سالتاناتتى ءىس-شارادا باح مىرزا گرەكيا, قىتاي, فرانتسيا, اقش, سەنەگال, اۆستراليا, جاپونيا ۇوك باسشىلارىنا جانە بوسقىنداردان جاساقتالعان وليمپيادالىق قۇراما جەتەكشىسىنە شاقىرتۋ ۇسىندى. شاقىرتۋ العاندار قاتارىندا وليمپيادا ويىندارى العاش رەت ۇيىمداستىرىلعان ەل جانە الداعى ۋاقىتتا ءىرى سپورتتىق باسەكەلەردى قابىلدايتىن مەملەكەتتەر بار.
ء«بىر جىلدان جاپونيا تاريحقا ەنەدى. تورتجىلدىق دوداسى توكيونىڭ بۇكىل الەمگە جاپوننىڭ باي تاريحىن, ءداستۇرىن, وزىق يننوۆاتسياسىن, قوناقجايلىعى مەن سپورتقا دەگەن ماحابباتىن پاش ەتۋگە بەرىلگەن مۇمكىندىك. ۇيىمداستىرۋ كوميتەتىنىڭ ءمىنسىز جۇمىسىنىڭ ارقاسىندا وليمپياداعا دايىندىق جوعارى دەڭگەيدە وتۋدە. ءبىزدى كوپتەگەن جاڭاشىلدىقتار كۇتىپ تۇر. ءبىز سول ءساتتى اسىعا كۇتەمىز! مەن وليمپياداعا ءبىر جىل ۋاقىت قالعاندا وسىنداي دايىندىق جۇرگىزگەن ەشبىر قالانى وسىعان دەيىن كورمەدىم», - دەدى باح.
بۇگىنگە دەيىن وليمپيادا ويىندارىنا 3,2 ميلليون بيلەت ساتىلىپ كەتتى. ال 200 مىڭنان اسا ادام ەرىكتى بولۋعا ءوتىنىش بىلدىرگەن.
«توكيوعا دەيىن ءبىر جىل» سالتاناتتى جيىنى توكيوداعى حالىقارالىق فورۋم اياسىندا ءوتتى. جيىنعا جاپونيا پرەمەر-ءمينيسترى سيندزو ابە, حوك پرەزيدەنتى توماس باح, توكيو قالاسىنىڭ گۋبەرناتورى يۋريكو كويكە جانە وزگە دە لاۋازىمدى تۇلعالار قاتىستى.
