ايماقتار • 26 ماۋسىم، 2019

شىڭعىرلاۋدا «قازاق دالاسىنىڭ ۇلى مادەنيەتى» اتتى فەستيۆال ءوتتى

281 رەتكورسەتىلدى

باتىس قازاقستان وبلىسىنداعى كوركەم مۇيىستەردىڭ ءبىرى – تورىاتباسى تاۋىنىڭ باۋرايىندا «قازاق دالاسىنىڭ ۇلى مادەنيەتى» اتتى فەستيۆال ءوتتى. 2 كۇنگە سوزىلعان شاراعا ۇيىمداستىرۋشى شىڭعىرلاۋ اۋدانىنان بولەك، سىرىم، اقجايىق، ءبورلى، تاسقالا اۋداندارى مەن ورال قالاسىنان كوماندالار ارنايى كەلدى.

كيىز ءۇي تىگۋ سايىسى، «رۋحاني جاڭعىرۋ» باعدارلاماسى اياسىندا «تاريح، تۇلعا، تامىرلاستىق» تاقىرىبىندا كورمە ۇيىمداستىرۋ، ۇلتتىق سپورت تۇرلەرىنەن جارىستار، «قازاق دالاسىنىڭ ۇلى مادەنيەتى» ونەر فەستيۆالى سەكىلدى بىرنەشە باعىتقا بولىنگەن فەستيۆال پراكتيكالىق قىرىمەن كوپشىلىك ەسىندە قالدى.

ماسەلەن، تالاي عاسىر بويى كوشپەلى اتا-بابامىزدىڭ قۇتتى قونىسى بولعان كيىز ءۇي قازىرگى قازاقتىڭ كۇندەلىكتى تۇرمىسىنان الىستاپ كەتكەنى راس قوي. سودان دا بولار، بۇگىندە ەكىنىڭ ءبىرى كيىز ءۇيدى تىگۋدى بىلە بەرمەيدى. تورىاتباسىنداعى فەستيۆالدىڭ ءبىر ەرەكشەلىگى وسى بولدى. كوماندالار كيىز ءۇيدى تىگىپ، جيناپ، جاساۋ-جابدىعىن ورىن-ورنىمەن پايدالانىپ كورسەتىپ جارىستى. بۇل سايىستا باس جۇلدەگە تىگىلگەن 60 مىڭ تەڭگەنى شىڭعىرلاۋلىقتار جەڭىپ الدى. سىرىم، ءبورلى جانە تاسقالا اۋداندارى كوماندالارى وسى رەتپەن 40، 30 جانە 20 مىڭ تەڭگە جۇلدەنى ءبولىستى. 

شارانىڭ ەكىنشى كۇنى ۇلتتىق سپورت تۇرلەرى – جامبى اتۋ، تەڭگە ءىلۋ، كوكپار تارتۋ، اۋدارىسپاققا ارنالدى. تاقىمى مىقتى جىگىتتەر جۇگەن-قۇرىق تيمەگەن شۋ اساۋلارعا باس ءبىلدىرتتى. تاۋ تۋريزمىمەن اينالىساتىن تاباندى قىز-جىگىتتەر دە بوس وتىرمادى. جامبى اتۋدان 1-2 ورىندى شىڭعىرلاۋ اۋدانى، 3 ورىندى اقجايىق اۋدانى يەمدەندى. سونىمەن قاتار، تاۋ تۋريزمىنەن 1 ورىندى شىڭعىرلاۋ اۋدانى، 2 ورىندى ءبورلى، 3 ورىندى تاسقالا اۋدانى جەڭىپ الدى. كوكپار مەن اۋدارىسپاقتا ورال قالاسىنىڭ «ۇلتتىق سپورت» مەكتەبىنەن كەلگەن شاباندوزدار كاسىبي شەبەرلىك كورسەتتى. بارلىق جەڭىمپازدار العىس حاتپەن جانە اقشالاي سىيلىقپەن ماراپاتتالدى.

ايتا كەتەيىك، تورىاتباسىندا وسىنداي توي بىلتىر دا بولعان ەدى. بىراق ول اۋدان كولەمىندە عانا ۇيىمداستىرىلسا، بيىل، مىنە، وبلىستىق دەڭگەيگە كوتەرىلدى. جالپى، شىڭعىرلاۋ اۋدانى باسشىلارى وڭىردە ولكەتانۋشىلىق قوزعالىسىن جانداندىرىپ، اۋداننىڭ تەرەڭ تاريحى مەن تۋريستىك الەۋەتىن ناسيحاتتاۋعا ەرەكشە نازار اۋدارىپ كەلەدى.

سوڭعى جاڭالىقتار

ارىماس ابىروي

رۋحانيات • كەشە

كونەدەن كەلگەن كونەك

رۋحانيات • كەشە

شىمبۇلاق شاڭعى ماۋسىمىن اشتى

قىسقى سپورت • كەشە

اتباسار

رۋحانيات • كەشە

ۇقساس جاڭالىقتار