتكەن «قايرات»
گازەتىمىزدىڭ وتكەن ساندارىنداعى شولۋىمىزدا «قايراتتىڭ» تاعدىرى قىل ۇستىندە تۇرعانىن جازعان بولاتىنبىز. الماتىنىڭ كومانداسى سول «قىل ارقاننان» وتە الماي, ءوز الاڭىندا يزرايل كومانداسىمەن تەڭ ءتۇسىپ, ەۋروپا ليگاسىنان شىعىپ قالدى. ءوز الاڭىندا ەكى گول سالىپ, قارىمتا ماتچ الدىندا جاعدايىن ءبىرشاما جاقسارتىپ العان «حاپوەل» كلۋبى ورتالىق ستاديوندا وتكەن ماتچتى اسا ساقتىقپەن باستادى. ويتكەنى قارسىلاس كوماندانىڭ باستى ماقساتى – قاقپالارىنا گول وتكىزىپ الماۋ ەدى. بىراق «حاپوەلدىڭ» بۇل جوسپارىن «قايراتتىڭ» قورعاۋشىسى رادە دۋگاليچ بۇزىپ جىبەردى. ءبىرىنشى تايمنىڭ 40-مينۋتىندا بۇرىشتامادان كوتەرگەن پاستان كەيىنگى قاربالاس ساتتە دۋگاليچ گول سوعىپ كەتتى. وسىلايشا, ءبىرىنشى تايم «قايراتتىڭ» باسىمدىعىمەن ءوتتى.
«قايرات» ويىننىڭ ەكىنشى بولىگىن دە شابۋىلمەن باستاپ, گول سوعۋدىڭ الەگىندە جۇرگەن ەدى. الايدا قورعانىستى قىمتاپ جۇرگەن ەلدوس احمەتوۆ 55-مينۋتتا ەكىنشى سارى قاعازىن الىپ, كومانداسىن اۋىر جاعدايدا قالدىردى. كەزدەسۋدىڭ قالعان 35 مينۋتىن «قايرات» 10 ويىنشىمەن وتكىزۋگە ءماجبۇر بولسا, 63-مينۋتتا ەسەپتى اشقان رادە دۋگاليچ ابايسىزدا ءوز قاقپاسىنا گول سوعىپ, جىعىلعان ۇستىنە جۇدىرىق بولدى. ويىننىڭ سوڭىنا دەيىن ەسەپ وزگەرۋسىز قالدى. بۇل ماتچتا «قايرات» فۋتبولشىلارىنىڭ جۇيكەسى ابدەن سىر بەردى. فۋتبولشىلار گول سوعۋدىڭ ورنىنا بىرىنەن سوڭ ءبىرى قىزىل قاعاز الىپ, الاڭنان قۋىلدى. احمەتوۆتىڭ ءىزىن الا عافۋرجان سۇيىمباەۆ, قوسالقى قۇرامدا وتىرعان قاقپاشى ۆلاديمير پلوتنيكوۆ تا قىزىل قاعاز الدى. سونداي-اق رادە دۋگاليچ, ايبول ابىكەن, يسلامبەك قۋات سارى قاعازبەن جازالاندى. وسىلايشا, قايراتى كەتكەن «قايرات» ەۋروپا ليگاسىن ەكىنشى كەزەڭنەن اياقتاۋعا ءماجبۇر بولدى.
«ورداباسى» ورعا جىعىلدى
چەحيادا وتكەن العاشقى ويىننان كەيىن دە «ورداباسىنىڭ» كەلەسى كەزەڭگە شىعۋ مۇمكىندىگى بار ەدى. سىرت الاڭدا 1:1 ەسەبىمەن تەڭ ويناعانىمەن, قارسىلاس الاڭىندا سوعىلعان گول ەكى گول بولىپ ەسەپتەلەتىنىن ءبىز ايتپاساق تا جانكۇيەرلەر جاقسى بىلەدى. سوندىقتان «ورداباسىعا» شىمكەنتتەگى ويىندا 0:0 ەسەبى دە جەتكىلىكتى ەدى. الايدا «ملادا-بولەسلاۆ» كومانداسى شىمكەنتكە ءبىر بارماعى بۇگۋلى كەلگەن ەكەن. كەزدەسۋدىڭ 8-مينۋتىندا مارەك ماتەيوۆسكي ەسەپتى اشتى. 33-مينۋتتا «ورداباسىنىڭ» كاپيتانى پابلو فونتانەللو ءوز الاڭىندا ويىن ەرەجەسىن بۇزىپ, تورەشى پەنالتي بەلگىلەدى. ونى نيكولاي كومليچەنكو ءساتتى ورىنداپ, كومانداسىن 0:2 ەسەبىمەن العا شىعاردى. تايم اياقتالار تۇستا الەكسەي ششەتكين مەرگەندىگىمەن كوزگە ءتۇسىپ, ءۇمىت وتىن قايتا جاققانداي بولعان ەدى. بىراق جانكۇيەرلەردىڭ قۋانىشى ۇزاققا سوزىلمادى.
ەكىنشى تايم باستالعان بەتتە «ملادا-بولەسلاۆ» فۋتبولشىسى مۋريس مەشانوۆيچ سوققان ءۇشىنشى گول «ورداباسىنىڭ» مەرزىمىنەن بۇرىن ەۋروپا ليگاسىنان ءۇمىتىن ءۇزدى. 56-مينۋتتا ابدۋللاي دياكاتەنىڭ پەنالتيدەن سوققان گولى كومانداسىنا جەڭىس الىپ كەلە المادى. قورىتىندى ەسەپ – 2:3.
«ورداباسى» كومانداسى بيىل ەۋروپا ليگاسىندا ءبىراز جەتىستىككە جەتۋ ماقساتىندا جىل باسىندا بىرنەشە تاجىريبەلى فۋتبولشىنى ءوز ساپىنا قوسىپ العان ەدى. مىسالى, «استانادان» وتە تاجىريبەلى دەگەن قاقپاشى دميتري نەپوگودوۆتى, ەۋروكۋبوك ويىندارىندا تاجىريبەسى بار قورعاۋشى سەرگەي مالىي مەن مارات بىستروۆتى, شابۋىلشى الەكسەي ششەتكيندى, بولگاريانىڭ «لۋدوگورەتس» كلۋبىنان جارتىلاي قورعاۋشى جواو پاۋلو مەن ماي ماحلانگۋدى جالعا العانىمەن, اتالعان فۋتبولشىلاردان ەۋرودودا ويىندارىندا قايران بولمادى.
ەندى ەۋروكۋبوك ويىندارىندا ەل بولىپ «استانا» كومانداسىنىڭ تىلەۋىن تىلەيمىز. بيىل دا ەۋروپا ليگاسىنىڭ توپتىق كەزەڭىنە شىعىپ, ەل مەرەيىن اسىرادى دەگەن ۇمىتتەمىز. قورىتا ايتقاندا, ەندىگى ەل ءۇمىتى – «استانادا».
