جيىنعا قازاقستان حالقى اسسامبلەياسى توراعاسىنىڭ ورىنباسارى جانسەيىت تۇيمەباەۆ, مەملەكەت جانە قوعام قايراتكەرى مىرزاتاي جولداسبەكوۆ, مادەنيەت جانە سپورت ءمينيسترى اقتوتى رايىمقۇلوۆا, قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى ديرەكتورىنىڭ ورىنباسارى كۇلايشا اقتاەۆا, پارلامەنت ءماجىلىسىنىڭ دەپۋتاتتارى, قحا مۇشەلەرى, باسقا دا ەتنو-مادەني بىرلەستىك, زيالى قاۋىم وكىلدەرى قاتىستى.
كىتاپ قازاق ەلىندەگى قوعامدىق كەلىسىم مەن جالپىۇلتتىق بىرلىك يدەياسىنىڭ نەگىزىن قالاۋشى, قازاقستان حالقى اسسامبلەياسىنىڭ توراعاسى نۇرسۇلتان ءابىش ۇلى نازارباەۆقا ارنالادى. جيناققا قازاقستان حالقى اسسامبلەياسىنىڭ قۇرۋشىسى, تۇڭعىش پرەزيدەنت نۇرسۇلتان نازارباەۆتىڭ 1995-2019 جىلدارداعى سەسسيالاردا سويلەگەن سوزدەرى, ەلباسىنىڭ جەكە ارحيۆىنەن الىنعان جانە كىتاپحانا قورىندا ساقتالعان قۇندى سۋرەتتەر مەن قۇجاتتار ەنگەن. سونداي-اق جيناقتا ساياسي تۇراقتىلىق پەن ۇلتارالىق كەلىسىمنىڭ قازاقستاندىق ۇلگىسىنىڭ اۆتورى ن.نازارباەۆ تۋرالى جارىق كورگەن ماقالالار مەن ەتنو-مادەني بىرلەستىك وكىلدەرىنىڭ ەلباسىنا جولداعان جۇرەكجاردى لەبىزدەرى, قحا-نىڭ باسقا قۇرىلىمدارى باسشىلارىنىڭ ەلباسىنا العىستارى بەرىلگەن.
جيىن شىمىلدىعىن اشقان جانسەيىت تۇيمەباەۆ «قازاقستان حالقى اسسامبلەياسى وسى تاريحي ساتكە ەرەكشە ءمان بەردى. بۇل شارانى تەك ادەتتەگى جينالىس رەتىندە ەمەس, قوعامدىق كەلىسىم مەن جالپىۇلتتىق بىرلىكتى ايقىندايتىن, جاسامپاز يدەيالارعا يە قايتالانباس شىعارمانىڭ كوپشىلىك نازارىنا ۇسىنىلعان كۇنى دەپ قابىل ەتىڭىزدەر. ەل تاريحىندا اسسامبلەيانىڭ قۇرىلۋى ماڭىزدى تۇراقتاندىرۋشى فاكتور بولىپ قالىپتاستى. ەستەرىڭىزدە بولار, 1995 جىلى قازاقستاننىڭ ساياسي جۇيەسى ءوزارا ۇيلەسىمسىزدىكتىڭ اسەرىنەن قيىن داعدارىسقا تاپ بولدى. وسى كەزدە ەلباسى كورەگەندىگىنىڭ ساياسي ايعاعى رەتىندە اسسامبلەيا قۇرىلدى. وسىلايشا, بيلىك پەن قوعام اراسىنداعى ىزگىلىكتىڭ كوپىرى ورنادى. بۇل ساياسي قادامداعى نۇرسۇلتان ءابىش ۇلىنىڭ سارا جولى ەشقاشان دا ۇمىتىلماق ەمەس», دەدى.
سونىمەن بىرگە ج.تۇيمەباەۆ كەڭەس بەرۋشى ورگان رەتىندە قۇرىلعان اسسامبلەيا جالپىۇلتتىق ديالوگتىڭ الاڭىنا اينالعانىن, قازاقستاندى رەفورمالاۋ مەن دامىتۋدىڭ وزەكتى ماسەلەلەرىنىڭ بارلىعىندا ءۇن قوسقانىن جەتكىزدى. «بۇگىنگى تاڭدا اسسامبلەيانىڭ باستاماسى ارقاسىندا ءبىزدىڭ ومىرىمىزدە ساياسي قۋعىن-سۇرگىن مەن اشتىق قۇرباندارىن ەسكە الۋ, العىس ايتۋ كۇنى, قازاقستان حالقىنىڭ بىرلىگى كۇنى سەكىلدى ۇعىمدار پايدا بولدى. وسى اتالعان رۋحاني ىستەردىڭ بارلىعى ءوزىنىڭ باستاۋىن اسسامبلەيا سەسسيالارىنان الادى», دەدى قحا توراعاسىنىڭ ورىنباسارى.
مەملەكەت جانە قوعام قايراتكەرى مىرزاتاي جولداسبەكوۆ اسسامبلەيا مۇشەلەرى مەن جيىنعا قاتىسۋشىلاردى قۇتتىقتاپ, ەلباسىنا, قازاقستان حالقى اسسامبلەياسىنا قاتىستى ەستەلىكتەرىمەن ءبولىستى. «ەلباسىمەن 1958 جىلى ورتا مەكتەپتىڭ 10 سىنىپ وقۋشىسى كەزىندە تانىستىم. سودان بەرى حابار ۇزىلگەن ەمەس, ارالاسىپ تۇراتىنبىز. بۇل اسسامبلەيانىڭ قۇرىلعان كەزىندە دە باسى-قاسىندا بولدىم. اسسامبلەيانىڭ ەلىمىزدەگى ورنى ەرەكشە. بۇگىنگى جيناقتان دا وسىناۋ ماڭىزدى ۇيىمعا قاتىستى سارالى ويلار مەن قۇندى دەرەكتەر ەنگەنىن كورە الاسىزدار», دەدى.
