«يۋتاريا» تىگىن فابريكاسىنىڭ بازاسىندا تىگىن شەبەرلىگىن ۇيرەنىپ, وقۋ اياعىندا كاسىپ ۇيرەنۋشىلەرگە شەبەر سەرتيفيكاتىمەن قوسا جۇمىس باستاۋ ءۇشىن تىگىن ماشيناسى سالتاناتتى تۇردە تابىس ەتىلدى. جيىندا ءسوز العان Nur Otan پارتياسىنىڭ حاتشىسى الىبەك الدەنەي قازاق قوعامىندا انالاردىڭ الار ورنى ەرەكشە ەكەنىن اتاپ ءوتتى. «تاريحتى پاراقتاساق, نەبىر سىندارلى جىلداردا بويى نازىك بولعانىمەن, جانى قايسار قاۋىمنىڭ ارقاسىندا ءوز بولمىسىمىزدى ساقتاپ قالدىق. بۇل ءسوزىمدى بەلگىلى دەموگراف-عالىم ماقاش ءتاتىموۆ اعامىزدىڭ ەكىنشى دۇنيەجۇزىلىك سوعىستان كەيىنگى حالىقتىڭ قايتا ەڭسەسىن كوتەرۋىنە ايەلدەردىڭ قوسقان ۇلەسى تۋرالى ايتقان تۇشىمدى دەرەكتەرى دالەل بولا الادى. سول ەرىك-جىگەرى مىقتى انالارىمىزدىڭ جالعاسى – سىزدەرسىزدەر», دەي كەلە, وسى ءساتتى پايدالانىپ ءبىر بەلەستى باعىندىرىپ وتىرعان نازىك جاندارعا العىس ايتتى.
«يۋتاريا» تىگىن فابريكاسى باس ديرەكتورىنىڭ ورىنباسارى دينارا زاكيەۆا قوسىمشا ءبىلىم العانداردىڭ ءارقايسىسى ەندى ۇيدە وتىرىپ-اق تابىس تابۋعا دايىن, ءوزىنىڭ جەكە تىگىن قۇرالى بار مامان بولىپ شىققانىن جەتكىزدى. ولاردىڭ باسىم بولىگىنە اتالعان فابريكادا جۇمىس ىستەۋگە ۇسىنىس تا تۇسكەن كورىنەدى.
«جاردەم» باعدارلاماسى جالپى رەسپۋبليكالىق دەڭگەيدە جۇزەگە اسۋدا. اتالعان جوبادا 1500-3000 ادامعا قوسىمشا ءبىلىم بەرۋ كوزدەلگەن. «ال ءبىز وقىتۋ كۋرسىمىزدى قازاقستان ايەلدەر قاۋىمداستىعىمەن بىرلەسىپ قولعا الدىق. بۇل جولى بىزدە ەلوردالىق 20 ادام وقىدى. جىل اياعىنا دەيىن ولاردىڭ سانىن 600-گە جەتكىزۋدى جوسپارلاپ وتىرمىز. ولار از عانا ۋاقىتتىڭ ىشىندە ءونىمدى وزدەرى وندىرە الاتىنداي دارەجەدە مەڭگەردى. ءبىرى بەلدەمشە, ەندى ءبىرى كويلەك نەمەسە شالبار تىگە الادى. بۇدان كەيىنگى ءوزىن-ءوزى دامىتۋى ءۇيرەنۋشىلەردىڭ ماقساتى مەن تاباندىلىعىنا بايلانىستى», دەيدى د.زاكيەۆا. فابريكا وكىلىنىڭ مالىمدەۋىنشە, وقۋ كۋرسىنان وتكەندەرگە سوڭعى كۇنى «اتامەكەن» كاسىپكەرلەر پالاتاسىنىڭ وكىلدەرىن شاقىرىپ, قالاي كاسىپ باستاۋعا بولاتىنى تۋرالى بازالىق ءبىلىم بەرىلگەن.
تىگىن كۋرسىن بىتىرگەن كوپ بالالى انا ينديرا ابايقىزى ءوز كاسىبىن دوڭگەلەتۋگە دايىن ەكەنىن ايتادى. «بۇل جوبا جونىندە پارتيادان ەستىپ كەلدىم. نەگىزى ءتىگىن تىگۋدى ءبىلمەيتىنمىن, ەندى ءۇيرەندىم. ارينە, ەكى اپتالىق وقۋ جەتكىلىكسىز, سوندىقتان جۇمىسپەن قامتۋ ورتالىعىنىڭ قوسىمشا ماماندىق بەرەتىن تىگىن كۋرسىنان ءوتۋدى باستاپ كەتتىم. وندا ەندى وسى فابريكادان العان ءبىلىمىمدى جەتىلدىرىپ, كيىمدى تولىعىمەن, قالاي ءساندى ەتىپ تىگۋگە بولاتىنىن ۇيرەنەمىن», دەيدى بولاشاعىنا سەنىمدى انا. ونىڭ ايتۋىنشا, «جاردەم» بەرگەن تىگىن ماشيناسى – بيزنەسكە باستاۋ بولارى انىق.
ايتا كەتەيىك, اتالعان باعدارلاما نيەتتىلەردىڭ ءوتىنىشىنە سايكەس بارلىق وبلىستاردا جۇزەگە اسىرىلىپ جاتىر.
