جاڭابۇلاق اۋىلدىق مادەنيەت ۇيىندە جەرگىلىكتى اتقارۋشى ورگان وكىلدەرى, ءماسليحات دەپۋتاتتارى, اۋىلدىق وكرۋگ اكىمدەرى, باسقا دا مەكەمە باسشىلارى جانە تۇرعىندارمەن بولعان كەزدەسۋدە اتاۋلى الەۋمەتتىك كومەكتى تاعايىنداۋ, ءتورتىنشى دەڭگەيلى بيۋدجەتكە كوشۋ, سالىق جيناۋ, تۇرعىن ءۇي كەزەگى ماسەلەلەرى كوتەرىلدى.
سەناتورلار جۇمىس ساپارىن اۋدان ورتالىعىندا ودان ءارى جالعاستىرىپ, 100 ورىندىق ينتەرنات, 300 ورىندىق مەكتەپ-گيمنازيا, 3 قاباتتى كومۋنالدىق تۇرعىن ءۇيدىڭ قۇرىلىسىمەن تانىستى. سونىمەن قاتار, جايىق اۋىلىنداعى تازا اۋىز سۋ قۇبىرىنىڭ قۇرىلىسى جانە جايىق وزەنىنىڭ جاعالاۋىن بەكىتۋ جۇمىستارىنا نازار اۋداردى. جەرگىلىكتى اكىمدىك وكىلدەرى جايىق وزەنى اقجايىق اۋدانىنىڭ ورتالىعى چاپاەۆ اۋىلىنداعى كوكتەم مەزگىلىندە سۋ كوتەرىلۋ قاۋپى تونگەنىن جەتكىزدى. وزەن جانىنداعى ۇيلەردىڭ سۋعا كەتۋ قاۋپىن الدىن-الۋ ماقساتىندا سۋ جاعاسىن بەكىتۋگە 1ملرد 400 ملن تەڭگە قاراجات تابۋ ماسەلەسى ايتىلدى.
سونداي-اق ن.تورەعاليەۆ پەن ە.مۇقاەۆ بۋدارين اۋىلدىق وكرۋگىندەگى «اتامۇرا» شارۋا قوجالىعىندا دا بولدى. قازاقتىڭ اقباس تۇقىمدى ءىرى قاراسىن, كوشىم جىلقىسىن, ەدىلباي قويىن ءوسىرىپ وتىرعان قوجالىقتا مال شارۋاشىلىعى قارقىندى دامۋدا. باۋ-باقشا, الما اعاشىن ءوسىرىپ جانە كارپ بالىعىن كوبەيتىپ كەلە جاتقان شارۋاشىلىقتا جۇيەلى ىستەر قولعا الىنعان. وسىلاردى ارالاپ كورگەن سەنات دەپۋتاتتارى شارۋانىڭ ىسىنە وڭ باعا بەرىپ, وزەكتى ماسەلەلەردى زەردەلەدى.
شارۋا قوجالىقتارى كوكتەمگى جانە كۇزگى دالالىق جۇمىستار كەزىندە جانارماي باعاسىنىڭ قىمباتتايتىنىن ايتىپ, ماۋسىم كەزىندە جەڭىلدىك بەرۋىن نەمەسە سۋبسيديا ءبولۋىن سۇرادى.
