كەشتىڭ باستى جەكپە-جەگىنىڭ بىرىندە جارتىلاي ورتا سالماقتاعى M-1 Global نۇسقاسىنىڭ التىن بەلبەۋ يەگەرى شاۆقات راحمونوۆ برازيليالىق تياگو ۆارەجاو لاسەردامەن كۇش سىناسادى. وسى ايقاستى تاماشالاۋعا بارشا جانكۇيەرلەر ەرەكشە قۇشتارلىق تانىتىپ وتىر. سەبەبى, قانداسىمىز جەڭىسكە جەتكەن جاعدايدا وعان وسى سپورت تۇرىندەگى ەڭ بەلدى ۇيىم – UFC-گە داڭعىل جول اشىلادى. ماماندار مەن جانكۇيەرلەردىڭ پايىمداۋىنشا, شاۆقات ونداي قۇرمەتكە لايىق. سەبەبى, وسى كۇنگە دەيىن 11 كەزدەسۋ وتكىزگەن 24 جاستاعى قازاق سپورتشىسى بارلىعىندا ايقىن جەڭىسكە قول جەتكىزدى. ول بىردە-ءبىر قارسىلاسىنا بەت قاراتقان جوق.
نۇر-سۇلتانداعى جارىستا شاۆقات راحمونوۆقا قارسىلاس اتانىپ وتىرعان وڭتۇستىك امەريكانىڭ وعلانى دا وتە مىقتى. 29 جاستاعى تياگو ۆارەجاو لاسەردا 36 رەت ايقاس الاڭىنا شىعىپ, 28 مارتە ۇستەمدىك تانىتتى. 23 جەكپە-جەكتى مەرزىمىنەن بۇرىن اياقتادى. 6 رەت ۇتىلىپ, 1 رەت تەڭ ءتۇستى. تاعى ءبىر كەزدەسۋدىڭ ناتيجەسى ەسەپكە الىنعان جوق.
