پرەمەر-مينيستر ا.مامين 2019 جىلعى 20 شىلدەدە قوياندى سۋ قويماسىندا باستاعان اكتسياعا 1,2 مىڭنان استام ادام قاتىسىپ, 10 توننادان استام قوقىس جينالعان-دى. ال ەلورداداعى سەنبىلىك بارىسىندا ەسىل جانە قاراسۋ وزەندەرىنىڭ, ۆياچەسلاۆ سۋ قويماسى مەن مايبالىق كولىنىڭ جاعالاۋلارى تازارتىلدى. اتالعان ءىس-شاراعا 5 مىڭنان استام ادام قاتىستى. ەكولوگيالىق اكتسيانىڭ قاتىسۋشىلارى ەسىل جانە قاراسۋ وزەندەرىنىڭ جاعالاۋىن اۋەجايدان قاراعاندى تراسساسىنا قاراي, مايبالىق كولىن, ۆياچەسلاۆ سۋ قويماسىنىڭ جاعالاۋ ماڭىنداعى اۋماعىن تازالاپ, 16 تونناعا جۋىق قوقىس جينادى.
سەنبىلىككە ەلورداداعى مينيسترلىك, قالالىق اكىمدىك جانە باسقارمالاردىڭ وكىلدەرى, ەرىكتىلەر دە كوپتەپ قاتىستى. نۇر-سۇلتان قالاسىنداعى ەكولوگيالىق اكتسيانى قولداۋشىلاردىڭ قاتارىندا ۇكىمەت باسشىسى اسقار مامين, پرەمەر-ءمينيستردىڭ ورىنباسارى گۇلشارا ابدىقالىقوۆا باستاعان ۇكىمەت مۇشەلەرى بار.
اتاپ ايتقاندا, ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ, اقپارات جانە قوعامدىق دامۋ ءمينيسترى داۋرەن اباەۆ, ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ, دەنساۋلىق ساقتاۋ ءمينيسترى ەلجان ءبىرتانوۆ, ءبىلىم جانە عىلىم ءمينيسترى اسحات ايتماعامبەتوۆ بولدى. نۇر-سۇلتان قالاسىنىڭ اكىمى التاي كولگىنوۆ اتالعان شاراعا بەلسەندى قاتىسقان بارشا استانالىقتارعا العىس ايتتى.
سونداي-اق ۇكىمەت باسشىسى بارلىق وبلىس اكىمدەرىن ەكولوگيالىق باستامانى جالعاستىرۋعا شاقىرعان بولاتىن. ايتا كەتەيىك, بۇگىندە ەكو-چەللەندج قوزعالىسىنا ءوڭىر تۇرعىندارى جاپپاي اتسالىسۋدا. ماسەلەن, اتىراۋدا جايىق وزەنىنىڭ جاعالاۋىن قوقىستان تازارتۋ ناۋقانى ءوتتى. سانيتارلىق تازالىققا 8 مىڭعا جۋىق قالا جانە قالا ماڭىنداعى اۋىلدىق وكرۋگ تۇرعىندارى, سونىڭ ىشىندە مەملەكەتتىك مەكەمەلەر مەن كاسىپورىن, ونەركاسىپ ۇجىمدارى, سونداي-اق ەرىكتىلەر توبى قاتىسىپ, 37-دەن استام تەحنيكا جۇمىلدىرىلدى. ناتيجەسىندە 17 توننا قوقىس جينالدى. سونىمەن قاتار اقمولا وبلىسىندا 44 مىڭنان استام ادامنىڭ قاتىسۋىمەن وتكەن اكتسيا اياسىندا قوپا كولى مەن قىلشىقتى وزەنىنىڭ جاعالاۋى جانە وڭىردەگى باسقا دا توعاندار مەن سۋ ارنالارىنىڭ ماڭى قوقىستان ارىلدى. شىعىس قازاقستان وبلىسىنداعى 19 قالا مەن اۋداندا ءبىر مەزەتتە وتكەن اكتسياعا 33 مىڭنان استام تۇرعىن جينالىپ, دەمالىس ورىندارىنىڭ اۋماعىن تازالادى. وسىلايشا 800 توننادان نەمەسە 3 206 تەكشە مەتردەن استام قوقىس شىعارىلدى. ال الماتىلىقتار كوكجايلاۋ شاتقالىن تازارتۋ بويىنشا #TazaAlmaty ەكولوگيالىق اكتسياسىنىڭ العاشقى كەزەڭىن باستادى. چەللەندجگە قاتىسۋشىلار ۇزىندىعى 5 شاقىرىم بولاتىن شاتقالعا سوقپاق جولمەن كوتەرىلىپ, جول بويىنداعى قوقىستاردى جينادى. ايتۋلى شاراعا قاراعاندى وبلىسىنىڭ 20 مىڭنان استام تۇرعىنى قاتىسسا, سولتۇستىكقازاقستاندىقتار دا 200-دەن استام كول جاعالاۋىن قوقىستان تازارتتى. تەرىسكەيدەگى ەكولوگيالىق اكتسياعا 14 مىڭنان استام وبلىس تۇرعىنى قاتىستى. وبلىستىق ەكولوگيا دەپارتامەنتى جەتەكشىسىنىڭ مىندەتىن اتقارۋشى ازامات بەكتاسوۆتىڭ ايتۋىنشا, اكتسيا اياسىندا 126 مىڭ توننا قوقىس جينالدى. ناتيجەسىندە 350 مىڭ شارشى مەتر اۋماق تازالاندى.
ايتا كەتكەن ءلازىم, الداعى ۋاقىتتا قازاقستان مەكتەپتەرى مەن بالاباقشالارىندا ەكولوگيالىق تاربيەگە ارنالعان قوسىمشا ساباق ەنگىزىلمەك. ەكولوگيا, گەولوگيا جانە تابيعي رەسۋرستار مينيسترلىگى ءبىلىم جانە عىلىم مينيسترلىگىمەن بىرلەسە وتىرىپ, بارلىق مەكتەپ پەن بالاباقشادا ەكولوگيالىق ساعات ەنگىزۋدى جوسپارلاپ وتىر. ەلىمىزدىڭ باس ەكولوگى م.مىرزاعاليەۆتىڭ ايتۋىنشا, تازالىق ۇعىمىن ساناعا بالا جاستان باستاپ ءسىڭىرۋ كەرەك.
