قالا باسشىسىنىڭ نازارىنا ۇسىنعان جوبالاردى كونكۋرسقا كەلىپ تۇسكەن 50 جۇمىستىڭ ىشىنەن ىرىكتەپ الدى.
قالا بيلىگى قازاقستاننىڭ حالىق ءارتىسى ءشامشى ءمۇسىنى قازاقستان قوناق ءۇيى مەن رەسپۋبليكا سارايىنىڭ ورتاسىنا, بالۋان شولاق بولسا سپورت سارايىنىڭ الدىنان ورىن بەرەدى.
سونداي-اق جىل اياعىنا دەيىن قىز-جىبەك پەن تولەگەننىڭ قولادان قۇيىلعان مۇسىندەرىنە ورىن بەرۋ جوسپاردا بار. ەسكەرتكىش-مۇسىندەردە قوس عاشىقتى كينودا سومداعان مەرۋەرت وتەكەشوۆا مەن قۇمان تاستانبەكوۆتەردىڭ ومىردەگى بەينەسىمەن سومدالعان. قازىر كونكۋرس كوميسسياسىنا كەلىپ تۇسكەن جوبالار ىرىكتەلىپ جاتىر.
سونداي-اق الماتىداعى ورتالىق مۋزەيگە كەلگەن قوناقتاردى ەرتە زامانداردا كوشپەندىلىك سالتىن ۇستانعان بابالارىمىزدىڭ قولادان قۇيعان مۇسىندەرى كۇتىپ الىپ, شىعارىپ سالاتىن بولادى.
ءمۇسىننىڭ كومپوزياتسياسىندا گەومەتريالىق ورنەكتەر كەڭىنەن قولدانىپ, پەتروگليفتەر تاسقا قاشالىپ تۇسىرىلگەن. جوبا اۆتورلارى , بەلگىلى سۋرەتشىلەر سانجار جانە جانەل جۇبانوۆالار بىزگە بەرگەن سۇحباتىندا مۇسىندەردى دايىنداۋ كەزىندە تاۋ شاتقالدارىنىڭ سىنىقتارى قولدانىلعانىن ايتتى. باسقاشا ايتقاندا جاساندى ەمەس, دالا كورىنىسىنىڭ كىشكەنتاي بولشەگى. «بۇل تاريحىن قاعازعا ەمەس, تاسقا جازىپ كەتكەن اتا –بابا رۋحىمەن سىرلاسىپ قايتۋعا بەرىلگەن مۇمكىندىك», –دەيدى بولار بىزبەن اڭگىمەسىندە.
مۇسىندەردىڭ جوباسىمەن تانىسقان قالا اكىمى باۋىرجان بايبەك ورتالىق مۋزەي الدىنداعى سۋ بۇرقاقتى جاڭارتۋعا جانە گازونداردىڭ ورنىنا دالا گۇلدەرىن وتىرعىزۋ تۋرالى كەڭەس بەردى. قازاق دالاسىنىڭ كىشكەنتاي بولشەگى بابالار مۇسىنىمەن بىرگە الماتىعا قايتا ورالدى. ەسكەركىشتەر قالا بيۋدجەتىنەن ەمەس, جەكە ينۆەستورلاردىڭ قارجىسىنا بوي كوتەرەدى.
قالا اكىمى باۋىرجان بايبەك جۋرناليستەرمەن كەزدەسكەن كەزدە 2019 جىلدىڭ اياعى مەن 2020 جىلدارى قازاقتىڭ تاريحىنان ورىن العان قايراتكەرلەردىڭ مۇسىندەرى الماتىدان ورىن الاتىنىن ايتتى. وسىدان بىرنەشە جىل بۇرىن يمانعالي تاسماعامبەتوۆ ابدوللا قارساقباەۆ پەن بەردىبەك سوقپاقباەۆ تاندەمى تۇسىرگەن «مەنىڭ اتىم –قوجا» كينوسى كەيىپكەرلەرىنىڭ قولا مۇسىندەرى استاناعا ورناتىلاتىنىن ايتقان. تاسماعامبەتوۆتىڭ باسقا جۇمىسقا اۋىسۋىنا بايلانىستى بۇل ۇسىنىس ۇمىت قالدى.
كۇنى كەشە عانا ەو جانە لوندون كورەرمەندەرىنىڭ ىستىق ىقىلاسىنا بولەنگەن تۋىندىنى سومداعان كەيىپكەرلەردىڭ مۇسىندەرى الماتىداعى ساياباقتاردىڭ بىرىندە ورناتىلسا دەگەن ءبىزدىڭ ۇسىنىستى الماتى اكىمى نازارعا الادى دەپ ۇمىتتەنەمىز.
الماتى
